Ձեր վստահելի աղբյուրը

««Ազգային անվտանգության ծառայության պահեստազորի սպաների միության» ստեղծումը պարտադիր էր: Մեր երկիրը գտնվում է աղետալի վիճակում, գործ ունեն անելու հայրենիքի իրական նվիրյալները, մարդիկ, որոնք իրենց ողջ կյանքում ապացուցել են, որ նվիրված են երկրին, հայ ժողովրդին, առաջնորդվել են  բացառապես  պետական և ազգային շահի առաջմղմամբ»,- ասուլիսում ասաց  «Ազգային անվտանգության ծառայության պահեստազորի սպաների միություն» ՀԿ խորհրդի անդամ, գեներալ-մայոր, ԱԱԾ նախկին տնօրեն Արթուր Վանեցյանը:

Նա նշեց, որ այսօր այն օրը չէ, որ որևէ մեկը կանգնի հայելու առջև և ասի՝ ես իմն արդեն արել եմ, հիմա մյուսների հերթն է:

«Չկան մյուսներ, կա արյունաքամ լինող հայրենիք, կանք մենք բոլորս, բոլորս պարտավոր ենք մեր եղած հնարավորությունները, գիտելիքները, կարողությունները դնել մեր հայրենիքի անվտանգային համակարգի վերականգնման համար»,- ասաց Ա. Վանեցյանը:

Նա նշեց, որ, իհարկե, ՀԿ-ն ի սկզբանե հայտարարել է, որ ապաքաղաքական է. «Վերահաստատում եմ այդ պնդումը, բայց նաև բոլորդ շատ լավ գիտեք, որ ես զբաղվում եմ ակտիվ քաղաքականությամբ, հնարավոր չէր լինի իմ ներկայությունն այս ՀԿ-ի կազմում որևէ կերպ չկապել քաղաքականության հետ:

Բայց ես հավաստիացնում եմ, որ այս կազմակերպությունը գործելու է ոչ որպես որևէ քաղաքական ուժի, այդ թվում և իմ, ինձ աջակցելու, իմ գաղափարներն առաջ  մղելու համար, այլ մենք գործելու ենք բացառապես մեր երկրի ու մեր պետության շահերից ելնելով»,- ասաց Ա. Վանեցյանը:

Նա նշեց, որ այսօր ՀԿ-ին անդամագրվել են շատ բանիմաց սպաներ, գեներալներ, համոզված է, որ իրենց շարքերը դեռ համալրվելու են և բոլորով պետք է գործեն «մենք պետություն չենք, բայց պետությունը մենք ենք» բանաձևով:

«Եթե որևէ մեկը կփորձի անել քայլեր մեր պետության, մեր ժողովրդի դեմ, հավատացեք՝ մեր կողմից կարժանանան խիստ գնահատականի ու խիստ արձագանքի»,- ասաց գեներալ-մայոր, ԱԱԾ նախկին տնօրեն Արթուր Վանեցյանը: