Ձեր վստահելի աղբյուրը

«Հիշում եք ֆիլմի հայտնի դրվագը՝ «Պավլե,՛ 830 ոչխարը 70 կիլոմետր տանում ենք Երևան, ճանապարհին յուրաքանչյուր ոչխար կորցնում է երկու կիլոգրամ, դա մոտավորապես 1660 կլիոգրամ է, սա բաժանում ենք ոչխարների վրա, ստացվում է 80 ոչխար» և այն ժամանակ, երբ որևիցե մեկը 80 ոչխար հանձնում էր պետությանը՝ նրա նկարը կպցնում էին գյուղապետարանի պատին, տանում եին Մոսկվա, պարգևատրում էին»,- Աժ-ում ելույթի ժամանակ հայտարարեց «Իմ քայլը» խմբակցության պատգամավոր Արթուր Մանուկյանը՝ ելույթ  ունենալով «Կինեմատոգրաֆիայի մասին» նոր օրենքի նախագծի վերաբերյալ:

Ներկայացնելով կինոյի ոլորտին նոր օրենքով աջակցություն ցույց տալու անհրաժեշտությունը՝ պատգամավորը պատկերավոր բացատրեց, որ եթե պետությունը ձեռք չի մեկնում կինոյի ոլորտին, ապա այն չի ունենում 830 ոչխար և պետությանը չի վերադարձնում 80 ոչխարը:

Մանուկյանը բացատրեց, որ քննարկվող նախագծով առաջարկվում է Հայաստանում ստեղծել «Քեշ բեք»-ի հնարավորություն, որy կինո նկարահանողներին կխրախուսի գումարները ներդնել մեր երկրում, այլ ոչ թե Վրաստանում, որտեղ արդեն գործում է այդ համակարգը: 

Արթուր Մանուկյանը հայտնեց, որ «Քեշ բեք»-ը չի վերաբերում ֆիլմի ողջ բյուջեին, այլ որոշակի ծառայություններ է ընդգրկելու, որոնք կազմում են նկարահանվող  ֆիլիմի արժեքի 40 տոկոսը:

Մասնագիտությամբ դերասան պատգամավորը, կարևորելով կինոյի դերը, հիշեց մշակույթի ոլորտում հայտնի «Ռուս-ֆրանսիական պատերազմը ավարտվեց այն օրը, երբ տպարանից դուրս եկավ «Պատերազմ և խաղաղություն» վեպը» արտահայտությունը և բացատրեց, որ այն պատմությունը, որը տեղի է ունեցել ռուս և ֆրանսիացի ժողովրդի միջև չի հասկացվել, քանի դեռ չի ներկայացվել արվեստի՝ գրականության պրիզմայով:

«Որպեսզի ամբողջանա այն պատմությունը, որը տեղի է ունեցել ժողովրդի հետ, այն պետք է անցնի արվեստի միջով»,- հայտարարեց Մանուկյանը՝ նկատելով , որ ներկայում այնպես է ստացվելէ կինոն մատչելիության և դիտողականության առումով շատ ավելի մեծ տեղ ունի, քան գրականությունը: