Ամերիկյան դատարանն առաջին անգամ կքննի փղի հայցը կենդանաբանական այգու դեմ
Նյու Յորքի վերաքննիչ դատարանը վարույթ է ընդունել և կքննարկի Հեփի փղի հայցը կենդանաբանական այգում իրեն պահելու օրինականության վերաբերյալ: «ՌԻԱ նովոստի»-ի փոխանցմամբ, այդ մասին ասվում է հայց ներկայացրած «Nonhuman Rights Project» հիմնադրամի կայքում:
«Պատմության մեջ սա առաջին դեպքն է, երբ անգլալեզու բարձրագույն դատարանը կքննի դատական հայց, որն անձի անունից չէ»,- ասված է հայտարարության մեջ:
Դատավարության պատմությունը սկսվել է 2018-ին: Կենդանիների պաշտպանների հիմնադրամը միջնորդություն էր ներկայացրել ճանաչել Հեփի փղի ֆիզիկական ազատության հիմնարար իրավունքը և Բրոնքսի կենդանաբանական այգուց նրան տեղափոխել փղերի արգելավայր: Ավելի քան 40 տարի կենդանաբանական այգում բնակվող Հեփին դարձել է աշխարհում առաջին փիղը, որի՝ կենդանաբանական այգում գտնվելու օրինականությունը քննվում է դատարանում:
Այնուամենայնիվ, առաջին ատյանի դատարանը մերժել էր փղի միջնորդությունը: Այժմ այն կքննարկի վերաքննիչ դատարանը: