Ձեր վստահելի աղբյուրը

«Իմ նման հազարավոր ծնողներ այսօր պետք է զանգեին ու շնորհավորեին իրենց որդիներին Հաղթանակի օրվա առիթով, հարյուրավորները գնային Շուշի, Հադրութ, Ջրական, Արայի լեռ՝ իրենց որդիներին տեսնելու ու շնորհավորելու։ Այս տականքները եկան և խլեցին և Շուշին, և հաղթանակը, և մեր տղերքին»,- Ազատության հրապարակում «Հայաստան» դաշինքի հանրահավաքում ունեցած ելույթում ասաց «Ճշմարտություն սերունդների համար»  նախաձեռնության հիմնադիր,  քաղաքագետ Գեղամ Նազարյանը, ում որդին՝ Աբգարը, զոհվել է պատերազմի ժամանակ։

Նա ներողություն խնդրեց բոլոր տղաներից, նրանց ծնողներից, որ այս վեց ամսվա ընթացքում չեն կարողացել այս իշխանություններին հեռացնել. «Բայց ասում եմ՝ եկել է  վերջին փուլը և ուս-ուսի տված պետք է երկիրը մաքրենք չարքից, որ մեր տղաների շիրիմների առաջ կանգնած մենք կարողանանք ասել՝ մենք շարունակեցինք ձեր գործը»։

Գ. Նազարյանի խոսքով՝ սրանք եկան ու մեր հաղթանակած երկրին պարտություն բերեցին։

«Այսօր հավաքվել ենք այստեղ քշելու  այս պարտություն, արհավիրք, աղետ բերածներին ու կառուցենք այն Հայաստանը, որը պետք է կառուցենք, որի մասին երազում էր իմ Աբգարն ու մնացած  տղերքը, որոնք գնացին ու իրենց ամենաթանկը՝ կյանքը, տվեցին մեր երկրի համար։

Նրանք կյանքը տվեցին, մենք մի քիչ չարչարվենք՝ մի քիչ փողոցում կանգնենք, մի քիչ երթ անենք, ցույց անենք ու երկիրը մաքրենք սրանցից»,- նշեց նա։

Գ.Նազարյանն ասաց, որ սրանք չպետք է թույլ տան մասնակցեն ընտրություններին։

«Քեզ եմ ասում դատարկագլուխ՝ ո՞վ է քեզ ստիպում, որ այսքանից հետո մասնակցես ընտրություններին։ Ընտրարշավին գնալու ես գյուղեգյուղ ու ի՞նչ ես պատմելու, թե ո՞նց էիր վերելակում խեղճանում, Շուշին հանձնո՞ւմ, ո՞նց էիր որոշում՝ 5000 տղա սպանես, թե 7000 տղա։

Ուժ գտի մեջդ։ Գիտեմ, թե քեզ ինչ են անում։ Ուժ գտի հիմա, վեր կաց, արի այստեղ, կանգնի մեր կողքը, ասա, թե ինչ ուժ է ստիպում այդ ամենն անես, ով է քեզ ստիպում այդ անբարոյականություններն ասես, ով քեզ ստիպեց, որ այսօր առավոտ սողեսող գնայիր Եռաբլուր ու փորձեցիր ծաղրել մեր տղերիքն, անագել հիշատակը։ Չստացվեց։ Քեզ ես ծաղրում ու անարգում։ Անակնկալ անձրևը եկավ ու արյունոտ ոտքերդ մաքրեց այդտեղից։

Դու հասկացիր՝ մեղքերդ մի ավելացրու, մի ելույթ ունեցի, կարճ նախադասություն ասա՝ ներողություն, ինձ դատեք, որ հետո այս ժողովրդի ձեռքը չընկնես»,- ասաց Գ.Նազարյանը։

Նա նշեց, որ այս հարթակում կանգնած են Հայաստանին հաղթանակ բերած մարդիկ, որոնք Շուշի են նվիրել այս ազգին, այս հողն ու ջուրն են սիրում, ու այս մարդկանցով պետք է մաքրեն այս երկիրը։

«Այսօր մայիսի 9-ն է՝ Հաղթանակի օրն է, ձեզ ասում եմ՝ ուրեմն հաղթանակ։ Աստված օգնական մեզ»,- ելույթի վերջում ասաց Գեղամ Նազարյանը։