Ձեր վստահելի աղբյուրը

«Վերջին անգամ հանրահավաքի հարթակում եմ եղել 2003 թվականի Մատենադարանի դիմաց նախագահական ընտրություններից մեկ օր առաջ։ Հետ եմ վարժվել հանրահավաքներում խոսալուց։ Իշխանը Սաղաթելյան վեց ամիս է տրիներովկայի մեջ է։ Չեմ կարող այդպես խոսել, բայց կփորձեմ անդրադաձ անել երեք կարևոր բովանդակային հարցերի»,- Ազատության հրապարակում հայտարարեց ՀՀ երկրորդ նախագահ Ռոբերտ Քոչարյանը։

Հիշեցնենք, որ Ազատության հրապարակում կայացավ ՀՀ երկրորդ Նախագահ Ռոբերտ Քոչարյանի, Հայ Յեղափոխական Դաշնակցության և «Վերածնվող Հայաստան» կուսակցության հանրահավաքը։ Նախքան այդ տեղի ունեցավ ՀՀ երկրորդ Նախագահ Ռոբերտ Քոչարյանի, Հայ Յեղափոխական Դաշնակցության և «Վերածնվող Հայաստան» կուսակցության քաղաքական համագործակցության մեկնարկին նվիրված ասուլիսը։

Մինչ բովանդակային հարցերին անդրադառնալը՝ Ռ.Քոչարյանն ասաց. «Մտքովս նույնիսկ չէր անցնում, որ կարող եմ վերադառնալ և իշխանության համար հայտ ներկայացնել։ Ես կարծում էի, թե պետական պաշտոնյա լինելն ինձ համար ավարտված էր, կատարել եմ պարտքս հայրենիքի առջև, կարող եմ ազատ,  հանգիստ ապրել իմ անձնական կյանքով, բայց այն, ինչ եղավ, այն վտանգները, որոնք այսօր կան մեր երկրի առջև ստիպում են հետ գալ ու պայքարել։ Հակառակը կլինի դասալիքություն»։

Ռոբերտ Քոչարյանը ներկայացրեց երկրի առջև ծառացած երեք հիմնական խնդիրները.
«Այսօր Հայաստանն անվտանգ չէ, այսօր Սյունիքի սահմաններն անվտանգ չեն, մի երկիր ենք, որ սեփական ուժերով չի կարողանում պաշտպանել սահմանները, չի կարողանում պաշտպանել երկրի բնակչության անվտանգությունը։

Այսօր ունենք իշխանություն, որը հետևողականորեն քայքայել է  բանակը ու այսօր ոչինչ չի անում այն վերականգնելու համար։

Մեր նպատակն է հաստատել արժանապատիվ խաղաղություն։ Դա չի կարող անել մի իշխանություն, որը մարմնավորում է պարտություն, խայտառակություն, նվաստացում, մահեր, զոհեր։ Չեն կարող անել։ Մենք կարող ենք դա անել, պատրաստ ենք դա անել։

Երկրորդ հարցը. Ղարաբաղի ապագան բավական մշուշոտ է։ Նոյեմբերի 9-ի ստորագրված չարաբաստիկ պայմանագրով 4,5 տարի անց ենթադրում է՝  Ադրբեջանը կարող է հրաժարվել ռուսական խաղաղապահ զորքերից։ Հիմա որևէ մեկը ձեզանից լսե՞լ է այս իշխանավորներից, թե ինչ են անում այդ ուղղությամբ, պատրա՞ստ ենք արդյոք նման սցենարի, թե՞ ոչ։ Պարտության դեմք հանդիսացող իշխանությունը չի կարող արդյունավետ բանակցող լինել։ Հնարավոր չէ բանակցել  թշնամու հետ, եթե դու չորեքթաթ ես շարժվում, ծնկներիդ վրա ես կանգնած։ Հետևաբար, պետք է գա մի  իշխանություն, որն ի վիճակի է արհեստավարժ, հպարտ բանակցել և հասնել Ղարաբաղի համար բարենպստ լուծումների։ Մենք կարող ենք դա անելու։

Երրորդ. Երկիրը տնտեսական ճգնաժամի մեջ է։ Անցած տարի տնտեսությունը 7,5 տոկոսանոց անկում է  ապրել։ Սղաճն ուտում է  ձեր առանց այն էլ ցածր եկամուտները, երկիրը խրվել է  արտաքին պարտքերի մեջ։ Չի կատարվել ոչ մի խոսում։ Թռիչքաձև աճը փոխարիվեց թռիչքաձև անկումով։ Սա է այս իշխանության երեք տարվա  աշխատանքի արդյունքը։ Հետևաբար սրանք չեն կարող շարունակել։ Պարտվելը միայն պարտություն չէ պատերազմում, ձախողվելը տնտեսական ոլորտում ևս պարտություն է։ Պարտությունը իշխանության համար պետք է առնվազն իշխանությունը կորցնելու գինն ունենա։ Չի կարող պարտությունը լինել անհետևանք, հակառակ դեպքում մենք  ունենալու ենք պարտված, մշտապես պարտվող ազգ։ Այսպես կոչված լուզերների ազգ ենք դառնալու, եթե պարտությունը իշխանության համար հետևանքներ չունենա։

Պետք է այս իշխանությանը քշել, եթե պատրաստ չեն ինքնակամ հեռանալ»։

ՀՀ երկրորդ նախագահի խոսքով,  2018 թվականի ապրիլին ժողովուրդը իշխանության ղեկին է նստացրել մի մարդու, որը չգիտի թե ինչ է պետականությունը, թե այդ պետական մեքենան ոնց է աշխատում, ոնց է կառավարվում. «Փորձեմ ավելի պատկերավոր օրինակ բերել։ Երևակայենք բոլորս մի մեքենայի մեջ ենք, ղեկը մի մարդու ձեռքին է, որը  չգիտի, թե այդ մեքենայի շարժիչը որտեղ է գտնվում։ Հետո պարզվում է, որ այդ մարդն այդ մեքենան քշել էլ չգիտի։ Հիմա քիչ է այդքանը,  պարզվում է՝ այդ մարդը երթևեկության կանոնները չգիտի։  Այդքանն էլ քիչ եղավ, պարզվեց, որ այդ մարդը ճանապարհը չի ճանաչում, չգիտի՝ գնալ հյուսիս, հարավ արևելք, արևմուտք։ Բոլորս այդ մեքենայի մեջ ենք, որն արդեն 3 անգամ վթարի է ենթարկվել՝ տալով 5000 զոհ, 11 հազար վիրավոր, 35 հազար անօթևան ընտանիքներ։

Հիմա ի՞նչ ենք ուզում մենք, պատրա՞ստ ենք լքել այդ մեքենան, թե՞ պետք է վռնդենք  այդ մեքենայի ղեկին նստած անձնավորությանը»։

Ռոբերտ Քոչարյանն ասաց, որ  այսօր այս հարթակից հետհաշվարկ են սկսում Շուշին հանձնած իշխանությանը իշխանության մնալու առումով, իրենց մնացել է 42 օր։

«Ուրեմն ամեն օր սոցցանցերում, ձեր էջերում դրեք այդ օրերի հետհաշվարկը և սա պետք է դառնա ամբողջ հանրապետության աճող սպասելիքը։

Վստահ եղեք, սիրելի ժողովուրդ, որ ամեն ինչ լավ է լինելու։ Լավ եղեք։

Միասին բոլորս՝ Հայաստան, Հայաստան։

Շնորհակալություն ձեզ, ձեր ցավը տանեմ»,- ելույթն ավարտեց Ռոբերտ Քոչարյանը։