Ձեր վստահելի աղբյուրը

«Վերածնվող Հայաստան» կուակցության նախագահ Վահե Հակոբյանն այսօրվա միջոցառմանն իր խոսքը սկսեց մայիսյան հաղթանակների առթիվ շնորհավորանքով։

«Տոն, որը ցավոք, այս տարի նշում ենք լիովին այլ իրավիճակում։ Բաց անկախ բոլոր հանգամանքներից, մենք հիշում ու արժևորում ենք մեր հաղթանակները՝ հավատով ու վճռականությամբ, որ դրանք կրկնվելու են ամենաամոտ ապագայում»,- ասաց Վահե Հակոբյանը՝ ելույթ ունենալով ՀՀ երկրորդ նախագահ Ռոբերտ Քոչարյանի,  Հայ Յեղափոխական Դաշնակցության և «Վերածնվող Հայաստան» կուսակցության քաղաքական համագործակցության մեկնարկին նվիրված միջոցառման ժամանակ։

Նա ընդգծեց, որ այժմ ապրում ենք շատ բարդ ժամանակներում, արցախյան պատերազմում կրած պարտությունը չափազանց ծանր  հետևանքներ է ունեցել երկու հայկական  պետությունների համար։

«Այս աղետը բերած իշխանությունը պատերազմի բերած արհավիրքներին համարժեք սպառնալիք է այսօր։ Ավելին, այս իշխանություններն այսօր վերարտադրվելու հայտ են ներկայացնում։ Այսինքն, մենք ապրում ենք ոչ միայն արդեն տեղի ունեցած, այլ նոր հնարավոր աղետների շեմին»,-ասաց «Վերածնվող Հայաստան» կուսակցության նախագահը։

Սյունիքի նախկին մարզպետը հիշեցրեց, այս իշխանություններն իրական սպառնալիքներ են ստեղծել Հայաստանի ողնաշարը համարվող Սյունիքի համար։

«Իսկ Սյունիքն այն մեկնակետն է, որից սկսում, բայց չի ավարտվում Հայաստանի ու Արցախի անվտանգությունը։ Բոլորս հասկանում ենք, որ Հայաստանն այսօր գնում է ոչ թե սխալ, այլ կործանման գնացող ճանապարհով։ Հենց այս գիտակցումը մեզ ստիպեց ստեղծել կուսակցություն»,-ասաց Հակոբյանն ու ավելացրեց, որ երկրի զարգացմանը նպաստելու համար, հասկացել են, անհրաժեշտ է միավորում։

Նրա խոսքով, «Վերածնվող Հայաստան» կուսակցությունը հիմնելու նպատակն է նպաստել Հայաստանի զարգացմանն ու հզորացմանը։ Նախկին մարզպետը հիշեցրեց, որ կուսակցության կորիզը Սյունիքի համայնքապետերն են, մարդիկ, ովքեր պատերազմը սկսելուց, առաջ, դրա ընթացքում ու նաև հետո արել են, անում են ամեն ինչ Սյունիքի, Արցախի անվտանգության համար։

«Մենք հրապարակ ենք գալիս ոչ միայն Սյունիքի, այլև ողջ Հայաստանի վերածննդի ու հզորացման նպատակով։ Մենք հասկանում ենք, որ Հայաստանը պատած աղետի ծավալներն այնպիսին են, որ որևէ ուժ չի կարող միայնակ դուրս բերել երկիրն այս իրավիճակից, մենք գիտակցում ենք, որ անհրաժեշտ է քաղաքական առողջ ուժերի միավորում՝ ի շահ Հայաստանի, այդ պատճառով մենք որոշեցինք հանդես գալ դաշինքով»,-նշեց Վահե Հակոբյանն ու ավելացրեց, որ դաշինք կազմելու վերաբերյալ որոշմանը նախորդել են երկար քննարկումներ ու վերլուծություններ։

«Հայաստան» դաշինքի մաս կազմող «Վերածնվող Հայաստան» կուսակցության ղեկավարն ասաց՝ հավատում են դաշինքի մտքին, կամքին, վճռականությանը, հավատարիմ են  իրենց միավորման գաղափարներին ու իրագործմանը։

«Մենք հավատում ենք ուժեղ ու վերածնվող Հայաստանին։ Մեզ միավորում է մեր երկիրը հզոր, ժամանակակից և բարեկեցիկ դարձնելու տեսլականը։ Գործող իշխանությունը խոչընդոտ է այդ ճանապարհին, և մենք այդ խոչընդոտը վերացնելու ենք։ Այս խնդիրը լուծելուց հետո մեզ սպասում է լայնածավալ աշխատանք երկիրն այս անդունդից դուրս բերելու ու զարգացման ռելսերի վրա դնելու համար։ Մենք վստահ ենք ու վճռական, քանի որ ունենք երկրի զարգացման իրական գաղափարներ, դրանց վրա հիմնված ծրագրեր, և ամենակարևորը, դրանք իրականացնելու ունակ և պրոֆեսիոնալ թիմ»,-ասաց Հակոբյանը՝ ավելացնելով, իրենք գալիս են բերելու նոր հաղթանակներ, որոնք կապահովեն Հայաստանի ու Արցախի վերածնունդը։