Ձեր վստահելի աղբյուրը

«Ամեն մարդ յուրովի է մեկնաբանում նշանակալի ամսաթվերը: Ինձ համար մայիսի 9-ը, առաջին հերթին, Ցեղասպանությունից հետո մեր ազգի առաջին հաղթանակի օրն է: 30 տարի անց մենք, բուժելով վերքերը, զարգացնելով մկանները, դարձել ենք այն ուժի մի մասը, որը վերջ է դրել բացարձակ չարիքին»,- Թելեգրամ ալիքում գրել է Սուրբ Աթոռում ՀՀ նախկին դեսպան Միքայել Մինասյանը։

Նա նշել է, որ  600 հազար հայ, որոնք մասնակցել են Հայրենական մեծ պատերազմին, կիսել են ընդհանուր հաղթանակի ուրախությունը և ապացուցել են, որ մեր ազգը վաստակել է ապագա ունենալու իրավունքը:

«1992 թվականի մայիսի 9-ը բոլորովին այլ կարգի տոն է: Եթե 1945 թվականին մենք հաղթել ենք լինելով հսկայական ամբողջության մի մասը, ապա 1992 թվականին միայնակ ենք հաղթել՝ ի հեճուկս բոլորին:

1992 թվականին մենք վերականգնեցինք պատմական արդարությունը, որը ոտնատակ էր արվել 20-րդ դարի ողջ ընթացքում՝ մաքրելով մեր վրայից զոհի խարանը: Երկար ժամանակ անց առաջին անգամ մենք վերականգնեցինք մեր իրավունքները՝ վերականգնելով վերահսկողությունը Շուշիի նկատմամբ և հնարավորություն տալով հայերին ապրել և արարել Արցախում:

Մենք ազատագրեցինք Շուշին մեր ուժերով՝ առանց որևէ մեկի օգնության: Եվ ինքներս կորցրինք Շուշին՝ առանց որևէ մեկի օգնության: Հաղթանակի խորհրդանիշը վերածվել է դավաճանության խորհրդանիշի:

Շուշիի անկումը նիկոլիզմի էությունն է, անգրագիտության, վրեժխնդրության հանցավոր անփութության և դավաճանության աստվածացում՝ միախառնված կախարդական ստով:

Ես երել հայտարարել եմ ԱնտիՆիկոլ շարժման մեկնարկի մասին՝ մեզանից գողացված Հաղթանակի օրվա նախօրեի: Մեր գործողությունների մասին դուք կիմանաք վաղը:

Իսկ այսօր ցանկանում եմ ևս մեկ անգամ ընդգծել՝ ԱնտիՆիկոլ շարժումը պայքար չէ հանուն իշխանության: Ինձ, ենթադրում եմ՝ նաև դրա կողմնակիցներից շատերին, իշխանությունը չի հետաքրքրում: Դրա նպատակն է անել առաջին քայլերն ազգի պատվի և արժանապատվության վերականգման ճանապարհին, դրա նպատակն է պատմական արդարության և ազգային արժեքների վերականգնումը, այն, ինչից մեզ մեթոդաբանորեն զրկել են երեք տարի»,- գրել է Միքայել Մինասյանը: