Ձեր վստահելի աղբյուրը

«Այսօրվա իշխանությունները 2018-ից հետո բոլոր արժեքները հավասարեցրին գետնին, ոչնչացրեցին։ Պլուս դրան, այն բոլոր թերությունները, որոնք գոյություն ունեին, ավելի մեծացան անգրագետ ղեկավարման պատճառով, մանրախնդիր լինելու պատճառով»,- «Հայաստան» դաշինքի հանրահավաքից հետո լրագրողների հետ զրույցում ասաց  պաշտպանության նախկին նախարար Սեյրան Օհանյանը:

Նա նշեց, որ երկրի ղեկավարումը պետք է լինի միայն մեծահոգի, փորձառու մարդկանց ձեռքերում:

«Հիմա այս դաշինքը փորձառու անձանց հետ միասին գալիս է նորից հին մեր արժեքները վերականգնելու և ավելացնելու, և իրենց իսկ հին թերությունները նվազեցնելու, հավասարեցնելու զրոյի՝ հանուն մեր ժողովրդի անվտանգության, սոցիալ-տնտեսական զարգացման և միասնականության»,- ասաց նա:

Հարցին՝ Շուշին ու Հադրութը ո՞նց է հնարավոր հետ բերել, Սեյրան Օհանյանը պատասխանեց. «Ցանկացած գործողություն իրականացնելու համար պետք է սթափ  գնահատել ստեղծված ռազմաքաղաքական իրադրությունը: Միայն դրա գնահատմամբ, հակառակորդների հնարավորությունների գնահատմամբ և նաև մեր հնարավորությունների գնահատմամբ, մեր հավաքական կամքի բազմապատկմամբ, ընդ որում ոչ միայն անվտանգության համակարգում, այլ նաև լիարժեք արտաքին ներգրավվածություն ապահովող արտաքին, միջազգային հարաբերություններով, մենք կարող ենք որոշել և Հայաստանի, և  Արցախի, և Շուշիի ապագան»:

Խոսելով Սյունիքի անվտանգության մասին, պաշտպանության նախկին նախարարն ասաց. «Եթե կան սահմաններ հարևան պետությունների հետ, այնտեղ անվտանգության գոտի չի լինում, լինում է սահմանապահ զորք, սահմանային ծառայությունն իրականացնելու համար կահավորված համապատասխան ատրիբուտներ, նաև պատրաստ բանակ: Անվտանգության գոտին այսօր ապահովելու հնարավորությունը, կարծեմ, մենք կորցրել ենք, որովհետև առանց դելիմիտացիայի և  դեմարկացիայի, այսինքն սահմանազատումն իրականացրել ենք առանց պետական կամ միջազգային առումով գոյություն ունեցող ընթացակարգերի:

Չեն եղել պայմաններ, չի եղել խաղաղության կամ այլ պայմանագիր հակառակորդի հետ, բայց մեր զինված ուժերը մեր երկրի կարգադրությամբ թողել են ռազմավարական այն բոլոր կետերը, ռազմավարական նշանակություն ունեցող ճանապարհներ, որոնք այսօր գտնվում են Ադրբեջանի վերահսկողության տակ՝ առանց հասկանալու, որ եթե հետագայում գնանք իրական սահմանազատման, եթե պետք լինի հակառակորդին ասելու, որ պետք է հետ քաշվեք, շատ դժվար է լինելու: Մենք նշված խնդիրը կատարել ենք առանց որևէ հիմքի, առանց որևէ քարտեզի: Այսօր որևէ մեկը չի կարող ասել, թե ինչպիսի սահմանային իրավիճակ, ինչպիսի պետական ճանաչված քարտեզ գոյություն ունի Հայաստանի և Ադրբեջանի միջև:

Անփորձ մարդիկ չեն հասկանում, որ յուրաքանչյուր քայլ կատարելու, յուրաքանչյուր սանտիմետրի, յուրաքանչյուր բանակցային կետի համար տարիներով, ամիսներով, կիսամյակներով պետք է բանակցել, քո տեսակետը առաջ տանել: Սրանք այն անփորձներն են, որ առանց  մտածելու ասում են՝ դե հետ քաշվեք: Հիմա մենք ինչքա՞ն պետք է հետ քաշվենք:

Իրենք պարտադրաբար, թե ինքնակամ պետք է իրենց տեղը զիջեն փորձառու իշխանություններին, որոնք կգան և փորձառու կերպով կբանակցեն  մեր ապագայի համար: Գլուխը կախ մարդը, պարտված անձնավորությունը նույնիսկ ինքը չի հասկանում, որ պարտված ղեկավարությունն անընդհատ երկիրը տանելու է պարտությունների: Դա երևում է ամեն օր»,-ասաց նա:

Սեյրան Օհանյանը կարծում է՝ ընտրություններում հաղթանակ կլինի, կգան ուժեր, որոնք փորձառու են, երկիրը կտանեն զարգացման, երկրի ապագան, իրոք, կլինի շատ ավելի լավ։

Հարցին, թե ցուցակում ո՞ր համարն եք լինելու, նա պատասախանեց, որ իր համար մեկ է, պայքարում է Հայաստանի Հանրապետության համար։

Խոսելով Արցախի կարգավիճակի մասին, Ս. Օհանյանն ասաց, որ Արցախի կարգավիճակի հարցը լուծելու համար պետք է նորից գործի դնել այն ամբողջ մեխանիզմը, որը գոյություն է ունեցել բանակցային առումով, և ամբողջությամբ պետք է գործի դնել ջանքերն անվտանգային համակարգի ձևավորման ողջ գործընթացը վերականգնելու ուղղությամբ:

«Միայն դրանից հետո կարող ենք ասել, որ կարող ենք Արցախի հարցը համապատասխան ընթացք տալ լուծելու համար: Իսկ մեր ցանկությունը Արցախի անկախությունն է, իսկ հեռանկարի առումով միացումը մայր Հայաստանին»,-ասաց նա:

Հարցին՝ 29 տարվա մեջ առաջին անգամ մայիսի 9-ն անցկացնում ենք առանց Շուշիի, ձեզ ի՞նչ չափով եք մեղավոր համարում, որ կորցրել ենք Շուշին, Սեյրան Օհանյանը պատասխանեց. «Պետական, ռազմական կառավարման համակարգում կարող են դերակատարում ունենալ այն անձինք, որոնք պետական և ռազմական պաշտոնների են նշանակված, ովքեր ունեն ռազմական գործողություններ ղեկավարելու լծակներ: Այսինքն հրամանատարը պետք է ունենա շտաբ, իր զորատեսակներով, իմանա դրանց վիճակը, կարողությունները, հնարավորությունները:

Ես 4 տարուց ավելի է պաշտպանության նախարար չեմ: Ես, ինչպես շատերը, կամավոր կերպով 59 տարեկանում մեկնել եմ Արցախ, ինչով կարողացել եմ Արցախի նախագահին աջակցել եմ: Տարբեր վայրերում եմ եղել, նաև Շուշիում աշխարհազորի ձևավորմանը որոշակի աջակցություն եմ ցուցաբերել: Լիարժեք կառավարում իրականացնողը միայն գործող ռազմական գործիչներն են: Ես այնտեղ որևէ հնարավորություն չեմ ունեցել, բացի, իհարկե, ոգի ու խորհուրդ տալուց, աջակցելուց,»,-ասաց Սեյրան Օհանյանը: