Ձեր վստահելի աղբյուրը

Արևելյան Վրաստանի մի քանի շրջաններ պայքարում են աղետի հետևանքների դեմ։ Հորդառատ անձրևները ջրհեղեղի պատճառ են դարձել, իսկ կարկուտի պատճառով տասնյակ գյուղացիներ մնացել են առանց բերքի: Այս մասին գրում է jnews-ը։

Երեկ կարկուտ է տեղացել Թեթրիծկղարոյի մունիցիպալիտետում (Քվեմո Քարթլիի շրջան): Վնաս է հասցվել գյուղտնտեսական կուլտուրաներին՝ Ձիրագա, Ալեքսեևկա, Չիվչավի, Մեծևանի, Չխվիկղվթա, Ջորջիաշվիլի, Ասուրեթի գյուղերում և Թեթրիծկղարո շրջկենտրոնում:

Ըստ Թեթրիծկղարոյի շրջանի ներկայացուցիչ Գիորգի Քորիձեի, հատուկ հանձնաժողովը կսկսի գնահատել վնասի չափը:

Ռուսթավի քաղաքի մի քանի կենտրոնական փողոցներ հեղեղվել են հորդառատ անձրևի պատճառով:

Կախեթիում փոթորկից տուժել են Ախմետայի և Սագարեջոյի մունիցիպալիտետները: Տեղեկություններ կան մայրուղիներում տեղաշարժի հետ կապված խնդիրների մասին։ Ճանապարհահատվածներն արգելափակվել են արմատախիլ եղած ծառերի կողմից:

Ախմետայի շրջանում կարկուտը տևել է շուրջ 20 րոպե՝ ծեծելով խաղողի այգիներն ու հացահատիկային մշակաբույսերը: Տուժել են Ագրոխի, Մաղրաանի և Փիչխովանի գյուղերը:

Հորդառատ անձրևները խնդիրներ են ստեղծել նաև Գորիի մունիցիպալիտետում (Շիդա Քարթլիի շրջան) գտնվող Աթենի կիրճի բնակիչների համար: Հորդառատ անձրևն առաջացրել է սողանքներ և սելավներ, որոնք փակել են ճանապարհները: Այս պահին մաքրման աշխատանքներ են տարվում: Խոստանում են այսօր վերականգնել տրանսպորտային միջոցների երթևեկը:

Ըստ օդերևութաբանների կանխատեսումների, վատ եղանակը Վրաստանի տարածքում կտևի մինչև մայիսի 11-ը: