Ձեր վստահելի աղբյուրը

Վերջին օրերին Երուսաղեմում իսրայելցի զինվորների իրականացրած հարձակումների հետևանքով վիրավորվել է առնվազն 29 պաղեստինցի երեխա, միաժամանակ ձերբակալվել է 8 պաղեստինցի երեխա: Այս մասին ասվում է ՅՈՒՆԻՍԵՖ-ի Մերձավոր Արևելքի և Հյուսիսային Աֆրիկայի հարցերով տարածաշրջանային տնօրեն Թեդ Չայբանի և Պաղեստինի պետությունում ՅՈՒՆԻՍԵՖ-ի հատուկ ներկայացուցիչ Լյուսիա Էլմիի հայտարարության մեջ։

«Տուժածների մեջ մեկ տարեկան մանկահասակ երեխա է եղել: Որոշ երեխաներ գլխի և ողնաշարի վնասվածքներով հիվանդանոցներ են տեղափոխվել բուժման»,- ասվում է հայտարարության մեջ։

Նշվում է, որ տարածքում 300 մարդ է վիրավորվել, ՅՈՒՆԻՍԵՖ-ը հաղորդումներ է ստացել այն մասին, որ շտապօգնության մեքենաներին սահմանափակում են ժամանել դեպքի վայր, տուժածներին օգնել և դուրս բերել։

«Բոլոր երեխաները պետք է պաշտպանված լինեն բռնությունից։ Պետք է պահպանվեն ընտանիքների՝ բոլոր երկրպագության վայրեր մուտք գործելու իրավունքները, և նրանց տուժածներին պետք է օգնություն ցուցաբերվի առանց սահմանափակումների:

ՅՈՒՆԻՍԵՖ-ը Իսրայելի իշխանություններին հորդորում է զերծ մնալ երեխաների նկատմամբ բռնություն գործադրելուց և ազատ արձակել բերման ենթարկված բոլոր երեխաներին:

Միևնույն ժամանակ, Գազայի հատվածում, Հորդանան գետի Արևմտյան ափի և Իսրայելի հարավային մասերում, հատկապես վերջին 24 ժամվա ընթացքում բռնության վերսկսումը մտահոգիչ է:

Մենք կոչ ենք անում ներգրավված բոլոր կողմերին, որտեղ էլ որ լինեն, կանխել հետագա սրացումը և պաշտպանել բոլոր խաղաղ բնակիչներին, հատկապես երեխաներին»,- ասվում է հայտարարության մեջ։

Նշենք, որ շաբաթ օրը Երուսաղեմում սկսվեել են նոր բախումներ պաղեստինցիների և իսրայելական ոստիկանության միջև, կան տասնյակ վիրավորներ: Բախումները սկսվել են Իսրայելի կողմից պաղեստինցիների վտարման ու հրեաների վերաբնակեցման ֆոնին։

Ինչպես գրում է BBC-ն, Իսրայելը գրավել է Արևելյան Երուսաղեմը 1967 թ. Մերձավոր Արևելքի պատերազմից ի վեր և ամբողջ քաղաքն իր մայրաքաղաքն է համարում, չնայած դա չի ճանաչվում միջազգային հանրության ճնշող մեծամասնության կողմից:

Պաղեստինցիները պնդում են, որ Արևելյան Երուսաղեմը պետք է լինի անկախ պետության ապագա մայրաքաղաք:

Լարվածությունն աճում է Արևելյան Երուսաղեմի Շեյխ Ջարահ շրջանում պաղեստինյան ընտանիքների վտանգված վտարման պատճառով:

ՄԱԿ-ն ասում է, որ Իսրայելը պետք է չեղյալ հայտարարի ցանկացած վտարում և ցուցարարների նկատմամբ «առավելագույն զսպվածություն ցուցաբերի ուժի գործադրման մեջ»:

Արաբական պետությունների լիգան միջազգային հանրությանը կոչ է արել միջամտել՝ կանխելու համար հարկադիր վտարումները: