Ձեր վստահելի աղբյուրը

«Ցավում եմ, որ որոշ հարցադրումներ այդպես էլ  հնարավորություն չունեցանք բարձրաձայնելու, որովհետև նախարարն անընդհատ հիմնավորում էր, որ շտապում է, գործընկերների հարցերին էլ բավական ընդլայնված էր պատասխանում՝ փաստացի դրանով սահմանափակելով հարցերի քանակը»,- ԵՊՀ-ում ԿԳՄՍ նախարարի պաշտոնակատար Վահրամ Դումանյանի հետ հանդիպումից հետո լրագրողներին ասաց ԵՊՀ կառավարման և գործարարության ամբիոնի վարիչ Կառլեն Խաչատրյանը։

Նրա խոսքով, հանդիպումն ընդհանուր առմամբ ողջունելի է:

«Հանդիպումն էլ ավելի խորացրեց մեր մտահոգությունը, որ այս ամբողջ պրոցեսը կազմակերպված է, ուղղորդված  մեկ կենտրոնից, նպատակն է բուհերի կառավարման  բարձրագույն մարմինը՝ հոգաբարձուների խորհուրդը, լիարժեք վերահսկողության տակ վերցնել»,- ասաց Կ. Խաչատրյանը։

Նա նշեց, որ հարցի հնարավորություն չի ունեցել ու բարձրաձայնեց իր մտահոգությունը.

«Նախարարն իր խոսքում նշեց, որ 32 հոգանոց խորհրդում 16 պատվարժան, փորձառու մարդ դժվար է  գտնել, որ կառավարությունն ու նախարարությունը համատեղ նշանակեն։ Բայց փաստացի կառավարության որոշման փոփոխությամբ 20-ից 13-ին ենք իրենք նշանակելու, այսինքն 16-ի փոխարեն 13 մարդ են նշանակելու, հետևաբար այստեղ նախարարն այդքան էլ անկեղծ չէ։ Խնդիրը ոչ թե պրոֆեսիոնալ մարդկանց նշանակման հարցն է, այլ լիարժեք վերահսկելի, կենտրոնից տրված հրահանգներ կատարող մարդկանց խնդիր կա։

Մեծ հաշվով, ամեն կերպ փորձ է արվում ուղղաձիգ կառավարման մոդելը փաթաթել բուհերի, տվյալ դեպքում մայր բուհի վզին ու մեծ հաշվով,  եթե մենք խորը նայենք գործընթացներին, նախարարն էլ այսօր մի քանի  անգամ անուղղակի փաստեց դա՝ մատնանշելով հունվարի 29-ի հոգաբարձուների խորհրդի նիստը, որտեղ իշխանության համար նախընտրելի թեկնածուն չընտրվեց հոգաբարձուների խորհրդի նախագահ, նշեց, որ այդ նիստը վերջին կաթիլն էր։ Կրկին անուղղակի փասեց, որ իրենք չկարողացան հոգաբարձուների խորհրդի նախագահ կարգել, հետևաբար գնացին դեստրուկտիվ ճանապարհով՝ պարալիզացնելով խորհրդի աշխատանքը»,- ասաց նա։

Կ. Խաչատրյանի խոսքով, արհեստական ձգձգումներից բուհն է տուժում, բազմաթիվ խնդիրներ են մնում չլուծված, հոգաբարձուների խորհուրդը մատնվում է անգործության։

ԵՊՀ արհեստակցական կազմակերպության նախագահ Արմեն Ավետիսյանի խոսքով, նախարարի պաշտոնակատարի հետ հանդիումից հետո հարցերն ավելի շատացան, համալսարանական ճգնաժամը բացարձակ չհաղթահարվեց։

«Նախարարն ինքնախոստովանական ցուցմունք տվեց, ասաց, որ խորհրդակցել են, որ հոգաբարձուների խորհրդի իշխանական թևի ներկայացուցիչները հրաժարական տան,  ու ինչի համար՝ մթնոլորտը տհաճ է եղել, դրա համար ցրում ենք։

Հիմա ԵՊՀ հոգաբարձուների խորհուրդը կառավարվում է և պետք է կառավարվի հանուն համալասրանի՞, թե՞  հանուն ԵՊՀ հոգաբարձուների խորհրդի իշխանական անդամների քիմքին հաճո։ Այսինքն իրենց հաճելի կլինի այն խորհրդի նիստերը, որտեղ համալսարանականները ձայն չեն հանի, ում կուզեն հոգաբարձուների  խորհրդի նախագահ կընտրեն, ում կուզեն, ռեկտոր կնշանակեն, ինչ կուզեն, կանեն։ Նման ձևով ԵՊՀ, էլի եմ ուզում հիասթափեցնել այս իշխանություններին, չի լինելու։ Ում ուզում են, բերեն՝ ԵՊՀ-ն իր դիրքորոշումը պետք է հայտնի»,- ասաց Ա. Ավետիսյանը։ 

Ըստ նրա, իշխանություններն անթաքույց են իրենց ցանկությունների մեջ, անկեղծ են և ասում են՝ այնքան ժամանակ հոգաբարձուների խորհուրդը կլուծարեն, կձևավորեն, էլի կլուծարեն ու կձևավորեն, մինչև իրենց ուզած մարդը դառնա ԵՊՀ հոգաբարձուների խորհրդի նախագահ, ԵՊՀ ռեկտոր։

«Այսինքն անելու են ամեն ինչ, իրենց դիվային ցանկությանը հասնելու համար՝ ԵՊՀ պետք է դառնա իշխանության կամակատարը։ Վստահեցնում եմ որպես ԵՊՀ դասախոս, գիտական խորհրդի անդամ՝ ԵՊՀ-ում կան բավականաչափ սկզբունքային դասախոսներ, պրոցեսներ, աշխատողներ, ուսանողներ, որ թույլ չտան իշխանություններին իրենց  դիվային ցանությունը  իրականացնելու համար»,- ասաց նա։ 

Ա.Ավետիսյանի խոսքով, այս իշխանությունը 2,5-3 տարի անընդմեջ տանում է ճգնաժամի խորացման. «Նպատակն է՝ վերջում հասցնեն այնպիսի իրավիճակի, որ ասեն՝ տեսեք, չկարողացանք ոչ մի բան անել, ուզենք- չուզենք ձեր  գլխին պետք է բերենք, ռեկտոր կարգենք։ Չի լինելու։ Այդ ոսկորն իրենց կոկորդին է մնալու։ ԵՊՀ նման բան թույլ չի տալու, դա կլինի իրենց համար անհասանելի երազանք»։