Ձեր վստահելի աղբյուրը

«Ծնողներն ակնկալում են որոշակի վերաբերմունք պատերազմն անցած և ներկայում ծառայող զինծառայողների նկատմամբ, և այդ հարցն ավելի զգայուն դարձավ համաներման օրնքի ընդունումից հետո»,-ԱԺ հատուկ նիստում հայտարարեց «Իմ քայլը» խմբակցությունը լքած պատգամավոր Սոֆյա  Հովսեփյանը:

Պատգամավորը, հիշեցնելով որ Փաշինյանը հանդիպել  է ծնողների հետ, հետաքրքրվեց, թե կան արդյոք խնդրի լուծման ընթացքի վերաբերյալ նոր տվյալներ:

Փաշինյանը նկատեց, որ ազգային անվտանգության հետ առնչություն ունեցող թեմաները հրապարակային՝ բոլոր նրբություններով բաց քննարկելն ամենալավ գաղափարը չէ:

«Հասկացանք թափանցիկություն՝ քիչ է մնում մեր զինանոցները բացենք, ասենք՝ մենք այսքան արկ ունենք, մինչդեռ կարծում էինք, որ պետք է ունենայինք 4 հատ ավել»,-հայտարարեց Փաշինյանը:

Նա կրկին հավաստիացրեց, որ աշխատում է ծնողների հետ, բայց և կոչ արեց, որ ազգային անվտանգության հարցերը հրապարակային չդարձնեն:

«Նման քննարկումներով ստեղծվում են սպառնալիքներ այն անձանց համար, ում օգնելու համար էլ ծավալվում են դրանք, և որը դարձել է պրակտիկա որոշակի խմբերի համար»,- հայտարարեց Փաշինյանը::

Սոֆյա Հովսեփյանը նշեց, որ հարցը այնպիսին էր, որ պատասխանն առհասարակ ազգային անվտանգության հետ կապ չուներ, իսկ ինքը լավ հասկանում է անվտանգային հարցերը և անձամբ է մշտապես կոչ է արել զգուշավոր մոտեցում ցուցաբերել:

«Իմ հարցն այնպես էր ձևավկերպված որ շատ հանգիստ կարելի էր պատասխանել, օրինակ, ասելով՝ քննարկվում է, և եթե ընթացք լինի կտեղեկացնենք ծնողներին»,- արձագանքեց Հովսեփյանը: