Ձեր վստահելի աղբյուրը

«Այսուհետև մենք մշտապես խոսելու ենք իշխանության ասածներից, նրանց բոլոր խոսքերը հնարավորության սահմաններում մենք օգտագործելու ենք, դա մեր գործն է. և իրենք պետք է հաշվետվություն տան, թե ինչ են արել»,- այսօր հրավիրված մամուլի ասուլիսի ընթացքում ասաց «Հայրենիք» կուսակցության քաղաքական խորհրդի անդամ Արա Սահակյանը։

Նրա խոսքով, այս պահին բոլորի հարցերը պետք է ուղղված լինեն իշխանությանը, հենց իշխանականները պետք է բացատրեն՝ իրենց բոլոր հայտարարությունները, պետք է հաշվետու լինեն։ Բանախոսը նկատեց՝ երեկ իշխանությունն ու նրա առաջնորդը խամրած ու հուսահատ տեսք ունեին. չկար էնտուզիազմ, ինչը նշանակում է, որ նրանց մեջ ինչ-որ չափով մարդկայինը պահպանվել է։

«Այսպիսի պարտությունից հետո անառակություն կլիներ լինել ցինիկ, շատ ինքնավստահ ու չզգալ պատասխանատվության բեռը։ Ես տեսա պատգամավորների, որոնք հուսահատ տեսք ունեին։ Երեկ հրաժեշտի նիստ-ցերեկույթ էր՝ այս իշխանության «վերջին զանգը»։ Ու մենք արդեն պետք է առաջ նայենք»,- նշեց նա։

Միևնույն ժամանակ, Արա Սահակյանը կարծիք հայտնեց, որ հենց այս իշխանությունն է ծնկաչոք խնդրել արտահերթ ընտրություններ անցկացնելու մասին, քանի որ հասկացել է՝ այլևս լեգիտիմություն չունի։

«Հարգելի՛ իշխանություն, եթե երեկվա ձեր ասածները իրականություն լինեին, ապա իմացեք, որ դուք կոպտագույն սխալ եք արել՝ գնալով արտահերթ ընտրությունների։ Այստեղ էլ են կեղծում։ Մի ձեռքով հրաժարական են տալիս, մյուս ձեռքով ասում են, թե մենք աննախադեպ հաջողություններ ենք ունեցել։ Դե հիմա այս երկու պնդումները եկեք հաշտեցնենք իրար հետ»,- ասաց նա։

Բացի այդ, Արա Սահակյանը նշեց, որ երեկվա ստերից ինքն այլ՝ մեկ ուրիշ տպավորություն էլ է ստացել. «Ամեն անգամ սուտ լսելիս մարդ ավելի է փիլիսոփա դառնում։ Ես ամեն ստից նոր բան եմ սովորում։ Ամբողջ օրվա ընթացքում խոսեցին ամեն ինչից՝ բացի Արցախի հարցից ու պատերազմից։ Այս կարգի կեղծի՞ք։ Իսկ մենք ձեզ ասում էինք, որ պետք է հրաժարական տաք, քանի որ վատ էիք ասֆալտապատո՞ւմ ճանապարհը։ Ամենևին։ Մենք քաղաքական խնդիր ենք դրել ձեր առաջ՝ ասելով՝ օր առաջ հեռացեք»։

Մինչդեռ, ըստ քաղաքական գործչի, իշխանությունն այնպես էր դիրքավորվել, կարծես՝ իրեն տնտեսական կոլապսի համար են մեղադրում, կամ ինֆլյացիայի մեջ։ Նա նշեց, որ տնտեսությունը միշտ էլ զարգանում է՝ երբեմն արագ, երբեմն էլ՝ դանդաղ։

«Մենք ձեզ մեղադրում ենք կորստաբեր պատերազմի համար, մենք ձեզ մեղադրում ենք Ղարաբաղը տանուլ տալու, Հայստանի ինքնիշխանությունը վաճառքի հանելու և անհեռատես արտաքին քաղաքականության համար։ Մեկ շաբաթից լրանալու է սրանց խոստացած 6-ամսյա ճանապարհային քարտեզի ժամկետը, որի 6-րդ կետը վերաբերում էր բանակցությունները վերականգնելուն, 1-ին կետով խոստանում էին գերիներին վերադարձնել։ Էդ ձեզ թվում է մենք էլ միամի՞տ ենք, չե՞նք հասկանում...։ Սուտը ստի վրա»,- ասաց նա։

Արա Սահակյանը կարծիք հայտնեց, որ հիմա պետք է լուսավորել ժողովրդին, իրականությունը ցույց տալ, ասել՝ ում ուզում եք, ընտրեք, բացի նրանցից։

«Ես այս արտահերթ ընտրությունները համարում եմ այս իշխանությունների՝ խաղաղ հեռանալու վերջին շանսը։ 1998-ի Լևոն Տեր-Պետրոսյանը հեռացավ խաղաղ, 2018-ին Սերժ Սագսյանը հեռացավ խաղաղ, և մինչև այսօր գնահատվում են այդ իրողությունները, սրանք էլ շանս ունեն գնալու։ Եվ երբ ասում են, թե սրանք հեշտ չեն գնա, պիտի հիշել՝ մոլլան էլ մզկիթ չէր գնում..., խելոք կգնան»,- նշեց նա։