Ձեր վստահելի աղբյուրը

«Հականիկոլական չէի անվանի այդ շարժումը: Շարժում, որը դեմ է այս ազգադավին, հայ ազատագրական շարժում է»,- ասուլիսում ասաց փաստաբան Տիգրան Աթանեսյանը:

Նրա խոսքով, քանի Փաշինյանը  ղեկավարում է  այս երկիրը, հայ լինելն ամոթ է:

«Մեզ ամբողջ աշխարհում ծաղրում են, լուրջ չեն վերաբերում, արժանապատիվ հաղթանակած ազգից վերածվել ենք Խաչատուր Աբովյանի «Վերք Հայաստանի» հայ ազգին, արագ վերադարձանք դրան: Միշտ էլ եղել են հայեր, որոնք սիրել են պարսիկերին, թուրքերին, հիմա այդ տեսակ հայը չի վերացել, սիրում է  Նիկոլին, դրա դեմ ոչինչ չենք կարող անել, բացի երկարատև ծրագրերից»,- նշեց փաստաբանը:

Տ.Աթանեսյանն ասաց, որ ամեն մեկն իր տեղում՝ իր խոսքով, գործով, մտքով,  պետք է պայքարի սրանց դեմ,  նոյեմբերի 9-ից հետո այլընտրանք չկա՝ «ուզում ես մնալ մարդ, քո երեխան քեզ հարգի, պետք է պայքարես ու օր առաջ այս տականքներից ազատվես»:

Նա նշեց, որ 880 հազար հայ գնացել ու ընտրել է տգետ, փնթի, անշնորհք, ապերախտ մարդու որպես իր առաջնորդ:

«Թե ով իրենց խաբեց, համոզեց, որ սա երկրի փրկությունն է, դնենք մի կողմ: Որպեսզի հասկանան, թե ինչ աղետ են գործել ընտրելով նրան, այդ ընտրողներից յուրաքանչյուրը պետք է խոստովանի, որ ինքն էլ է պատասխանատու հայրենիքի կորստի, մեր տղաների զոհվելու համար:

Շատ դժվար է, եկեք ընդունենք: Նրանցից շատերը, ովքեր դա  հասկացել ու ընդունել են, հիմա պարզապես լուռ են: Կա զանգված, որ երբեք դրա հետ չի հաշվի ու կմնա սրան պաշտպանող: Իրականում ոչ թե սրան են պաշտպանում, այլ իրենք իրենց են պաշտպանում, իրենց  արած հիմարությունն են պաշտպանում»,- ասաց Տ.Աթանեսյանը:

Նրա խոսքով, առաջինը նրանք պետք է դադարեն սատարել նրան, հասկանան, որ իրենք դառնում են ակամայից թուրք, այս փոքրիկ Հայաստանում դարձել են թուրքի 5-րդ շարասյուն:

«Ոչ մեկ դիտավորյալ այդ ընտրությունը չի արել, ենթագիտակցաբար դա արել է, այնքանով որ՝ «Սերժ Սարգսյանը չլինի, Խալիլ փաշան թող լինի»: Չի կարելի»,- ասաց նա:

Տ.Աթանեսյանի խոսքով, սարսափելին այն կլինի, որ 30-40 տոկոս ձայն ստանա այս իշխանությունն ընտրությունների ժամանակ, եթե այդպես լինի, ապա կունենանք այն, ինչ ունեցել ենք մեր պատմության վերջին 700 տարվա ընթացքում՝ խելացի, ազգասեր զանգվածը պարզապես գնալու է  այստեղից, մնալու է այն զանգվածը, որը յուրաքանչյուր տեր ընդունելու է, միայն մի շան լափ իր դեմը գցի:

«Հնարավորինս պետք է դուրս գալ այս վիճակից, այլապես իրոք կկործանվենք: Պետք է շատ արագ վերադարձնել առնվազն պարկեշտ ղեկավար»,- ասաց Տիգրան Աթանեսյանը:

Նրա խոսքով, հունիսի 20-ին կյանքը չի ավարտվելու, եթե հաջողվի երկիրն ազատագրել Նիկոլից, երկիրը կստանա երկրորդ կյանքի շանս: «Մենք հիմա բոլորս գերեզմանի մեջ ենք, կարող է կյանքը սկսվի հենց հունիսի 20-ից հետո: Ոչ ոք թող չմտածի՝ ով էլ գա իշխանության, երկնքից մանանա չի թափվելու: Սպասվելու է սարսափելի երկար տարիների աշխատանք վերականգնելու այն, ինչ կործանեց այս ազգադավ տականքը»,- ասաց Աթանեսյանը:Նրա խոսքով, Փաշինյանն ամեն ինչը սուտ է ասում. «Իմ 20 տարվա փաստաբանական կարիերայի ընթացքում շատ խարդախների եմ տեսել, որոնք կարողացել են  հարյուրավոր մարդկանց խաբել, սա գերազանցել է, միլիոնավոր մարդկանց է խաբել: Ինչ ասում է՝  մի հավատացեք, մի լսեք»: