Ձեր վստահելի աղբյուրը

Հայաստանում 2020 թվականին բնական հավելաճը կազմել է ընդամենը 1 077։ Սա վատագույն ցուցանիշն է, որ երբևէ ունեցել է Հայաստանը։ Պատճառը մահերի աննախադեպ մեծ թիվն է, որը հետևանք է կորոնավիրուսի համավարակի ու պատերազմի։ 

Անցած տարվա ընթացքում, ըստ պաշտոնական վիճակագրության, ծնվել է 36 448 մարդ, մահացել է 35 371 մարդ։

Համեմատության համար նշենք, որ 2019-ին բնական հավելաճը կազմել է 9 855 (36 041 ծնված, 26 186 մահացած), 2018-ին կազմել է 10 823 (36 574  ծնված, 25 751 մահացած)։

2017-ին բնական հավելաճը կազմել է 10 հազար 600 մարդ, 2016-ին՝ 12 հազար 400 մարդ, 2015-ին՝ 13 հազար 900 մարդ։ 

Չնայած մահացությունների ահռելի թվին, Հայաստանում մշտական բնակչության թիվն աճել է 4 400 հարյուրով։ 2019-ի տարեվերջի դրությամբ Հայաստանի մշտական բնակչությունը կազմել է 2 մլն 959 հազար 700 մարդ, 2020-ի տարեվերջին՝ 2 մլն 964 հազար 100 մարդ։

Վիճակագրական կոմիտեի հրապարակումներից տեղեկանում ենք, որ մշտական բնակչության թվի ավելացման գործում էական ազդեցություն է ունեցել միգրացիայի դրական մնացորդը՝  3 հազար 300 մարդ։ Բայց սա լավ օրից չէ։ Հիշեցնենք, որ կորոնավիրուսի համավարկով պայմանավորված խիստ սահմանափակումների հետևանքով հայաստանցիներն արտագնա աշխատանքի մեկնել չկարողացան։

Հիշենք, ողջ ամռան ընթացքում կառավարության շենքի դիմաց բողոքի ակցիաները, որի մասնակիցները պահանջում էին թույլ տալ իրենց Ռուսաստան մեկնել։ Նախորդ տարիներին միգրացիան ունեցել է բացասական մնացորդ, այսինքն՝ ավելի շատ մարդիկ երկրից մեկնել են, քան վերադարձել։ Համեմատության համար նշենք, որ 2018-ին մնացորդը եղել է  -18.2, իսկ 2019-ին՝ -15.4։

Կարելի է ասել, սահմանափակումներն օգնեցին հայաստանցիներին տանը պահել։ Սակայն դրանք արդեն մեղմացվել են, միգրացիայի բացասական մնացորդը վերականգնվել է։

«Զվարթնոց» օդանավակայանի հաստատած տեղեկությունների համաձայն, Հայաստանից օդային ճանապարհով մեկնողների թիվը 2021 թվականի 4 ամսում 76.677-ով ավելի է, քան ժամանածների թիվը: Հունվար-ապրիլ ամիսների ընթացքում Հայաստանից մեկնած քաղաքացիների թիվը կազմել է  240.891 մարդ, ժամանածներինը՝ 164.214 մարդ:

Հիշեցնենք, որ մարդահամարի արդյունքներով հաշվառվում է բնակչության երկու կատեգորիա`
մշտական բնակչություն և առկա բնակչություն:

Մշտական բնակչության թվաքանակում հաշվառվում են այն անձինք, ովքեր մշտապես
բնակվում են տվյալ տարածքում, ներառյալ մարդահամարի պահին ժամանակավոր
բացակայողները:

Ժամանակավոր բացակայողների թվաքանակում հաշվառվում են այն անձինք, ովքեր
մարդահամարի պահին իրենց հիմնական (մշտական) բնակության վայրից բացակայում են մինչև մեկ տարի ժամկետով:

Առկա բնակչության թվաքանակում հաշվառվում են այն անձինք, ովքեր մարդահամարի պահին գտնվել են տվյալ տարածքում, ներառյալ ժամանակավոր բնակվողները:

Ժամանակավոր բնակվողների թվաքանակում հաշվառվում են այն անձինք, ովքեր
մարդահամարի պահին չբնակվելով մշտապես` գտնվում են տվյալ տարածքում մինչև մեկ տարի ժամկետով: