Ձեր վստահելի աղբյուրը

«Իշխանասարը գտվում է Սյունիքի և Վայոց Ձորի մարզերի հատման կետում: Ադրբեջանցիները հասել են մինչև Վերիշեն, գրեթե Գորիսի բերանում են»,- ասուլիսում ասաց հասարակական-քաղաքական գործիչ Լիլիթ Թումանյան՝  խոսելով Սյունիքում տեղի ունեցող իրադարձությունների մասին:

Ըստ նրա, սա նշանակում է՝ մի քանի անգամ տարբեր հարթակներով ասված զգուշացումը, որ Ադրբեջանը չի բավարարվելու ձեռք բերածով, շարունակելու է վերցնել նորանոր տարածքներ, մի քանի անգամ արված նախազգուշացումը, որ  Նիկոլ Փաշինյանի հռչակած խաղաղությունը, որ այլևս պատերազմ չի լինելում, կեղծ է և սուտ, արդեն իրականություն է  դառնում:

«Պատահական չէ, որ Ադրբեջանը հենց հիմա է փորձում օգտվել իրավիճակից՝ հաշվի առնելով տարածաշրջանային լարվածությունը, Իսրայելի և Պաղեստինի միջև  հակամարտության սրումը:
Փորձագետները միշտ ասում էին՝ եթե տարածաշրջանում լինի լարվածություն, Ադրբեջանը միշտ փորձելու է դրանից օգտվել ու առաջ գնալ: Ինչպես հենց այսօր տեսնում ենք, թշնամին փորձում է առաջ գնալ: Այն թեզը, որ պատերազմ չի լինելու, հերքվեց»,- ասաց Լ. Թումանյանը:

Նա նշեց, որ այն հատվածում, որտեղ առաջ է եկել թշնամին, անցնում է հիմնական միջպետական ճանապարհ, մեր հենակետը հիմա շրջափակման մեջ է, որովհետև ճանապարհ են կտրել:

«Ռուս խաղաղապհներն արդեն հասել են այնտեղ, հիմա բանակցում են: Համոզվա՞ծ եք, որ ադրբեջանցիները  հետ կքաշվեն: Ես համոզված եմ՝ հետ չեն քաշվելու, իրենց սովորույթի մեջ չէ հետ քաշվել այն դիրքերից, որտեղ կանգնած են»,- ասաց Լ. Թումանյանը:

Նա նշեց, որ հիմա ռուս խաղաղապահների առաջնային  խնդիրն է կամ ստիպել նրանց հետ գնալ, կամ գոնե մեր տղաներին դուրս բերել այնտեղից:

«Մեր աչքի առաջ գերի են դառնում, սա էլ հո անհասկանալի օպերացիա չէ՞, որ հետո իմանանք»,- ասաց հասարակական-քաղաքական գործիչը:

Ըստ նրա, հետաքրքիր է, թե ինչ է անելու այս պահին զինվորականությունը, որը ժամանակին չարեց ճիշտ քայլեր, հիմա ի՞նչ է անելու 3-րդ բանակային կորպուսը,  եթե ՊՆ թույլ չի տալիս մտնել ռազմական գործողությունների մեջ, պետք է թողնեն մեր տղաները մնան շրջափակման մե՞ջ:

Նա հիշեցրեց նաև Գորիսի փոխքաղաքապետ Իրինա Յոլյանի գրառումը, ըստ որի՝ «թշնամին պետական սահմանը անցել է և ևս երեք կիլոմետր առաջ եկել դեպի Վերիշեն բնակավայր ու հարյուրներով շարված են» և ասաց.  «Սա ուղղակի առաջխաղացում չէ, ամբողջական զորքերով են առաջ եկել»:

Լիլիթ Թումանյանն ասաց, որ սա Հայաստանի սուվերեն տարածքն է և անշուշտ, արդեն ՀԱՊԿ իրավասությունների գոտին է, անհրաժեշտության դեպքում ՀԱԿՊ-ը կարող է միջամտել, բայց այն պարագայում, եթե ՀՀ-ն դիմի:

«Սա դրսևորումներից մեկն է միայն, որոնք էլի են լինելու, միշտ, քանի դեռ ունենք իշխանություն, որը որևէ կերպ չի դիմադրում, համաձայնվում է ամեն ինչին: Մենք միշտ ունենալու ենք նամանատիպ իրավիճակներ, առաջին հերթին արտացոլվելու է  Սյունիքում, բայց արդեն տեսնում ենք, որ եկել ու կանգնել են Վայոց Ձորի բերանին»,- ասաց Լիլիթ Թումանյանը:

Նա թվարկեց մի քանի սցենար, թե ինչի դրսևորում կարող է լինի Ադրբեջանի այս քայլը:

«Տարբեր փորձագետներ, քաղաքագետներ, քաղաքական գործիչներ  զգուշացրել են, որ եթե Փաշինյանը նախընտրական պայքարում զգա իր դիրքերը թուլացած, հնարավոր է  իրենց բանավոր կամ գաղտնի կերպով  բանակցություններից և պայմանավորվածություններից  մեկը լինի այն, որ ռազմական լարման, լարվածության բարձրացման միջոցով հնարավորություն տան Փաշինյանին  խուսափել արտահերթ ընտրություններից: Օրինակ, եթե իսկապես լինի ռազմական բախում, ՀԱՊԿ-ն իսկապես միջամտի, վերականգնվելու է  ռազմական դրություն,  արտահերթ ընտրությունները երկրորդ, երրորդ պլան են մղվելու, հետաձգվելու են:

Հնարավոր է կա պայմանավորվածություն, որ փոքրիկ հաղթանակ են ապահովում Փաշինյանի համար, նա կանգնում ու ասում է՝ հետ մղեցինք ու այդպես բարձրացնում նրա վարկանիշը: Չէ՞ որ հուլիսին ունեցել ենք նման բան, եղավ բախում, Փաշինյանը ներկայացրեց որպես իր հերոսական ձեռքբերում, դրանով իսկ բարձրացրեց սեփական վարկանիշը: Չենք կարող բացառել այս սեցենարը նաև:

Եվս մեկ սցենար, որը կապ չունի Փաշինյանի, նախընտրական պայքարի հետ, այլ կապ ունի տարածաշրջանային լարվածության հետ.  Ադրբեջանը փորձում է օգտվել իրավիճակից և առաջ գնալ:

Հնարավոր է ադրբեջանցիները փորձում են հասկանալ նաև իրենց կամիր գծերը ռուս խաղաղապահների հետ համագործակցության առումով, թե մինչև ուր կարող են հասնել, որ ռուսներն իրեն չկանգնեցնեն»,- մանրամասնեց Լ.Թումանյանը:

Ըստ նրա, մենք ունենք Նիկոլ Փաշինյանի կառավարման հերթական հետևանքը, որը կրում են շարքային զինվորականները, շարքային քաղաքացիները, առաջին հերթին սյունեցիները:

«Քանի դեռ Փաշինյանը իշխանության է, ոչ միայն տարածքներ կվերցնեն, կփորձեն հասնեն իրենց գագաթնակետին, որը միջպետական սահմանների  ճանաչումն է, միջազգային փաստաթուղթ ստորագրելն է: Թերևս սա է, որ ամենաշատն է  ցանկանում  ստանալ Ադրբեջանը Փաշինյանից: Կհասցնի՞ դա անել, չի՞ հասցնի, կկարողանա՞ դա անել ընտրություններից հետո: Պարզ է՝ պետք է ամեն կերպ օգնեն Փաշինյանին, որպեսզի հասնեն իրենց բաղձալի փաստաթղթի ստորագրմանը»,- ասաց Լիլիթ Թումանյանը: