Ձեր վստահելի աղբյուրը

«Անվտանգություն՝  անվտանգության դիմաց» ձևաչափը Մերձավոր Արևելքում արդեն  իրականություն  է: Այս մասին գրում է «Հայաստան-Իրան ռազմավարական համագործակցության զարգացման կենտրոնի» հիմնադիր Պույա Հոսեյնին։

«Պաղեստինցիները Իսրայելի դեմ էլ քարերով չեն կռվում, տարիների անհավասար պատերազմի  պատկերը Պաղեստինում՝ պաղեստինցիների և իսրայելցիների միջև, կտրուկ փոխվել է: Տարիներ  շարունակ Իսրայելի ամենաուժեղ բանակը ամենավերջին զինամթերքներով ճնշում էր համարյա  անզեն պաղեստինցիներին: Պաղեստինցիների տները, քաղաքները ռմբակոծվում էին Իսրայելի  կողմից: Կին, երեխա, ծեր, ընտանիք. ոչ մի բան հաշվի չէին առնում: Արցախի դեմ  սանձազերծված վերջին պատերազմի ընթացքում Իսրայելի զենքով և զինվորական  մասնագետներով զինված ադրբեջանական բանակը նույն ձևով ռմբակոծում էին Արցախի  քաղաքները, գյուղերը, խաղաղ բնակչությանը: Իսրայելի ռեժիմը պատերազմի ամբողջ  ընթացքում և դրանից հետո ևս շարունակում էր զինել ադրբեջանական բանակին:

Ահա հիմա իսրայելական քաղաքները պաղեստինցիների հարյուրավոր հրթիռների տակ են:  Այսօր արդեն ռմբակոծման թիրախ է դարձել նաև Թել-Ավիվը: 

Սրանից պետք է հետևություն անեն նաև այլ «պետությունները», որ հարևանի անվտանգությունը  խարխլում են, հարևան ժողովրդի վրա մատ են թափ տալիս, իրենց վերջին զենքերի վրա վստահ  են և հպարտ  են: 

Մերձավոր Արևելքում խաղի կանոնները փոխվել են: Ոչ Սաուդյան Արաբիա-ԱՄՆ դաշինքը, ոչ  նրանց դաշնակիցները ամենավերջին զենքով անգամ չեն կարող Եմենի ժողովրդին ինչ-որ բան  պարտադրել, ոչ էլ Իսրայելը կարող է կոտրել պաղեստինցիների և լիբանանցիների  դիմադրությունը: Մերձավոր Արևելքում խաղի կանոնները «Անվտանգություն՝ անվտանգության  դիմաց» ձևաչափով են դասավորվել:

Իրանը Մերձավոր Արևելքում խաղի այս կանոնների կրող և առաջնորդող ուժն է: Երբ որ գեներալ  Ղասեմ Սոլեյմանիի սպանությունից հետո Իրաքում գտնվող ամերիկական Ալ-Ասադ  ռազմաբազան ռմբակոծվեց Իրանի կողմից, և Թրամփ-Նաթանյահու դավադիր սադրանքին՝ Իրանի դեմ  պատերազմ սկսելուն ի պատասխան՝ Իրանը հայտարարեց, որ եթե Իրանին որևէհարված  հասցվի, ապա Հայֆա և Թել-Ավիվ քաղաքները ու տարածաշրջանում գտնվող բոլոր ամերիկական  ռազմաբազաները հողին կհավասարվեն, ապա դա մեկնարկ էր տարածաշրջանում խաղի նոր  կանոնների: 

«Անվտանգություն՝ անվտանգության դիմաց» ձևաչափը Մերձավոր Արևելքում արդեն   իրականություն է: Եթե պանթյուրքիզմի նկրտումներով առաջնորդվող և ցեղասպան  քաղաքականություն ունեցող պետությունները այս իրականությունից դասեր չքաղեն, ապա մի  օր էլ «Անվտանգություն՝ անվտանգության դիմաց» ձևաչափը և նոր խաղի կանոնները  իրականություն կդառնան նաև Հարավային Կովկասում: 

Տեղադրված տեսանյութերում Թել-Ավիվի բնակիչների կյանքի մի քանի վայրկյաններն են»։