Մեկ էլ՝ ալե հոպ, վկան նախկին ցուցմունքներին 180 աստիճան հակասող ցուցմունք է տալիս. Ամրամ Մակինյան
Երևանի Ավան և Նոր Նորք վարչական շրջանների ընդհանուր իրավասության դատարանում, դատավոր Վահե Միսակյանի նախագահությամբ, ՀՀ երրորդ նախագահ Սերժ Սարգսյանի և մյուսների գործով դատական նիստին Սարգսյանի պաշտպանները երկու միջնորդություն ներկայացրեցին՝ գործով ամբողջական նյութերը պաշտպանության կողմին տրամադրելու և Սերժ Սարգսյանի նկատմամբ ընտրված խափանման միջոցը՝ չհեռանալու մասին ստորագրությունը վերացնելու մասին։
Այսօր գործով մեղադրյալներից Բարսեղ Բեգլարյանի շահերի պաշտպան Նիկոլայ Հակոբյանը նույնպես միջնորդեց Բարսեղ Բեգլարյանի հանդեպ կիրառված՝ ստորագրությամբ երկրից չհեռանալու մասին խափանման միջոցը վերացնել։
Դատարանը հեռացել է խորհրդակցական սենյակ՝ որոշումներ կայացնելու:
Դատական նիստից հետո ՀՀ երրորդ նախագահ Սերժ Սարգսյանի պաշտպաններից Ամրամ Մակինյանը մանրամասն ներկայացված միջնորդությունները:
«Մենք երկու միջնորդություն ենք ներկայացրել: Առաջինը վերաբերում է քրեական գործի անջատված մասի նյութերը տրամադրելուն, քանի որ հիմնավորեցինք՝ այն գործը, որը ներկայացվել է դատարան, փաստաթղթերն առնվազն քննիչի կողմից ընտրանքային կարգով են կարված անջատված մասին: Մենք կոնկրետ մատնանշեցինք փաստաթղթեր, որոնք քրեական գործում չկան:
Դատախազն ասում է՝ մենք մեղադրող ապացույցները բերել ենք դատարան: Է, բա արդարացնող ապացույցները ո՞վ պետք է բերեր դատարան: Կամ ընդհանրապես դուք չեք որոշում՝ որն է մեղադրող, որն է արդարացնող»,- ասաց փաստաբանը:
Երկրորդ միջնորդությունը ՀՀ երրորդ նախագահի նկատմամբ ընտրված խափանման միջոցը վերացնելու մասին է, որի անհրաժեշտությունը, ըստ պաշտպանի, իրավմամբ չկա:
«Քննիչը երկու հիմք էր մատնանշել քրեական գործի քննության ընթացքում՝ թաքնվելու ռիսկ էր տեսել, իբրև թե պարոն նախագահը կարող էր թաքնվել: Բացի ծիծաղից իմ մոտ նաև զայրույթ է առաջանում: Հայաստանում կա՞ մի ողջամիտ մարդ, ով մտածում է, որ Հայաստանի երրորդ նախագահը կարող է թաքնվել վարույթ իրականացնող մարմնից: Ծաղր է ուղղակի: Դատարանում նշեցի, որ այս միջնորդությունը, բացի իրավական լինելուց, կոնկրետ ինձ համար, նաև բարոյական կողմ ունի, քանի որ չկա թաքնվելու ռիսկ:
Բացի այդ, այս ընթացքում նախագահը դատարանի թույլտվությամբ մեկնել է արտերկիր և վերադարձել է: Այսինքն, իրենց ներկայացրած վերացական ենթադրություններն անգամ չեզոքացվել են փաստերով»,- ասաց Ա. Մակինյանը:
Ինչ վերաբերում է վկաներին, նա նշեց, որ այս գործով կա մեկ մեղադրող ցուցմունք, տվել է գյուղատնտեսության նախկին նախարար Սերգո Կարապետյանը:
«Նա մահացել է: Եթե նախկինում կարող էր, թեկուզ վերացական, դիտարկվեր դատավարության մասնակցի վրա անօրինական ազդեցություն և այլն, հիմա չկա այդ հանգամանքը, նման ռիսկ չկա, քանի որ անձը մահացել է: Այսինքն, խափանման միջոց է կիրառվել առանց անհրաժեշտության»,- ասաց ՀՀ երրորդ նախագահի պաշտպանը:
Նա նշեց, որ եթե չի սխալվում, Սերգո Կարապետյանը երկու, միգուցե ավելի անգամ ցուցմունքներ է տվել և հաստատել է այն, որ ընդհանրապես այդ ծրագիրը իրականացել է ճիշտ, ծրագիրը «Ֆլեշ» ընկերությանը հանձնելը եղել է շատ ճիշտ, որը իրենք հիմա պնդում են:
«Մեկ էլ՝ ալե հոպ, մի օր Սերգո Կարապետյանը վարույթ իրականացնող մարմնին դիմում է գրում, թե ձեզ բան ունեմ ասելու: Քրեական գործը, որ կարդում ենք, դատավարական ոչ մի իրադարձություն տեղի չի ունենում, բայց նստում, մտածում է Կարապետյանը ու դիմում է գրում, նախկին ցուցմունքներին 180 աստիճան հակասող ցուցմունք է տալիս: Հարց չառաջացավ, թե ինչո՞ւ: Այդ հարցի պատասխանը գիտեմ: Դատարանում փաստերով կներկայացնեմ, թե ինչ իրադարձություններ են նախորդել, որ մարդը նստել-նստել, վեր է կացել, դիմում է գրել ու գնացել է այլ ցուցմունք տալու:
Այս քրեական գործում ընդհանրապես հանցագործության դեպք չկա, էլ ուր մնաց որևէ անձի արարքում հանցակազմ լինի»,- ասաց Ամրամ Մակինյանը:
Նա նաև նշեց, որ խափանման միջոց կիրառելը պարտադիր պայման չէ, քննիչի հայեցողությունն է և այդ հայեցողությունը կարող է կիրառվել միայն հիմքի և պայմանի առկայության դեպքում:
«Հիմքերն այդ ռիսկներն են, որոնք կարող են առաջանալ, այսինքն, թաքնվելու, խոչընդոտելու, նյութերը թաքցնելու ձևով: Բոլոր նյութերը կառավարության որոշումներ են, վարույթ իրականացնող մարմնի տրամադրության տակ են, միակ վկան մահացել է: Ի՞նչ խափանման միջոցի մասին է խոսքը: Այստեղ կապրիզներով չենք առաջնորդվում:
Ընդհանրապես, երկիրը պետք է գա իրավական հարթություն, չնայած երկիրը թավալգլոր արագությամբ գնում է դեպի բեսպրիդել»,- ասաց Ամրամ Մակինյանը:
Հարակից հրապարակումներ`
- Սերժ Սարգսյանի պաշտպանները միջնորդեցին վերացնել նրա նկատմամբ ընտրված խափանման միջոցը
- Գործ ունենք ծաղկաքաղ, ընտրանքային մեղադրանքի հետ. Սերժ Սարգսյանի պաշտպան
- Պաշտպանները միջնորդեցին կալանքից ազատել ՀՀ երրորդ նախագահ Սերժ Սարգսյանի գույքը
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
