Ձեր վստահելի աղբյուրը

ՀՀ երրորդ նախագահ Սերժ Սարգսյանի պաշտպան Ամրամ Մակինյանը տեղեկացրեց, որ կբողոքարկեն Երևանի Ավան և Նոր Նորք վարչական շրջանների ընդհանուր իրավասության դատարանի այսօրվա որոշումը, որով մերժվել է իրենց  միջնորդությունը՝  Սերժ Սարգսյանի նկատմամբ ընտրված խափանման միջոցը՝ չհեռանալու մասին ստորագրությունը վերացնելու մասին:

«Դատարանի որոշման հետ ունենք սկզբունքային անհամաձայնության, որովետև չի կարող լինել որևէ ողջամիտ մտահոգություն վարույթ իրականացնող մարմնի մոտ, նաև դատարանի, որ Հայաստանի երրորդ նախագահը կարող է կատարել մի արարք, որը խոչընդոտի գործի քննությանը: Գործի քննությանը խոչընդոտելու ռեալ բոլոր տեսական հնարավորություններն ու հավականությունը վերացած է ընդհանրապես»,- դատարանից դուրս գալուց հետո լրագրողների հետ զրույցում ասաց Ամրամ Մակինյանը:

Նա նշեց, որ դեռ չունի դատարանի պատճառաբանությունը, բայց ընդունելի չէ, քանի որ երկրի վրա ապրելու հնարավորություն չունի, այսինքն չի կարող նյութականանալ:

«Որոշումը ստանալուց հետո պարտադիր բողոքարկելու եմ, որովհետև այս որոշումը որոշակի առումով նաև պարոն նախագահի բարի համբավին է առնչվում, քանի որ դատարանի մոտ կասկածներ կան, որոնք չեն կարող լինել»,- ասաց փաստաբանը:

Ա. Մակինյանի համար նաև անհասկանալի է դատարանի մյուս որոշումը կապված կապված իրենց երկրորդ միջնորդության հետ՝ գործով ամբողջական նյութերը պաշտպանության կողմին տրամադրելու վերաբերյալ: Դատարանը որոշել է դրա լուծումը հետաձգել մինչև ապացույցների հետազոտման, վկաների հարցաքննության փուլը:

«Չհասկացա,  թե դատարանը ինչ հանգամանքներ պետք է պարզի գործի քննության ընթացքում, որ դրանից հետո հնարավոր լինի լուծել մեր միջնորդության ընթացքը: Մենք երեկ շատ հստակ ցույց տվեցինք, որ կան փաստաթղթեր, որոնք չկան գործում:

Հիշում եք՝ դատախազն ասել էր՝ մեղադրող փաստաթղթերը բերել են, համոզված ենք՝  արդարցողները պահել են, հստակ գիտենք էլի, թե Հայաստանում արդարադատությունն ոնց է իրակացավում, ինչ զանգեր, ինչ մեյլեր, ինչ խմբագրումներ: Աննա Վարդապետյանի մեյլերը ԱԱԾ-ն բարի լիներ բացեր, քրեական գործ հարուցեր, կտեսնեին, որ պարոն  նախագահի գործով էլ է խոչընդոտել:

Չեն բացի իրենք, կբացեն համապատասխան իրավասություն ունեցող մարդիկ:
Թող որևէ մեկը չկարծի, որ սկսված պրոցեսները չեն ավարտվելու: Ավարտվելու են շատ անակնկալ, նաև շատ ցավոտ»,- ասաց Ամրամ Մակինյանը:

Նա նշեց, որ այսօր առաջնայինն անվտանգության հարցեր են:

«Այն, ինչ տեղի է ունենում Հայաստանի պետական սահմաններում, առնվազն ամենամեղմ գնահատականներով այս իշխանությունների կողմից դավաճանություն է: Ի՞նչ է  նշանակում թշնամի երկրի զինված ուժերը մտել են Հայաստանի սահմաններից ներս 5-6 կմ, իրենց հետ բանակցում են: Ի՞նչ է նշանակում, բա ո՞ւր են Հայաստանի անվտանգության երաշխավորները, գերագույն  գլխավոր հրամանատարը, որ իրեն հռչակել է: Լրջանալ է պետք՝ հասկանալու  թե այս մարդիկ ուր են տանում երկիրը: Եթե ադրբեջանիցները չեն հասել Ավան և Նոր Նորք վարչական շրջանների դատարան, չի նշանակում, որ չեն հասնելու: Հասնելու են: Պետք է գիտակցել, որ սա «Հայկական ժամանակը» չէ, 21-րդ դարն է իր մարահրավերներով, աշխարհաքաղաքական  խնդիրներով, այս աշխարհագրական դիրքով, որ երկու կողմից առնվազն թշնամիներով ենք շրջապատված: Մի օր շուտ հեռանան, ավելի անվտանգ ու լավ երկրում կապրենք»,- ասաց Ամրամ Մակինյանը: