Ձեռնարկվելու են կոշտ գործողություններ՝ ՀՀ ինքնիշխան տարածքը պաշտպանելու նպատակով. ԱԺ հայտարարությունը
ՀՀ Ազգային ժողովն այսօրվա արտահերթ նիստում 86 «կողմ» ձայներով միաձայն ընդունեց հայտարարություն՝ Սյունիքում և Գեղարքունիքում ստեղծված ճգնաժամային իրավիճակի, առկա խնդիրների և դրանց լուծման ուղիների, սահմանների պաշտպանության և անվտանգության ապահովմանն ուղղված հարցերի վերաբերյալ։
ԱԺ «Բարգավաճ Հայաստան» խմբակցության քարտուղար Արման Աբովյանը ներկայացրեց հայտարարության տեքստը՝ նշելով, որ Հայաստանը պատրաստ է վճռական պատասխան տալու Ադրբեջանին։
«Արձանագրում ենք, որ 2021 թվականի մայիսի 12-ին Սյունիքի մարզի Սև լիճ տարածքի ուղղությամբ ադրբեջանական զինուժը սահմանների ճշգրտման աշխատանքներ կատարելու պատրվակով ներթափանցել է Հայաստանի տարածք՝ խորանալով մի քանի կմ՝ դեպի Վերին Շեն բնակավայր։ Ադրբեջանական զինուժի մի քանի հարյուր ներկայացուցիչներ այս պահին շարունակում են գտնվել ՀՀ տարածքում՝ Սյունիքի և Գեղարքունիքի մարզերի որոշ հատվածներում։
Դա ակնհայտ ոտնձգություն է Հայաստանի ինքնիշխան տարածքի համար, և ՀՀ-ն որևէ դեպքում չի հանդուրժի ստեղծված իրավիճակը։ Հաշվի առնելով Ադրբեջանի վարած հակահայկական, ռազմատենչ քաղաքականությունը, Ադրբեջանի ղեկավարության կողմից վերջին շրջանում ՀՀ տարածքային ամբողջականության նկատմամբ բացահայտ նկրտումները, ինչպես նաև տասնամյակներ շարունակ պետական մակարդակով քարոզվող հայատյացությունը՝ ՀՀ ԱԺ-ն խստագույնս դատապարտում է Ադրբեջանի կողմից Հայաստանի տարածքային ամբողջականության նկատմամբ ոտնձգությունները և փաստում, որ Ադրբեջանի կողմից վարվող ագրեսիվ քաղաքականությունը խախտում է ՄԱԿ-ի կանոնադրությամբ ամրագրված միջազգային իրավունքի հիմնարար սկզբունքները, ինչը ՀՀ-ին իրավունք է վերապահում իրականացնել միջազգային իրավունքով, ՀՀ սահմանադրությամբ և օրենսդրությամբ նախատեսված համարժեք բոլոր գործողությունները»,- ներկայացրեց Արման Աբովյանը։
Նա տեղեկացրեց, որ Հայաստանի կողմից ձեռնարկվելու են վճռական կոշտ գործողություններ Ադրբեջանի ռազմական ագրեսիան կասեցնելու և Հայաստանի ժողովրդին և ինքնիշխան տարածքը պաշտպանելու նպատակով։
«Կոչ ենք անում միջազգային հանրությանը՝ դատապարտել Ադրբեջանի կողմից ՀՀ տարածքային ամբողջականության դեմ ուղղված սադրիչ գործողությունները, ուժի գործադրման սպառնալիքներն ու փաստացի գործադրումը»,- եզրափակեց խոսքը Արման Աբովյանը։
Հարակից հրապարակումներ`
Լրահոս
Տեսանյութեր
Հակազդեցություն չկա, դրա համար էլ Ադրբեջանը հասնում է հաջողության. Իշխանյան
