Ձեր վստահելի աղբյուրը

«Դաժան է, բայց շատերը չեն գիտակցում՝ ինչ է կատարվում Հայաստանում»,- այսօր հրավիրված մամուլի ասուլիսի ընթացքում ասաց «Ազգային անվտանգություն» կուսակցության նախագահ Գառնիկ Իսագուլյանը:

Նրա խոսքով, եթե որևէ մեկին թվում է, թե 1988-94 թթ-ին կար բանակ, պետություն, որ բոլորին ուղղորդում էր, սխալվում է։ Ըստ նրա, ուղղակի կային հայրենասեր մարդիկ, որ ինքնակազմակերպվում ու գնում էին հայրենիքն ազատագրելու ու Հայաստանը պաշտպանելու։

«Այդ մարդիկ իրենց խնդիրը կատարեցին, թեև հետո՝ 30 տարի Հայաստանում ասֆալտների վրա, սրճարաններում, ռեստորաններում բոլորն այդ հաղթանակը վերագրում էին իրենց։ Հիմա ունենք պարտություն, և պարզվում է՝ այդ պարտությունն անտեր է։ Իսկ նրանք, ովքեր ուղիղ 3 տարի ասում էին, թե Հայաստանում իշխանության են եկել թուրք-ադրբեջանական գործակալները, հիմա բոլորի համար դարձել են օդիոզ ֆիգուր, և այդ մարդկանց հետ շփվելը բոլորի համար դարձել է վտանգավոր»,- ասաց նա։

Ըստ Գառնիկ Իսագուլյանի, հենց դա է պատճառը, որ այսօր Հայաստանում չկա որևէ մեկը և կազմակերպի, որ մարդիկ կամավորական ջոկատներով գնան այնտեղ, որտեղից թշնամին առաջ է գալիս։

«Թող չասեն՝ պետությունը չի թողնում, թուրք Նիկոլը չի թողնում, մենք գնացել ենք։ Ես կուզեի, որ մարդիկ, որոնք հավակնում են ընտրություններում հաղթել, գնային այդ տարածքները, ի՞նչն է խանգարում նրանց։ Կալանավորվելուց ու ձերբակալվելուց վախենալ պետք չէ։ Եկեք միասին գնանք, գնանք զինված ու հասկանանք՝ ինչ է կատարվում։ Ինչո՞ւ չենք կարող գնալ ու դրանց քշել»,- նշեց նա։

Նրա դիտարկմամբ, ցավալի է, որ մարդիկ, որոնք իրենց հաղթանակներ են վերագրում, հիմա միայն Նիկոլ Փաշինյանին հաղթելու մասին են մտածում։

«Հայրենիք ենք կորցնում, իսկ մարդիկ միայն ուզում են ընտրություններում հաղթել Նիկոլին։ Եթե մենք ազգ լինեինք, ինքնասիրություն ունենայինք, մեր գեներալներն էլ գեներալներ լինեին, այլ ոչ թե միլիոնատերեր, հիմա այսպես չէր լինի։ Նոյեմբերի 9-ից հետո մեկ օր ավելի ապրելու իրավունք չուներ Նիկոլը։ Բայց նա ոչ միայն ապրում ու բարգավաճում է, այլ մենք փորձում ենք նրա հետ մարտի մեջ մտնել ու հաղթել նրան։ Հիմա սա նորմա՞լ է։ Այս ժողովրդին հարգող կլինի՞»,- հարց հնչեցրեց նա։

Բացի այդ, Գառնիկ Իսագուլյանը նկատեց՝ այժմ Նիկոլ Փաշինյանի դեմ պայքարող քաղաքական ուժերն իրենց ցուցակներում ընդգրկում են մարդկանց, որոնք «դավաճանել են Նիկոլին»։

«Ախր, այդ մարդիկ ձեզ էլ կդավաճանեն»,- ընդգծեց նա։