Ձեր վստահելի աղբյուրը

«Մենք պատրաստ ենք կոալիցիա կազմել ցանկացած առողջ ուժի հետ, որը հետապնդում է նույն նպատակը՝ անվտանգ դարձնել Հայաստանը և զարգացնել այն»,- «Հայաստանի Հանրապետական» և «Հայրենիք» կուսակցությունների՝ «Պատիվ ունեմ» դաշինքի կազմավորման մասին հուշագրի ստորագրումից հետո կայացած ասուլիսում ասաց «Պատիվ ունեմ» դաշինքի նախընտրական շտաբի ներկայացուցիչ Դավիթ Հարությունյանը։

Նա նշեց՝ թե ում հետ կկազմվի կոալիցիա, կախված է ընտրությունների արդյունքից, այնուամենայնիվ չունեն քաղաքական ամբիցիաներ վասն հայրենյանց։

Հարցին՝ պատրա՞ստ է արդյոք դաշինքի նախընտրական ցուցակը, ի՞նչ սկզբունքով է կազմվել,  Դավիթ Հարությունյանը պատասխանեց, որ ցուցակը կհրապարակվի շուտով և այն կազմված է՝ ելնելով արդյունավետությունից. «Ի սկզբանե նշեմ, որ երկու կուսակցություններն ունեն այնքան մեծ կադրային պոտենցիալ, որ կարող էինք շատ հանգիստ կազմել 10 իրար չկրկնող ցուցակ»։

Պատասխանելով մեկ այլ հարցի, թե ինչո՞ւ «Հայրենիք»-ը կամ ՀՀԿ-ն չհամագործակցեցին ՀՀ երկրորդ նախագահ Ռոբերտ Քոչարյանի հետ և նրա գլխավորած դաշինքի մազ չկազմեցին, նա ասաց.  «Մեր նպատակները նույնն են՝ անվտանգ և զարգացող Հայաստան։ Բոլորս գիտակցում ենք, որ նպատակին հասնելու միակ միջոցը այս ազգակործան իշխանությունների հեռացումն է:

Այնուամենայնիվ, կան որոշակի մոտեցումներ, որոնք տարբերվում են, բայց սա չի նշանակում, որ մենք չենք համագործակցելու, համագործակցելու ենք, ուղղակի ընտողներին առաջարկել ենք նաև այլընտրանք: Այս պահին խնդիրը մեկն է՝ միասնական նպատակների համար, բայց տարբեր ճակատներով հասնել այս իշխանություններից ազատվելուն»։

Ինչ վերաբերում է ՀԱԿ-ի հետ համագործակցելուն, հնարավո՞ր է նախընտրական այս դաշինքին միանա նաև ՀԱԿ-ը, նա նշեց. «Նշեցի, որ առաջնահերթ խնդիրն այս պահին այս իշխանություններից ազատվելն է, ուստի պատրաստ են համագործակցել բոլոր համախոհ քաղաքական ուժերի հետ, ում հետ տեսնում ենք, որ ունենք ընդհանուր մոտեցումներ նույն նպատակին հասնելու համար։

Մենք ոչինչ չենք բացառում, միայն բացառում ենք աշխատանքն այն ուժերի հետ, որոնք կեղծ ընդդիմություն են, ստեղծված են իշխանության կողմից, որպեսզի փոշիացնեն ընդդիմության ձայները»։

Խոսելով արտահերթ ընտրություններում իրենց ուժի շանսերի մասին՝ «Պատիվ ունեմ» դաշինքի շտաբի ներկայացուցիչն ասաց, որ ձգտելու են առավելագույնին։

«Տեսնում ենք, որ օր օրի նվազում է իշխանությանը հավատացողների թիվը, և մարդիկ սկսում են հասկանալ, որ նրանք վարում են ազգակործան քաղաքականություն»,- նշեց Դ. Հարությունյանը։ 

Նա ասաց, որ չի լինելու «Պատիվ ունեմ» դաշինքի ընտրական ցուցակում, ոչ թե այն պատճառով, որ անելիք չունի, այլ համարում եմ, որ պատգամավորական մանդատը չէ քաղաքական գործունեություն իրականցնելու միակ հնարավորությունը:

«Խնդիրը, որը ծառացել է մեր հայրենիքի առջև, պահանջում է բոլոր ուժերի միավորում: Այդ ուժերի միավորման համատեքստում ես դիտարկում եմ իմ մասնակցությունը «Պատիվ ունեմ» դաշինքի նախընտրական շտաբի աշխատանքներին: Ես ոչ թե շտաբի պետ եմ, այլ ՝ շտաբի ներկայացուցիչ, իսկ շտաբը ղեկավարում են անմիջապես կուսակցությունների ղեկավարները»,-ասաց Դավիթ Հարությունյանը:

Դավիթ Հարությունյանը նաև նշեց, որ վերջերս բացահայտված տեղեկատվությունն ապացուցեց է՝  երեք տարի է, ինչ իրավապահ համակարգն անմիջականորեն ղեկավարվում է պետության ղեկին կանգնած մարդու աշխատակազմի կողմից։

«Նախագահ Սերժ Սարգսյանն իր ելույթում նշեց և ամոբղջությամբ համամիտ եմ, որ պարոն Արթուր Վանեցյանն առաջին փուլում իսկապես հավատացել է, որ նպատակները վեհ են, հավատացել է այն շրջանառվող կեղծ լուրերին, որոնք իրեն հրամցվում էին,  սակայն շատ արագ հասկացել է, որ դրանք ընդամենը մեկ  նպատակ են հետապնդում՝ ճնշել ընդդիմախոսներին և կանգ է առել։ Ավելին՝ կոչ է արել դադարեցնել այդ մոտեցումը, վերաբերմունքը հանրությանը, քանի որ հենց այդ վերաբերմունքն է հանգեցրել այն անդառնալի կորուստներին, որ մենք ունեցանք»։