Ձեր վստահելի աղբյուրը

Հայաստանի և Ադրբեջանի սահմանին տիրող իրավիճակի հետ կապված ՀՀ-ի՝ Հավաքական անվտանգության պայմանագրի կազմակերպությանը (ՀԱՊԿ) դիմելու քայլը Բաքուն համարում է խնդրի քաղաքականացման փորձ։ ՏԱՍՍ-ի հաղորդմամբ, այս մասին ասել է Ադրբեջանի ԱԳ նախարար Ջեյհուն Բայրամովը Տաջիկստանի ԱԳ նախարար Սիրոջիդին Մուխրիդդինի հետ հեռախոսազրույցի ժամանակ։

Նա նշել է, որ Երևանի դիմումը ՀԱՊԿ-ին անհիմն է և ոչ այլ ինչ է, քան Հայաստանի իշխող շրջանակների կողմից այս գործընթացը քաղաքականացնելու փորձ։

Բայրամովը  տաջիկ գործընկորջը  հայտնել է, որ հայ սահմանապահների հետ բանակցություններ են տարվում, նշել, որ «նման միջադեպերը պետք է լուծվեն քաղաքական մեթոդներով և բանակցությունների ճանապարհով»։

Հիշեցնենք, որ մայիսի 12-ի վաղ առավոտյան ադրբեջանական զինված ուժերը հատել են ՀՀ պետական սահմանն ու խորացել երկրի տարածք։ Թշնամու ուժերը  դեռ շարունակում են մնալ հայկական տարածքում։ Համապատասխան մարմիններն բանակցություններ են վարում, սակայն դրանք դեռ արդյունք չեն տվել։
Նիկոլ Փաշինյանն մայիսի 14-ին պաշտոնապես դիմել է ՀԱՊԿ Հավաքական անվտանգության խորհրդի գործող նախագահ Տաջիկստանի Հանրապետության նախագահ Էմոմալի Ռահմոնին՝ 1992 թվականի մայիսի 15-ի «Հավաքական անվտանգության մասին» պայմանագրի երկրորդ հոդվածի շրջանակում ՀԱՊԿ անդամ պետությունների դիրքորոշումները համակարգելու և առաջացած սպառնալիքի վերացման համար միջոցներ ձեռնարկելու նպատակով արտակարգ խորհրդատվություններ անհապաղ սկսելու մեխանիզմը գործադրելու համար: