Ձեր վստահելի աղբյուրը

«Ընտրապայքարը, որի մեկնարկը տրվել է մեր պետական սահմանների նկատմամբ արտաքին թշնամու հերթական ոտնձգությունների ու սանձարձակ պահվածքի պայմաններում, պետք է ոչ միայն չպառակտի, այլև ավելի համախմբի հայրենանվեր բոլոր անհատներին ու կազմակերպություններին ինչպես արտաքին թշնամու, այնպես էլ  նրա շահերը  ներսում սպասարկող ուժերի և կապիտուլյանտ իշխանությունների դեմ պայքարում»,- «Պատիվ ունեմ» դաշինքի կազմավորման  արարողությանն ասաց ՀՀ երրորդ նախագահ, ՀՀԿ նախագահ Սերժ Սարգսյանը։

Նա նշեց, որ դաշինք կազմող երկու քաղաքական ուժերին՝ ՀՀԿ-ին ու «Հայրենիքին»,  միավորում է իրավիճակի սթափ գնահատման արդյունքում  Հայաստանի ներքին ու արտաքին վտանգների առկա մարտահրավերների, դրանց հաղթահարման ուղիների և ապագայի վերաբերյալ նույնանման մոտեցումներն ու ընդհանուր մտահոգությունները, ինչպես նաև ազգային արժեքների պաշտպանության դիրքերում ամուր և աննահանջ կանգնելու  վճռականությունը։

«ՀՀԿ-ն լինելով անկախ Հայաստանում գրանցված առաջին հասարակական-քաղաքական կազմակերպությանը և  պետականաշինության մեջ ամենամեծ փորձառություն ունեցող քաղաքական կառույցը, իր փորձը, գիտելիքն ու կարողությունները, պահպանողական գաղափարախոսությունը համադրում է երիտասարդ քաղաքական ուժի՝ «Հայրենիք» կուսակցության արդիական, թարմ մոտեցումների,  համարձակ նախաձեռնությունների, նոր ավյունի ու եռանդի հետ՝ վստահությամբ, որ կուսակցությունն իր երիտասարդ, բայց պետական համակարգում ճանապարհ անցած առաջնորդի՝ Արթուր Վանեցյանի գլխավորությամբ Հանրապետականների հետ կդառնա ամուր և ժամանակակից պետություն կառուցելու ջատագովն ու առաջամարտիկը»,- ասաց Սերժ Սարգսյանը։

ՀՀ երրորդ նախագահի խոսքով, այսօր մեր ժողովրդի մի զգալի հատված Արցախում և ՀՀ-ում ամեն օր արթնանում է  անորոշության, վերահաս վտանգի, վախերի, ապագայի նկատմամբ թերահավատության, հուսահատության ու ապատիայի, իսկ մի մասն էլ իրականության ընկալումն ամբողջովին կորցրած, անտարբերության զգացողությամբ կամ պարտված ժողովրդի թերաժեքության բարդույթով։

«Կառավարման ընդամենը երեք տարում իրենց քայլերով ահա այս հոգեվիճակին ու տրամադրություններին հանգեցրին ապաշնորհ իշխանությունները, որից մարդկանց դուրս բերելը հսկայական ջանքեր է պահանջելու։ Անշուշտ, սա մեկ, կամ նույնիսկ երկու քաղաքական ուժերի գործ չէ։ Այստեղ պահանջվելու է բոլոր առողջ քաղաքական ուժերի համախմբումը, որոնք  այս ընթացքում կողք կողքի պետք է պայքարեն  չարի իշխանության դեմ, իսկ հետո համախմբեն բոլորի մասնագիտական, ինտելեկտուալ, կազմակերպչական և այլ կարողություններն ու ռեսուրսները, որպեսզի վերականգնեն հավատը պետության և հույսը վաղվա օրվա նկատմամբ։

Մենք ժամանակին  մեր ժողովրդին հաղթանակ ենք բերել, և թե հայրենիքում, թե աշխարհի որևէ ծայրում հայը քայլել է գլուխը բարձր որպես հաղթանակած ժողովրդի զավակ, հաղթանակած ժողովրդի ներկայացուցիչ։

Մենք այդ հպարտությունը վերադարձնեու ենք, անհնարին ոչինչ չկա։ Արցախյան առաջին պատերազմում և ընդհուպ 2018 թվականի ապրիլի 23-ը, այդ թվում 2016 թվականի ապրիլին, մենք դա ապացուցել ենք»,- ասաց Սերժ Սարգսյանը։

Նա նշեց, որ շատերն են խոսում իրենց քաղաքական հավակնությունների մասին. «Մեր մարդկային ներուժը և քաղաքական միտքն ամբողջությամբ բավարարում են  խոսել սեփական հավակնություններից, սակայն դասական իմաստով մենք  ներկուսակցական հավակնություններ  չենք դրսևորում, քանզի դաշինքի ստեղծման նպատակը պատգամավորական մանդատներ ունենալը չէ։

Մենք ունենք հստակ առաքելություն՝ քաղաքական դաշտի այլ ուժերի հետ միասին հեռացնել կապիտուլյանտներին իշխանությունից։

Մեր դաշինքում հավաքված են պատվախնդիր մարդիկ։ Մենք պատրաստ ենք հանուն մեր պետության, մեր երեխաների ապագայի համար համագործակվել պատվախնդրություն ունեցող բոլոր անձանց, հասարակական-քաղաքական կազմակերպությունների հետ, իսկ նրանք, հավատացեք, քիչ չեն։

Մենք հեռացնելու ենք և պատիվ ենք պահանջելու մեր  պետությունը հեղինակազրկած, թշնամու առջև ծնկած և նվաստացած կապիտուլյանտներից, կասեցնելու ենք պետության անկումը, դուրս ենք բերելու այս վիճակից և արժանապատիվ ընթացք ենք սկսելու բոլորս միասին»։

Սերժ Սարգսյանն անդրադարձավ այն խոսակցություններին, թե Արթուր Վանեցյանը, որպես Ազգային անվտանգության տնօրեն, հետապնդումների առաջամարտիկ էր, ինչպե՞ս եք նրա հետ դաշինք կազմում։

«Շատ պարզ։ Արթուր Վանեցյանը ժամանակին գիտակցեց նորելուկ շնագայլերի  ողջ իրական էությանը, անձամբ կանգ առավ և կոչ արեց նաև մյուսներին։ Ավաղ, նրան չլեսցին։

Ասեմ ուղիղ. դժվար  թե գտնվի մի մարդ, ով այս  իշխանությունների հետապնդումներից ավելի է տուժել, քան ես, իմ ընտանիքն ու մերձավոր շրջապատը։ Սա ասելով, իհարկե, ես հասկանում եմ, որ յուրաքանչյուր մարդ իր պրոբլեմը,  ցավը, ամենացավոտն է համարում։ Սակայն անձնական  զգացողությունները,  ամբիցիաներն ու քաղաքական կոնյուկտուրան անցողիկ են, խիստ երկրորդական այն առաքելության համեմատ, որ ունի  յուրաքանչյուր գիտակից հայ գործիչ մեր երկրում ստեղծված ճգնաժամի պարագայում»,- ասաց Սերժ Սարգսյանը։

Նա նշեց, որ  այսօր ինչպես մեր, այնպես էլ ՄԱԿ-ի անդամ մյուս երկրներում  նշում է ընտանիքի օրը։

«Որպես կյանքի բովով անցած մարդ և ճակատագրի հարվածները պատվով ընդունած հայ տղամարդ մի խորհուրդ տամ բոլորին՝ ամուր, սիրով, համերաշխությամբ պահեք ձեր ընտանիքը, այն ոչ միայն ձեր, այլև մեր երկրի իրական հարստությունն է։

Ընտանիքը նաև ազգային պահպանողական մեր կուսակցության՝ ՀՀԿ-ի համար հասարկության հիմքն է։ Հայաստանում պետք է ոչ թե 5000 նոր գերեզման ավելանար, այլ 5000 նոր հարսանիք, կնունք ու ծնունդ լիներ, եռագույնները պետք է ծածանվեին ոչ թե մեր հերոսների շիրիմներին, այլ հայոց բանակի հաղթական շքերթներին։ Մեր արցունքները պետք է ուրախության, ոչ թե ողբերգության հույզերից ծնվեին և այդ լուսավոր տղաներին, նրանց ընտանիքներին մեր ողջ ժողովրդին բոլորս պարտք ենք արժանապատվություն, հույս, և խաղաղ ու անվտանգ, բարեկեցիկ, հզոր Հայաստան։

Կյանքի ճշմարտություններից է՝ երբ չես գնահատում այն, ինչ ունես, ապա շատ արագ կորցնում ես։ Ցավոք, այդ ճշմարտությունը հիշեցրեց իր մասին և մեր ժողովուրդն այսօր ցավ է ապրում իր հայրենիքի մի հատվածի և որդիների կորստից։

Ընդգծում եմ ևս մեկ անգամ՝ անցյալին վերադարձ չի լինելու։ Բայց այսօր ուզում եմ ուղիղ ասել՝ ով չի խոստովանում անցյալի սխալները, չունի քաջություն, ով չի գնահատում անցյալի ձեռքբերումները, չունի ազնվություն։

Պատիվ ունեմ»,- իր ելույթում ասաց ՀՀ երրորդ նախագահ, ՀՀԿ նախագահ Սերժ Սարգսյանը։