Ձեր վստահելի աղբյուրը

«Հենակետ» վերլուծական կենտրոնն ամփոփել ու հրապարակել է համառոտ տեղեկություններ ընթացիկ շաբաթվա ժամանակամիջոցում Արցախում և Արցախի շուրջ տեղի ունեցած իրադարձությունների վերաբերյալ.

«Ընդհանուր բնույթի տեղեկություններ
Հայրենական մեծ պատերազմում տարած հաղթանակի և 1992 թվականին Շուշիի ազատագրման ու ՊԲ օրվա կապակցությամբ, մայիսի 9-ին արցախցիները երթ են կազմակերպել դեպի Ստեփանակերտի քաղաքային հուշահամալիր, հարգանքի տուրք մատուցելու Մեծ Հայրենականում և Արցախյան պատերազմներում նահատակված հայ զինվորների հիշատակին:

Օրվա ընթացքում հուշահամալիր էին այցելել  նախագահ Արայիկ Հարությունյանը, նախկին նախագահներ Բակո Սահակյանը և Արկադի Ղուկասյանը։  Միջոցառումներին ներկա է եղել  ԲՀԿ նախագահ Գագիկ Ծառուկյանը։

ԱՀ  կառավարության օպերատիվ շտաբից հայտնել են, որ Արցախի տարբեր բնակավայրերի վերաբնակեցման նպատակով, ՀՀ-ում ԱՀ կառավարության օպերատիվ շտաբի կազմակերպած ճանաչողական այցերի կազմակերպման և տեղափոխման ծրագրի արդյունքում՝ 54 ընտանիք (թվով 271 մարդ) տեղափոխվել է Արցախ:

Շաբաթվա ընթացքում Սյունիքում ծավալված իրադարձությունները թերևս ամենաքննարկող թեման է հանրային դիսկուրսում։ Նշենք , որ ՀՀ իշխանությունները որոշում են կայացրել խնդիրը լուծելու նպատակող դիմել ՀԱՊԿ-ին։ Այս իրադարձությունների ֆոնին, մայիսի 14-ին, մի խումբ ազատամարտիկներ փակել էին Գորիս-Ստեփանակերտ ավտոմայրուղին, պահանջելով, որպեսզի պետությունը իրենց զենք և զինամթերք տրամադրի  ադրբեջանական հնարավոր ագրեսիային դիադրելու համար։ Ըստ ոստիկանության տարածած հաղորդագրության, ակցիայի մասնակիցներից  8 անձ բերման է ենթարկվել, 1-ը՝ ձերբակալվել։ «Արցախի պահեստազորի սպաների միություն» ՀԿ նախագահ, ազատամարտիկ Կարմեն Ասլանյանն՝ անդրադառնալով միջադեպին ասել է , որ Արցախը Մայր Հայաստանին կապող ճանապարհի փակումը անընդունելի է և վտանգավոր։

ՌԴ խաղաղապահների մասին

Շաբաթվա ընթացքում մամուլում տեղեկություններ էին տարածվում, որ Արցախում տեղակայված ռուսական խաղաղապահ զորախմբի հրամանատար գեներալ Ռուստամ Մուրադովին մոտ ժամանակներս փոխարինելու է ՌԴ զինված ուժերի Հարավային ռազմական օկրուգի զորքերի հրամանատարի տեղակալ, գեներալ-լեյտենանտ Ալեքսեյ Ավդեևը։  Նշենք, որ ռուսական կողմից պաշտոնական որևէ տեղեկատվություն մինչ այս պահը չկա։

ՌԴ պաշտպանության նախարարությունից տեղեկացրել են, որ ռուսական խաղաղապահ զորախմբի զինծառայողները շարունակում են իրականացնել հրադադարի ռեժիմի պահպանման վերահսկողության և ավտոտրանսպորտի երթևեկության անվտանգության ապահովման, ինչպես նաև Լաչինի միջանցքով պարենի և տարբեր ապրանքների փոխադրման խնդիրները: Խաղաղապահ զորախմբի ռազմական ոստիկանության պարեկային ծառայության երթուղիների երկարությունն ամեն օր կազմում է մոտ 50 կմ:

ՌԴ պաշտպանական գերատեսչության մեկ այլ հայտարարությունից տեղեկանում ենք, որ հակաականային միջազգային կենտրոնի մասնագետները շարունակում են ԼՂ  տարածքի ականազերծման աշխատանքները և Ստեփանակերտի ծայրամասերի ականազերծման ընթացքում ռուս խաղաղապահներն օգտագործում են «Уран-6 ժամանակակից ռոբոտատեխնիկական համալիրներ, որոնք թույլ են տալիս ապահովել զինծառայողների անվտանգությունը պայթյունավտանգ աշխատանքի իրականացնելու ընթացքում, ինչպես նաև ապահովում են տեղանքի մաքրման աշխատանքի բարձր տեմպը ցանկացած եղանակային պայմաններում։

Պաշտոնական լրահոս

ԱՀ  նախագահ Ա․Հարությունյանը մայիսի 9-ին ընդունել է «Բարգավաճ Հայաստան» կուսակցության նախագահ Գագիկ Ծառուկյանին։ Հանդիպմանը քննարկվել է Արցախում սոցիալ-տնտեսական և հումանիտար ծրագրերի իրականացմանը, ինչպես նաև զարգացման նոր հնարավորություններին վերաբերող հարցերի լայն շրջանակ։

ԱՀ  արտաքին ԱԳՆ  հայտարարություն է տարածել Մայիսյան եռատոնի կապակցությամբ։
Մայիսի 14-ին ԱՀ ԱԽՔ Վիտալի Բալասանյանն աշխատանքային հանդիպում է ունեցել Կարմիր խաչի միջազգային կոմիտեի ԼՂ առաքելության ղեկավար Բերտրան Լամոնի հետ։Հանդիպման ընթացքում ներկայացվել են առաքելության կողմից ընթացիկ տարվա առաջին եռամսյակում իրականացված գործունեության մասին տեղեկություններ։ Շեշտվել է նաև ԱԽ գրասենյակի հետ համագործակցության արդյունավետությունը։

ԱՀ ԿԳՄՍ փոխնախարար Միքայել Համբարձումյանը հայտարարել է , որ Արցախի հանրակրթական դպրոցներում այս տարի չի նախատեսվում կազմակերպել «Վերջին զանգ»-ի արարողություն: Նրա խոսքով՝ հաշվի առնելով Արցախյան երրորդ պատերազմի հետևանքները, այս տարի տոնական որևէ միջոցառում չի իրականացվելու կրթական հաստատություններում։

ԼՂ հակամարտության մասին

ՌԴ  ՊՆ  Սերգեյ Շոյգուն հեռախոսային բանակցություններ է վարել ՀՀ ՊՆ Վաղարշակ Հարությունյանի հետ: Զրույցի ընթացքում քննարկվել է ԼՂ ռուսական խաղաղապահ զորախմբի առաջադրանքների կատարման տարածքում իրավիճակը, ինչպես նաև փոխադարձ հետաքրքրություն ներկայացնող այլ թեմաներ:

ՌԴ  ԱԳՆ ղեկավար  Սերգեյ Լավրովն Ադրբեջանի նախագահ Իլհամ Ալիևի հետ հանդիպման ընթացքում հայտարարել է, որ չնայած բարդությանը՝ ԼՂ  տարածաշրջանում սահմանների հետ կապված խնդիրները լուծելի են։

ՄԱԿ-ի գլխավոր քարտուղարի մամուլի խոսնակն ամենօրյա ճեպազրույցի ընթացքում, անդրադառնալով Արցախում հումանիտար առաքելություն իրականացնելու մասին հարցին, ընդգծել է, որ ՄԱԿ-ը  ցանկանում է առանց խոչընդոտների հումանիտար մուտք ունենալ ԼՂ։  Նա հավելել է, որ դա տեղի չի ունեցել Ադրբեջանի իշխանությունները կողմից ստեղծվող խոչընդոտների պատճառով:

Ադրբեջանի նախագահ Իլհամ Ալիևը հայտարարել է , որ Արցախի կարգավիճակի հարցը «ոչ ակտուալ» է։  Նրա խոսքերով , եթե որևէ մեկը ցանկանում է կարգավիճակ շնորհել իր  տարածքում ապրող հայերին, ապա  նա  դեմ չէ, բայց թող նման բան ասողները  իրենց երկրում լավ տեղ գտնեն հայերի  համար»։