Ձեր վստահելի աղբյուրը

Տավուշի մարզի Աչաջուր համայնքի բնակիչ Սևադա Ղուկասյանին, ով մայիսի 10-ին իր էշին բերել էր ԱԺ դիմաց, որ  Նիկոլ Փաշինյանին՝ որպես դավաճան թարս նստացնի կենդանու վրան, այսօր քննչական կոմիտեից զանգահարել են ու Երևան հրավիրել։

«Այսօր ինձ հրավիրեցին Արաբկիրի քննչական։ Ուղղակի ես այսօր ջերմություն ունեի, թեստավորվել եմ, վաղը պատասխանները կիմանամ, եթե բացասական լինի, անմիջապես կգնամ, մի հատ տեսնեմ՝ ի՞նչ է կատարվում, էս ի՞նչ շղթա է»,-Panorama.am-ի հետ զրույցում ասաց  Ս. Ղուկասյանը։

Հիշեցնեք, որ մայիսի 10-ին Սևադա Ղուկասյանն իր էշին բերել էր Ազգային Ժողովի շենքի մոտ, որտեղ այդ պահին գտնվում էր Նիկոլ Փաշինյանը։ Լրագրողների հետ զրույցում նա մանրամասնել էր, որ իրենց շրջանում հին ավանդույթ կա, դավաճանին թարս նստեցնում են էշին ու ման ածում, իսկ այդ ընթացքում մարդիկ նրան ամոթանք են տալիս։ Նույն օրը ոստիկանության ծառայողները ակցիա իրականացնող տղամարդուն  Բաղրամյան պողոտայից բերման էին ենթարկել, ոստիկանությունն ավելի ուշ հայտարարել էր, որ նրա տաբատի գրպանից հայտնաբերվել է կանեփի նմանվող դեղնականաչավուն զանգված։

Հարուցվել էր քրեական գործ՝ հոդված 268-ի հատկանիշներով, այն է՝ թմրամիջոցների կամ հոգեմետ (հոգեներգործուն) նյութերի ապօրինի շրջանառությունն առանց իրացնելու նպատակի։ Գործն ուղարկվել է ՔԿ։

Ղուկասյանն ասում է՝ Փաշինյանին էշին նստացնելն առաքելություն է համարում, որը պետք է ինչ-որ մեկն իրականացներ։

«Հիմա ես եմ հանձն առել։ Ավանակն էլ իր առաքելությունը չի ավարտել, ամեն ինչ անելու ենք, որ Նիկոլ Փաշինյանը թարս նստի ավանակի վրա ու մարդկանց միջով անցնի, մարդիկ ինչով ուզում են՝ քարով, փայտով, լոլիլկով թող քարկոծեն։ Դա բարի ավանդույթ էր, որը վերացել էր, քանի որ նման կարգի դավաճան չէինք ունեցել։ Ամեն գնով ես դրան հասնելու եմ, թող մարդկանց դա աբսուրդ թվա։ Սա նաև դաստիարակչական բնույթ ունի, մարդիկ, սերունդները պետք է տեսնեն, թե դավաճանի  հետ ինչպես են վարվում, որպեսզի խուսափեն նման բան անելուց։ Ազգային ավանդույթն օրենքից էլ հզոր է, մենք դրանից հետո նրան կհանձնենք իրավապհ մարմիններին։ Իրավապահներին խոստանում եմ, որ նրան կենդանի կհանձնենք իրենց»,-ասում է աչաջուրցի տղամարդը։

Ինչ վերաբերում է իր գրպանից կանեփանման զանգված հայտնաբերելու վերաբերյալ ոստիկանության հայտարարությանը, ապա Սևադա Ղուկասյանն ասում է՝ հիմար չէ, որ նման առաքելություն իրականացնելու համար Երևան գալիս գրպանում ինչ-որ նյութ պահեր։
«Իմ գրպանում նման բան չի եղել։ Երևի ոստիկանությունում նորմալ խորհրդատու էլ չունեն, որ բացատրեն՝ սովետի հնացած մեթոդներով մարդկանց գլխին մի սարքեք, շատվ է զռռում մանավանդ էս դարում։ Բոլորն էլ հասկանում են, որ իմ մոտ նման բան չի եղել։ Իմ գլխին սարքել են, դա հիմարին էլ է հասկանալի։ Ես նույնիսկ մտածում եմ, որ հնարավոր է ցաղը գան տունս խուզարկեն, հետո հայտարարեն, թե միջուկային զենք են գտել, կամ էլ կարող է պարզվի, որ Քենեդուն ես եմ սպանել ու կարտահանձնեն Ամերիկային»,-նշում է նա։

Ոստիկանության հաղորդագրությունից հետո բազմաթիվ փաստաբաններ գտել են Սևադային, առաջարկել իրենց անվճար աջակցությունը, ծառայությունը։

«Շատ փաստաբաններ ինձ անձնական նամակներ են գրել, զանգահարել, իրենց հասցեն ու հեռախոսահամարը տվել, խորհուրդներ են տալիս։ Ինձ ասացին՝ կօգնեն և՛ արդարացնել, և՛  մի բան էլ պատիվ պահանջել։ Բայց ես առայժմ փաստաբանի կարիք չունեմ, ես կարողանում եմ ինքս ինձ պաշտպանել, օրենքներից տեղեկացված եմ, գիտեմ։ Ես կարող եմ ասել, որ մեր ազգը զարթնում է խորը քնից, էյֆորիայից դուրս են գալիս մարդիկ, դուրս եկածներն էլ շատ լուրջ են պայքարում այս ամեն ինչի դեմ»,-նշում է Սևադա Ղուկասյանը, ով նաև իրենց համայնքի ավագանու անդամ է։

Անդրադառնալով ակցիային հետևած այն գրառումներին, թե ակցիան իրականացնելու համար իրեն ուղղորդողներ են եղել՝ Սևադա Ղուկասյանը նշում է՝ իրեն ճանաչողները գիտեն՝ ինքը շատ սկզբունքային է։

«Ես ունեմ մի քանի առավելություններ, որոնց համար մարդիկ ինձ սիրում են, հարգում են, ինձ հետ շփվում են։ Դրանցից մեկն էլ իմ սկզբունքայնությունն է։ Ես վաճառվողներից չեմ ոչ մի պարագայում։ 35 տարեկան տղա եմ, երբեք ոչ մի անգամ չեմ վաճառվել»,-նշում է նա ՝ իրեն վարկաբեկելու մեթոդը որակելով պրիմիտիվ ու նեխած։

Սևադա Ղուկասյանը վստահ է՝ դեռ նոր խնդիրներ են իր համար ստեղծելու, բայց ինքը պատրաստ է դրանց։

«Ես սա համարում եմ պատվի , նամուսի ու թասիբի հարց։ Իմ նամուսը, թասիբը, արժանապատվությունն ինձ համար կյանքից էլ թանկ է։ Կյանքի գնով էլ լինի, ես Նիկոլին պիտի էշին նստացնեմ։ Այն իր մեջ շատ մեծ խորհուրդ ունի, մենք էլ հայրենիք չունենք կորցնելու, որ նոր դավաճաններ լինեն, սա մեր հայրենիքի վերջին կտորն է, որտեղ մի կերպ տեղավորվում ենք, էլ կորցնելու բան չունենք»,-ասում է նա։