Ձեր վստահելի աղբյուրը

Վերջին մեկ ամսում պաշտոնապես հայտարարվել է ժամկետային երկու զինծառայողի ինքնասպանության, մեկ զինծառայողի սպանության մասին։ Թվում էր՝ պատերազմից հետո նման դեպքերը պետք է բացառվեին։ Բայց՝ ոչ։

ՊՆ N զորամասի պարտադիր ժամկետային զինծառայող, շարքային Ռ.Բ.-ն 2021թ. մայիսի 13-ին` ժամը 23:00-ի սահմաններում, ինքնակամ թողել է  զորամասի տարածքը և վերադարձել տուն: 2021թ. մայիսի 14-ին՝ժամը 06:40-ի սահմաններում, ընտանիքի անդամները Ռ.Բ.-ին հայտնաբերել են իրենց ավտոտնակում՝ պարանոցից կախված վիճակում:

ՔԿ զինվորական քննչական գլխավոր վարչության ութերորդ կայազորային քննչական բաժնում հարուցվել է քրեական գործ՝ ՀՀ քրեական օրենսգրքի 110-րդ հոդվածի 1-ին մասի հատկանիշներով (ինքնասպանության հասցնելը):

Մայիսի 4-ին ժամը 20:00-ի սահմաններում ՊՆ N զորամասի պահպանության տեղամասի մարտական դիրքում՝ ծառայակցի կողմից  զենքի հետ վարվելու կանոնները խախտելու հետևանքով գլխի շրջանում մահացու հրազենային վնասվածք է ստացել պարտադիր ժամկետային զինծառայող, շարքային Արտյոմ Հովիկի Մելքոնյանը:

ՔԿ զինվորական քննչական գլխավոր վարչության իններորդ կայազորային քննչական բաժնում քննվող  իրականացված բազմակողմանի քննությամբ ձեռք բերված բավարար ապացույցների համակցությամբ՝ պարտադիր ժամկետային զինծառայող Ա.Ա-ին մեղադրանք է առաջադրվել՝ ՀՀ քրեական օրենսգրքի 373-րդ հոդվածի 3-րդ մասով (զենքի հետ վարվելու կանոնները խախտելու համար, ինչն անզգուշությամբ առաջացրել է  մարդու մահ): Ա.Ա.-ն կալանավորվել է։ 

Ապրիլի 20-ին պարտադիր ժամկետային զինծառայող Նարեկ Սևակի Խաչատրյանի մահվան դեպքի առթիվ ՀՀ ՊՆ Կապանի ռազմական ոստիկանության բաժնում ՀՀ քրեական օրենսգրքի 360.1-րդ հոդվածի (զինծառայողին անզգուշությամբ ինքնասպանության հասցնելը) 1-ին մասով հարուցված քրեական գործն ընդունվել է ՀՀ քննչական կոմիտեի զինվորական քննչական գլխավոր վարչության իններորդ կայազորային քննչական բաժնի վարույթ: 

Մտահոգիչ է, որ դեպքերից երկուսը գրանցվել են Սյունիքում։ Թշնամու զինվորների, թշնամի երկրի դրոշների, զինտեխնիկայի մշտական ներկայությունն այստեղ պետք է որ սթափեցնող լիներ։

«Լրագրողներ՝ հանուն մարդու իրավունքների» ՀԿ նախագահ Ժաննա Ալեքսանյանը, որ հետևողականորեն բարձրաձայնել է զինված ուժերում խաղաղ պայմաններում արձանագրված սպանությունների ու ինքնասպանությունների դեպքերը, Panorama.am-ի հետ զրույցում ընդգծեց, արձանագրված դեպքերը թողտվության ու բանակի նկատմամբ անտարբերության հետևանք են։

«Պատկերացնո՞ւմ եք՝ 2020 թվականին ինքնասպանության 18 դեպք է գրանցվել։ Վստահ եմ, որ դրանց մեծ մասը՝ 99 տոկոսն ինքանսպանություններ չեն, այլ որակվել են որպես ինքնասպանություն։ Իմ աշխատանքային փորձի ընթացքում ուսումնասիրված դեպքերը դա են ցույց տալիս։ Պատերազմը փաստորեն չի սթափեցրել ոչ բանակի ղեկավարությանը, ոչ գերագույն գլխավոր հրամանատարին։ Մենք պատերազմում այդքան զոհ ենք ունեցել, պետք է բացառվեն մահվան դեպքերը»,-նշում է Ալեքսանյանը։

Նրա խոսքով, հաշվի առնելով  երկրում զոհերի մեծ թիվը, առկա իրավիճակը, հիմա զինծառայողների ինքնասպանությունների ու սպանությունների դեպքերը մեծ արձագանք չեն գտնում։

«Նախկինում առկա պատկերը շարունակվում է հիմա էլ։ Քննչական մարմինները, դատախազությունը՝ որպես վերահսկող մարմին, ոչինչ չի անում այդ անպատժելիության մթոնոլորտը վերացնելու համար։ Միայն գործերի բացահայտման արդյունքում բանակում կվերանան նման դեպքերը։ Իսկ հիմա կոծկվում են, որակվում են որպես ինքնասպանություններ, հայրենասիրությունը հենց դա կլիներ, ոչ թե այն, որ պատերազմից հետո պահպանվեր այդ կրիմինալ մթնոլորտը»,-պնդում է ՀԿ նախագահը։