Ձեր վստահելի աղբյուրը

Ռուսաստանը աջակցություն կցուցաբերի Հայաստանին և Ադրբեջանին՝ սահմանին առկա լարվածության կարգավորման հարցում, եթե նման խնդրանք երկու պետություններից էլ ստացվի: Այս մասին, Tass-ի հաղորդմամբ, լրագրողներին ասել է Ռուսաստանի փոխարտգործնախարար Անդրեյ Ռուդենկոն:

«Սա նորմալ իրավիճակ է, երբ նման միջավայրում գտնվող կողմերը դիմում են մեզ օգնության, աջակցության, միջնորդության համար, հատկապես, որ մենք փորձ ունենք նոյեմբերի 9-ի և հունվարի 11-ի հայտարարության մշակման համատեքստում: Հետևաբար, եթե այդպիսի դիմում լինի բոլոր մասնակիցների կողմից, այլ ոչ թե միայն մի կողմից, նկատի ունեմ Ադրբեջանից և Հայաստանից, ապա մենք պատրաստ կլինենք տրամադրել այն օժանդակությունը, որը կարող ենք», - ասել է Ռուդենկոն։

Ռուդենկոն ասել է, որ Հավաքական անվտանգության պայմանագրի կազմակերպության (ՀԱՊԿ) անդամ պետությունների արտգործնախարարները մայիսի 19-ին Դուշանբեում կքննարկեն հայ-ադրբեջանական սահմանին տիրող լարվածությունը:

«Արտաքին գործերի նախարարները մեկնում են Դուշանբե՝ քննարկելու օրակարգի բոլոր հարցերը: Չեմ բացառում, որ այդ հարցը կքննարկվի այնտեղ։ Կարծում եմ, որ հիմնական քննարկումը տեղի կունենա Դուշանբեում նախարարների հանդիպմանը», - ասել է Ռուդենկոն։

Հիշեցնենք, որ Ադրբեջանի կողմից Հայաստանի սահմանը հատելու հետ կապված հարցով Հայաստանը դիմել է ՀԱՊԿ-ին։