Ձեր վստահելի աղբյուրը

Հովհաննես Թումանյանի թանգարանում այսօր բացվելու է «Հայկական Քաշաթաղը» խորագրով ցուցահանդես: Մայիսի 18-28-ը թանգարանում ցուցադրվելու են Քաշաթաղի շրջվարչակազմի «ՄԵՐԱՆ» պաշտոնաթերթի գլխավոր խմբագիր, լրագրող, լուսանկարիչ, արցախյան ազատամարտիկ Զոհրաբ Ըռքոյանի լուսանկարները, որոնցում արտացոլված է Հայկական Քաշաթաղի հուշարձանային ժառանգությունը:

Ասուլիսում Թումանյանի թանգարանի տնօրեն Անի Եղիազարյանն ասաց, որ  այսօր փոխարենը հենց Քաշաթաղում հնարավորություն ստեղծեին պատանիներին, երիտասարդներին ծանոթանալու հուշարձաններին, ստիպված են եղել Քաշաթաղը ժամանավորապես տեղափոխել թանգարան՝ լուսանկարների տեսքով:

«10 օր կունենանք հանդիպում-դասախոսությունների շարք պատմաբանների,  հնագետների, ազգագրագետների, ճարտարապետների, լեզվաբանների հետ, ովքեր խոսելու են Քաշաթաղի, Քաշաթաղի էթնիկ բնակչության, ամրոցների, դամբարանների, հուշարաձանների, մեր պատմամշակութային ողջ ժառանգության մասին»,- ասաց նա:

Ասուլիսին ներկա  «Մերան» թերթի գլխավոր խմբագիր, լուսանկարիչ Զոհրաբ Ըռքոյանն ասաց, որ ցուցահանդեսում մոտ 100 լուսանկարներով ներկայացվելու են Քաշաթաղի շրջանի  պատմամշակութային հուշարձանները, հիմնականում եկեղեցիներ, խաչքարեր, տապանաքարեր, որոնք վկայում են Քաշաթաղի՝ հազարամյակներ շարունակ հայկական լինելու մասին:

«Լուսանկարները ներկայացնում են Քաշաթաղի ամբողջ շրջանի հուշարձանները:  Հուշարձաններից Ծիծեռնավանքի Սուրբ Գևորգ եկեղեցին կառուցվել է 4-րդ դարում, խոսակցություն կա, որ այն կառուցված է  հեթանոսական տաճարի հիմքերի վրա:
Ստեփանոս Օրբելյանն իր գրքում Ծիծեռնավաքը համարում է  Սյունյանց աշխարհի կարևորագույն սրբավայրերից մեկը»,- նշեց Զոհրաբ Ըռքոյանը:

Նա նշեց, որ տարածքում կան մինչև 17-18-րդ դարերում կառուցված եկեղեցիներ:

«Առավել կարևորում եմ այն տապանաքարերը, խաչքարերը, որոնք ամբողջ շրջանի անտառներում, ձորերում սփռված են, 1000-ների են հասնում: Մտահոգիչ է, որ ադրբեջանիցները, ովքեր որոշել են այդ տարածքից ընդհանրապես հայկական հետքը վերացնել, կարող է դրանք ամբողջը քանդեն, ավերեն: Ադրբեջանցիները խաչքարերն ամենամեծ թշնամին են համարում: Ամենաշատը վախենում եմ դրանից: Գոնե լուսանկարներով ունենանք, միջազգային հանրությանն անընդհատ ներկայացնենք, դիմենք,  որպեսզի ՅՈՒՆԵՍԿՕ-ն և մյուս կարևոր կառույցները տեր կանգնեն» ,- նշեց լուսանկարիչը:

Անի Եղիազարյանն ասաց, որ այս միջոցառման ուղերձը թումանյանական է՝ այսինքն ճանաչել, սիրել հայրենիքը, ինչպես Թումանյանն է ասում՝ «ոչ թե կույր ազգասերի սիրով, այլ գիտակից մարդու սիրով, ով ճանաչում է, գիտի, թե ինչ ունի, ինչպես պետք է պահել ու խնամել դա»:
Երկրորդ ուղերձը, ըստ Անի Եղիազարյանի, այն է, որ պետք է հոգատար լինել հուշարձանների նկատմամբ, որոնք այցելում ու վայելում են:

Նա նաև հայտնեց, որ  երկլեզու պատկերագիրք հրատարակելու նպատակ ունեն: