Ձեր վստահելի աղբյուրը

«Անկախ քաղաքական կամ ռազմաքաղաքական հարցերի  նպատակահարմարությունից, յուրաքանչյուր մասնագետ չպետք է դուրս գա իր մասնագիտության շրջանակներից, և մենք իրավական դաշտում ենք հարցը բարձրացրել, պետք է իրավական դաշտում լուծում ստանա»,- դատական նիստից հետո ասաց փաստաբան Հովհաննես Խուդոյանը:

Հիշեցնենք, որ ամիսներ առաջ ադրբեջանական ագրեսիայի շրջանակներում մի քանի փաստաբաններ հաղորդում են ներկայացրել Քննչական մարմին և դատախազություն, որ ադրբեջանցիները մտնում են ՀՀ տարածք, ոտնձգություն են իրականացնում ՀՀ քաղաքացիների դեմ: Քրեական գործ չի հարուցվել: Փաստաբանները դիմել են դատարան: Այսօր կայացավ առաջին դատական նիստը:

Հովհաննես Խուդոյանի կարծիքով, իր գործընկերների դիրքորոշումը ճիշտը չէ. «Ակնհայտ է, որ այդտեղ հանցավոր ոտնձգություն է  տեղի ունեցել: Նույնիսկ եթե առկա է նման խնդիր, որ պետք է ինչ-որ բանով պայմանավորված տարածք հանձնվեր, ադրբեջանցի զինվորականները չէին, որ պետք է գային ու այդ անձանց  զենքի սպառնալիքով,  կյանքին, առողջությանը, հոգեբանական տրավմա հասցնելով տնից հանեին: Եթե նման  պայմանավորվածություն կա կամ նման դիրքորոշում ուներ մեր պետությունը,  պետք է մեր իրավապահները ներկայանային այդ անձանց, խնդրեին ազատել իրենց բնակարանները, որովհետև կարող է դա կոնֆլիկտի հանգեցնի: Այս պարագայում անտերության է մատնված եղել, ինչն առաջացրել է ծանր հետևանքներ»:

Նա նշեց, որ սա դատական առաջին ու վերջին նիստն էր, նման վարույթները ենթադրում են, որ մեկ նիստով պետք է ավարտվեն: Դատարանը հեռացել է խորհրդակցական սենյակ որոշում կայացնելու:

Հ. Խուդոյանն ակնկալում է, որ պետք է իրենց բողոքը բավարարվի, քանի որ նիստի ընթացքում, իր կարծիքով, չներկայացվեցին այնպիսի ծանրակշիռ հակափաստարկներ, որոնք հակառակ արդյունքը կարող են ենթադրել:

«Ակնկալում ենք, որ պետք է հարուցվի քրեական գործ: Խնդիր չենք դրել մեր գործընկերներին վատ վիճակի մեջ դնել, պարտադրել գնալ ադրբեջանիցիներն հարցաքննել, դրա ողջամիտ հնարավորությունը չի լինելու: Բայց առնվազն բոլոր  իրադարձությունների բացահայտումը, տուժած անձանց հարցաքննությունները, նրանց իրավունքների  պաշտպանությունը պետք է լրիվ ծավալով կատարվի,  որպեսզի հնարավոր լինի հետագայում դա օգտագործել նաև միջազգային ատյաններում»,- ասաց փաստաբան Հովհաննես Խուդոյանը: