Ձեր վստահելի աղբյուրը

Հայաստանում Լեհաստանի դեսպանությունն այսօր թարմացրել է տեղեկությունները՝ կապված իր երկրի քաղաքացիների՝ Հայաստան այցելությունների հետ։

Հայաստանում համաճարակաբանական իրավիճակի վատթարացման,  ինչպես նաև ինֆեկցիոն հիվանդանոցներում նոր հիվանդների համար տեղերի բացակայության պատճառով, Երևանում Լեհաստանի Հանրապետության դեսպանություն խորհուրդ է տալիս ծայրաստիճան զգույշ լինել առաջիկա ամիսներին Հայաստան ցանկացած ուղևորություն պլանավորելու հարցում, քանի որ ներկայումս հնարավոր չէ սահմանել նույնիսկ համաճարակաբանական իրավիճակի կայունացման և սահմանված սահմանափակումները վերացնելու մոտավոր ամսաթիվ:

«Հայ-ադրբեջանական զինված հակամարտության սրման պատճառով, ինչը հանգեցնում է խաղաղ բնակչության անվտանգության սպառնալիքի բարձրացմանը, Արտաքին գործերի նախարարությունը խորհուրդ է տալիս հրաժարվել ոչ անհրաժեշտ ճանապարհորդություններից Հայաստանի ամբողջ տարածքով: Արտաքին գործերի նախարարությունը խորհուրդ է տալիս չճամփորդել դեպի Ադրբեջանի հետ սահմանի և Լեռնային Ղարաբաղի մերձակա տարածքներ»,-ասվում է հայտարարության մեջ։

Նշվում է, որ, որպես կանոն, կարող եք առանց սահմանափակումների շարժվել Հայաստանի տարածքում, բայց պետք է խուսափել ճանապարհորդելուց Ադրբեջանի հետ սահմանի մոտ գտնվող տարածքներում, հատկապես Տավուշի և Գեղարքունիքի մարզերում, քանի որ ղարաբաղյան հակամարտության հետ կապված կան զինված միջադեպեր (ավելի լայնամասշտաբ վերջին բախումները տեղի են ունեցել 2020 թվականի հուլիսին):

«Դեսպանությունը խստորեն խորհուրդ է տալիս չճանապարհորդել H53 Ոսկեպար-Բաղանիս հատվածում (որը M16 Երևան-Թբիլիսի միջազգային երթուղու մաս է կազմում)։ Մենք առաջարկում ենք օգտագործել հայկական կողմի M5 և M3 երթուղիները (Վանաձորի և Ապարանի միջոցով): Եթե Ձեզ անհրաժեշտ է գնալ M16 երթուղով, դուք պետք է գնաք H26 ճանապարհի վրա նշված շրջանցիկ ճանապարհով»,-ասվում է զգուշացման մեջ։

Լեռնային Ղարաբաղի տարածքով և հարակից յոթ շրջաններով ճանապարհորդելը կտրականապես խորհուրդ չի տրվում՝ կապված իրենց միջազգային կարգավիճակի չկարգավորվածության և հակամարտող կողմերի շփման գծում զինված միջադեպերի պատճառով։ Երևանում հյուպատոսը որևէ հնարավորություն չունի օժանդակություն ցուցաբերել Լեհաստանի այն քաղաքացիներին, ովքեր գտնվում են Լեռնային Ղարաբաղի տարածքում, որը միջազգային իրավունքի համաձայն Հայաստանի Հանրապետության կազմում չէ: