Ֆրանսիայի կառավարության խոսնակը Փարիզում հայ ռազմագերիների ազատման պահանջով հավաքին խոսել է ՄԱԿ ԱԽ մասին
Ֆրանսիայի կառավարության խոսնակ Գաբրիել Աթալը, պատգամավորներ, քաղաքապետեր ու մի շարք պաշտոնյաներ նախօրեին մասնակցում էին Ֆրանսիայի հայկական կազմակերպությունների համակարգող խորհրդի (CCAF) կողմից կազմակեպված հավաքին Ազգային ժողովի դիմաց՝ Ադրբեջանում պահվող հայ ռազմագերիների ազատման պահանջով։
Գաբրիել Աթալը հայտարարել է, որ Ֆրանսիայի Հանրապետության նախագահ Էմանուել Մակրոնն առաջինն էր, որ արձագանքել է Ադրբեջանի կողմից Հայաստանի տարածքի նկատմամբ սադրանքին ու հստակ արտահայտվել է։
Աթալն ասել է, որ կշարունակեն աշխատել հիմնական առաջնահերթություններով. պահպանել հայկական տարածքի ամբողջականությունը, որը նոր ներխուժման է ենթարկվել՝ միջազգային իրավունքի խախտմամբ, լուծում գտնել այն հայ բանտարկյալների համար, ովքեր այժմ անտանելի պայմաններում պահվում են Ադրբեջանում։
«Այսօր մենք ուզում ենք առաջ շարժվել ՄԱԿ-ի Անվտանգության խորհրդի շրջանակներում»,-եզրափակել է Գաբրիել Աթալը։
Ֆրանսիացի պատգամավոր, Ֆրանսիա-Արցախ բարեկամության խմբի նախագահ Գի Թեսյերը դատապարտել է հայ երիտասարդ զինվորների նկատմամբ կատարված ոճրագործությունները, ինչպես նաև Բաքվի ռազմավարի այգին։ Նա կոչ է արել ՄԱԿ-ի Անվտանգության խորհրդին, Մինսկի խմբին, ԵԱՀԿ-ի նախագահությանը և Եվրոպայի խորհրդին՝ Ադրբեջանից պահանջել անհապաղ կիրառել ատերազմի միջազգային օրենքները:
«Հայաստանը Ֆրանսիայի համար քույր է, և մենք լքում ենք նրան: Իհարկե, ես մասնակցեցի ցույցին այսօր երեկոյան՝ խնդրելով Ֆրանսիային խստություն ցուցաբերել ի դեմս Ադրբեջանի, որը ոտնահարում է Հայաստանի սահմանները և որն անօրինական կերպով պահում է հայ գերիներին»,- գրել է ֆրանսիացի պատգամավոր Վալերի Բուայեն։
«Ներկայումս, շուրջ 200 հայ ռազմագերիներ դեռ բանտարկված են Ադրբեջանում, չնայած 2020-ի նոյեմբերին զինադադարի կնքմանը: Նրանց ազատ արձակման պահանջով ես ստորագրեցի իմ գործընկերների`Գի Թեսյերի և Ֆրանսուա Պուպոնիի բանաձևի միջնորդությունը, որը կներկայացվի առաջիկա շաբաթներին»,-գրել է Ֆրանսիայի ԱԺ պատգամավոր Դանիել Կազարյանը։
Պատգամավորը նշում է, որ Ֆրանսիան ընդգծեց իր ներկայությունը հայերի կողքին ու նախազգուշացրեց մայիսի 12-ին հայկական տարածք ադրբեջանական ներխուժման վտանգների մասին։
Հիշեցնենք, որ մայիսի 12-ից ադրբեջանական զինվորները ներխուժել են Հայաստանի պետական սահմանները Գեղարքունիքի ու Սյունիքի մարզերում, և Սյունիքի Սև լիճը պարփակելուն ուղղված գործողություններ կատարել, խորանալով ՀՀ պետական սահմանում մինչև 3,5կմ։ Հայաստանը, Ադրբեջանի սադրանքին ի պատասխան, պաշտոնապես դիմել է ՀԱՊԿ-ին։
Ադրբեջանի սադրանքին ի պատասխան Էմանուել Մակրոնը հայտարարեց, որ «Ադրբեջանի զինված ուժերը ներխուժել են հայկական տարածք։ Նրանք պետք է անհապաղ հետ քաշվեն: Եվս մեկ անգամ ասում եմ հայ ժողովրդին` Ֆրանսիան համերաշխ է ու այդպիսին էլ կմնա»։
Փաշինյանի հետ հեռախոսազրույցում Մակրոնն ասել էր, որ Ֆրանսիան ցանկանում է, որ ՄԱԿ-ի Անվտանգության խորհրդի միջոցով հնարավոր լինի լուծում գտնել տարածաշրջանում առկա լարվածության իրավիճակին `այս տարածաշրջանում կայունությունն ու անվտանգությունը վերականգնելու համար։
Լրահոս
Տեսանյութեր
Խայտառակություն Թումանյան փողոցում. Չախոյան
