Ձեր վստահելի աղբյուրը

«Ինձ համար հասկանալի չէ մեղադրանքն այն պարզ պատճառով, որ չեմ ծանոթացել ու չեմ ծանոթանալու, ինձ դա չի հետաքրքրում: Հատուկ քննչական ծառայությունը որպես պետական մարմին այևս չեմ ընդունում, քաղաքական պատվեր կատարող մարմին է»,- ՀՔԾ դիմաց լրագրողների հետ ճեպազրույցում ասաց «Հայաստան» դաշինքի շտաբի պետ Արմեն Գևորգյանը:

Նա ընդգծեց՝ իրենց սարքած խաղի մեջ ցանկություն չունի խաղալ:

Հիշեցնենք, որ ավելի վաղ Այլընտրանքային նախագծեր խմբի փորձագետներ Վահե Հովհաննիսյանը, Էլինար Վարդանյանը, Ստեփան Մարգարյանը և Գեղամ Նազարյանը տեղեկացրել էին, որ այսօր առավոտյան հերթական կեղծ մեղադրանքով ՀՔԾ է կանչվել Արմեն Գևորգյանը. «Սա տեղի է ունեցել Արմեն Գևորգյանի՝ «Հայաստան» դաշինքի շտաբի պետ նշանակվելու որոշումից անմիջապես հետո»:

Արմեն Գևորգյանն ասաց, որ երկու օր առաջ Հատուկ քննչական ծառայություն ներկայանալու ծանուցագիր է ստացել, այսօր ժամը 9:00-ից ՀՔԾ-ում են:

«Խոսքը հետևյալի մասին է. դեռևս անցած  տարի ապրիլի 16-ին Հատուկ քննչական ծառայությունը քրեական գործ էր հարուցել ինչ-ինչ փաստերի կապակցությամբ, որտեղ ինչ-որ հանգամանքներ են նկարագրվում և վերջում ասվում, որ Արմեն Գևորգյանն այդ ամեն ինչի հետ առնչություն ունի: Մասնավորապես, իմ հարազատների, իմ բարեկամների մի շարք գույքեր փաստացի պատկանում են ինձ,  ես այդ ամեն ինչ լվացել եմ, եթե ճիշտ եմ հասկանում: Բայց այն ժամանակ մեղադրանք չէր առաջադրվել, որովհետև, կարծում եմ, այն ժամանակ նաև քննություն էր  հասկացել, որ աբսուրդի ժանրից է: Բայց իրենք հաջորդ քայլն են արել՝  այդ գույքերի վրա կալանք են դրել:

Մենք փորձել ենք մեր իրավունքները պաշտպանել, դիմել ենք դատական ատյաններին: Բոլոր դատական ատյաններում այս պահի դրությամբ քննիչի համապատասխան որոշումը  ճանաչվել է  ապօրինի և բեկանվել է: Այս պահի դրությամբ ունենք այդ իրավիճակը»,- նշեց նա:

Նրա խոսքով, այս պայմաններում՝ սահմաններում տիրող իրավիճակ, առկա մարտահրավերներ, իրեն որոշել են մեղադրանք առաջադրել, որպեսզի գույքի վրա կալանք դնելը հիմնավորված լինի. «Մարդ պետք է էլեմենտար մի քիչ քթի ծակ ունենա այն առումով, որ հասկանա՝ երբ, քաղաքական ինչ պայաններում, ինչ վիճակում ինչ որոշումներ է կայացնում:

Պատկերացնում եք՝ սահմաններում տիրող իրավիճակի պարագայում, երկրում այս մարտահրավերներին, որոշել են ինձ մեղադրանք առաջադրեն, որպեսզի այդ գույքերի վրա կալանք դնելը հիմնավորված լինի: Տարածված տեսանյութում տեսնում ենք, թե ինչպես են վարվում մեր զինվորականների հետ:  ՀՔԾ-ն փոխանակ զբաղվի այդ փաստերով, զբաղվում է մահացած մարդկանց գույքերն ինձ վերագրելով:

Երկրորդ,  հավանաբար որոշել են ինչ- որ խափանման միջոց ընտրեն՝ խաթարելու իմ գործունեությունը որպես «Հայաստան» դաշինքի շտաբի պետ»:

Արմեն Գևորգյանն ասաց, որ հրաժարվել է ընդհանրապես որևէ գործ ունենալ Հատուկ քննչական ծառայության հետ: Նա նշեց, որ շփվում է մարզերում, Երևանում իր գործընկերների համար, «Հայաստան» դաշինքի ներկայացուցիչները համատարած հրավիրվում են քննչական մարմիններ, ոստիկանություն ինչ-որ անհասկանալի բացատրական աշխատանքների, ինչ-որ անհասկանալի նյութերի նախապատրաստման, տարիներ շարունակող քննվող քրեական գործերով ինչ-որ պարզաբանումներ ստանալու և այլն:

«Այսօր ակնհայտ է, որ այսպես կոչված մեր իշխանություններն ամեն ինչ անում են, որպեսզի մարդկանց մոտ իրենց դեմ պայքարելու ցանկությունը և վճռականությունը կոտրվի: Կարծում եմ՝ նմանատիպ օյնբազություններից դրանք ավելանում են, ամրապնդվում: Մեր դաշինքն արդեն շատ կազմակերպված է, աշխատանքները դրված է շատ ճիշտ հունի և ռեյլսերի վրա, այսպիսի բաներով հնարավոր չի լինելու խաթարել այդ գործընթացը»,- ասաց «Հայաստան» դաշինքի շտաբի պետը: