Ձեր վստահելի աղբյուրը

«Խոսքը բացառապես քաղաքական հետապնդման մասին է: Սույն գործով մեղադրանք առաջադվեց Արմեն Գևորգյանին միայն այն բանից հետո, երբ հայտարարվեց, որ նա ստանձնելու է «Հայաստան» դաշինքի նախընտրական կենտրոնական շտաբի ղեկավարի պարտականությունները»,- լրագրողների հետ զրույցում ասաց «Հայաստան» դաշինքի շտաբի պետ Արմեն Գևորգյանի պաշտպան Էրիկ Ալեքսանյանը:

Հիշեցնենք՝ Արմեն Գևորգյանն այսօր հրավիրված է եղել Հատուկ քննչական ծառայություն: ՀՔԾ  հաղորդագրության համաձայն՝ «Արմեն Գևորգյանը հանցավոր ճանապարհով ստացել և օրինականացրել է ընդհանուր 4.921.302.379 ՀՀ դրամ, որի համար վերջինիս մեղադրանք է առաջադրվել ՀՀ քրեական օրենսգրքի 190-րդ հոդվածի 3-րդ մասի 1-ին և 3-րդ կետերով»:

Է. Ալեքսանյանի ներկայացմամբ, սույն քրեական գործը հարուցվել է դեռևս 2020 թվականի ապրիլի 16-ին:

«Ես և իմ գործընկեր Լուսինե Սահակյանը մեղադրանքին ծանոթացանք: Միանշանակ կարող ենք ասել, որ այս չարաբաստիկ մեղադրանքը որևէ աղերս չունի իրականության հետ, ապօրինի է, սկզբից մինչև վերջ  իր մեջ պարունակում է քաղաքական երանգներ»,- ասաց փաստաբանը:

Նրա ներկայացմամբ, սույն քրեական գործով դեռևս 2020 թվականի ապրիլի 16-ից կատարվել են բազմաթիվ ապօրինություններ. «Դրանցից մեկն այն է, որ այդ գործով, երբ որևէ մեկը, այդ թվում Արմեն Գևորգյանը, չունեին կասկածյալի կամ մեղադրյալի  դատավարական կարգավիճակ, թե նրա, թե նրա բարեկամների ամբողջ գույքի վրա դրված էր եղել կալանք, իսկ օրենքը ուղղակի պահանջում է, որ  նշված հարկադրանքի միջոցը  կարող է կիրառվել միայն կարգավիճակ ունեցող անձանց նկատմամբ: Բոլոր դատարանները  հաստատել են այդ որոշման ապօրինի լինելու  հանգամանքը: Երբ դատական ակտերը մտել են օրինական  ուժի մեջ, հենց Հատուկ քննչական ծառայությունն իրավունքի  խախտումը վերացնելու մասին որոշում է  կայացրել:

Պատկերացնում եք՝ ինչի՞ հետ գործ ունեք: Իրենք վերաքննիչ դատարանի կողմից որոշումը  կայացնելուց հետո անգամ վճռաբեկ բողոք չեն տարել, իրավունքի խախտումը  ինքնուրույն վերացրել են: Խոսքն այն մասին է, որ իրենք էլ են շատ լավ հասկանում, որ այն, ինչ կատարում են, ուղղակի ապօրինի է»:

Է. Ալեքսանյանն ասաց, որ ներկա պահին գույքի վրա կալանք դրված չէ, քանի որ ունեն օրինական ուժի մեջ մտած դատական ակտ, որի կապակցությամբ հենց  ՀԾՔ-ն որոշում է  կայացրել իրավունքի  խախտումը վերացնելու մասին:

«Կարող ենք ենթադրել, որ հետագայում պարոն Գևորգյանի՝ կարգավիճակ ստանալուց հետո նրա նկատմամբ այլ հարկադրանքի միջոցներ կկիրառվեն, ինչու ոչ՝  կրկին գույքի վրա արգելանք կդնեն: Նախապես նշում ենք՝ կրկին լինելու է ապօրինի, քանի որ ոչ դրա հիմքերը, ոչ  նպատակները գոյություն չունեն, խոսքը գնալու է փաստացի նույնատիպ հարկադրանքի կիրառման մասին, որն  արդեն իսկ դատարանների կողմից ճանաչվել է  ապօրինի»,- ասաց պաշտպանը:

Նա նշեց, որ այս պահին Արմեն Գևորգյանն ունի մեղադրյալի կարգավիճակ, բնականաբար, չի ընդունում մեղադրանքը, որևէ փաստաթղթի տակ չի ստորագրել:

«Մենք այս գործի հետ կապված յուրաքանչյուր փաստաթուղթ բողոքարկելու ենք,  իրենց գլուխը դնելու ենք ցավի տակ»,- ընդգծեց Էրիկ Ալեքսանյանը:

Լուսինե Սահակյանն իր հերքին բացատրեց, թե ինչպիսինն է մեղադրանքի բովանդակությունը. «Արմեն Գևորգանի հարազատների, կնոջ հնարավոր բոլոր հարազատների գույքերի վրա արգելանք է դրվել, ըստ մեղադրանքի՝  իբրև այդ գույքերը ձեռք են բերվել Արմեն Գևորգյանի կողմից: Ըստ մեղադրանքի անհասկանալի է, թե իրենք ինչումն են մեղադրում Արմեն Գևորգյանին, ասում են՝ փողերի լվացման արդյունքում է այս գույքերը ձեռք բերել:

Խոսքն, օրինակ, առնվազն կնոջ հարազատների այնպիսի գույքերի և նյութական միջոցների մասին է, որոնք առկա են եղել նույնիսկ մինչև Արմեն Գևորգյանի ծնվելը:

Այսինքն, այս աստիճանի աբսուրդ իրավիճակ է ստեղծվել, երբ մեղադրում են, որ այդ գույքեր ձեռք են բերվել պաշտոնավարման տարիներին Արմեն Գևորգյանի կողմից,  այն դեպքում, երբ նույնիսկ տարիները չեն փորձում հասկանալ և խոսքն այնպիսի անձանց մասին է, որոնք շատ լուրջ նյութական միջոցներ են ունեցել մինչև Արմեն Գևորգյանի ծնվելը:

Իրենք ուղղակի թվարկել են, որ հարազատներն ունեն այսպիսի գույքեր, հայտարարագրել են այսպիսի գույքեր, ՀՔԾ-ն  գտնում է, որ Գևորգյանի միջոցներով է ձեռք բերվել: Բայց ինչպե՞ս, ի՞նչ, որևէ ապացույց չկա»:

Լուսինե Սահակյանը նույնպես նշեց, որ ուղիղ քաղաքական հետապնդում է Արմեն Գևորգյանի նկատմամբ. «Տեսնելով, թե առաջիկա ընտրություններում ինչպիսի դիրք է զբաղեցնելու Արմեն Գևորգյանը՝ որոշեցին կոնկրետ քրեական հետապնդում  սկսել և կոնկրետ մեղադրանք առաջադրեցին»: