Ձեր վստահելի աղբյուրը

«Սա ընդամենը սկզբնահատվածն է, կազմակերպչական հարցերն են որոշվում հրապարակված հավելվածով, մնացածը լինում են հավելավծներով՝ սահմանագծում, սահմանազատում: Այս հրապարակված հավելվածը չէ կարևորը»,- Հանրապետության հրապարակում լրագրողին ասաց քաղաքագետ Էդգար Էլբակյանը՝ խոսելով Պուտին-Ալիև-Փաշինյան եռակողմ հայտարարության հրապարակված հավելվածի մասին, որը պետք է ստորագրվի:

Նա նշեց, որ բուն մասը կամ գաղտնի է հենց իրավական առումով, կամ ուղղակի այս պահին գաղտնի է պահվում հասկանալի պատճառներով:

«Քարտեզները, որոնցով մինչ այսօր էլ GPS-ով սահմանագծումն արվում էր, Խորհրդային միության գլխավոր շտաբի վերջին քարտեզներն էին, որոնք այն ժամանակ գաղտնի էին: Վերջին տարիներին գաղտնազերծվել են:

Դրանք ոչ մի կերպ չէին կարող միջազգային իրավունքի աղբյուր լինել, պարզապես Հայաստանը կապիտուլացված է իր ղեկավարությամբ հանդերձ և դրանով էին անում»,- ասաց ադրբեջանագետ Է. Էլբակյանը:

Նա նշեց, որ Սուրբ Աթոռում ՀՀ նախկին դեսպան Միքայել Մինասյանը իր գրառման մեջ մի սկբունքը սա էր համարել, երկրորդը՝ աշխարհագրական նպատակահարմարությունը, երրորդը՝ գետնի վրա եղած իրավիճակը:

«Սա արդեն կապիտուլյացիայի քառակուսի է՝ այսինքն խցկված են բոլոր այն սկզբունքները, որոնք շահեկան են Ադրբեջանի համար»,- նշեց փորձագետը:

Է. Էլբակյանը բացատրեց նաև, թե ինչ է նշանակում աշխարհագրական նպատակահարամարություն. «Օրինակ, ինչ-որ մի պատճառով կամ գետնի վրա առկա վիճակով, կամ քարտեզով ինչ որ մի կետ Ադրբեջանին է պատկանում, բայց դեպի այդ կետ իրենք լավ սնուցում չունեն, որովհետև Հայաստանի կողմից նշանառության տակ են կամ այդ կետերը պատկանում են Հայաստանին: Իրենք հայտարարելու են, որ աշխարհագրական նպատակահարմարություն է, եթե սա մերն է, մնացածն էլ տվեք մեզ»:

Ինչ վերաբերում է գետնի վրա առկա վիճակին, նա նշեց. «Պատասխանատվությամբ եմ այս թիվն ասում՝  վերջին մեկ շաբաթում Հայաստանի Գեղարքունիքի և  Սյունիքի մարզերում թշնամուն է հանձնել 11 հազար հեկտար տարածք»: