Ձեր վստահելի աղբյուրը

«Հենակետ» վերլուծական կենտրոնն ամփոփել ու հրապարակել է համառոտ տեղեկություններ ընթացիկ շաբաթվա ժամանակամիջոցում Արցախում և Արցախի շուրջ տեղի ունեցած իրադարձությունների վերաբերյալ.

«Ընդհանուր բնույթի տեղեկություններ

Շաբաթվա ընթացքում մամուլում և համացանցում տեղեկություններ էին տարածվում, որ Սյունիքում ու Գեղարքունիքում վերջին իրադարձությունների ֆոնին զուգահեռ, հակառակորդը փորձել է առաջխաղացում ունենալ նաև Արցախի վերահսկողության տակ գտնվող հատվածներում՝ մասնավորապես Քարվաճառի և Մարտակերտի ուղղություններում։  Արցախի ԱԺ «Արդարություն» խմբակցության պատգամավոր Մետաքսե Հակոբյանն տարածվող լուրերի վերաբերյալ  հայտարարել  է, որ իր տեղեկություններով՝ թշնամին առաջ է բերում իր դիրքերը տարբեր ուղղություններով:
Շրջանառվող տեղեկությունները հերքել է ԱՀ ԱԱԽ գրասենյակը։

Փորձագետների գնահատմամբ, եթե ադրբեջանական կողմը հնարավորություն է ունեցել ՀՀ պետական սահմանը խախտել և առաջ գալ, ապա առաջին իսկ հարմար առիթի դեպքում Ադրբեջանը փորձելու է դիրքերը բարելավել նաև արցախյան հատվածում։Նշենք, որ նախկինում նման միջադեպեր գրանցվել էին, սակայն ՌԴ խաղաղապահների միջամտությունից հետո իրավիճակը հարթվել է։

Մայիսի 18-ին  Կարմիր շուկայի բնակիչները դուրս են եկել գլխավոր ճանապարհ, որտեղով անցնում է թշնամու մեքենաների շարասյունը և փորձել են կանգնեցնել ադրբեջանցիների շարասյունը, քանի որ ավելի վաղ թշնամու զինծառայողներից մի քանիսը կրակ էին բացել Թաղավարդի ուղղությամբ:
ԱՀ  ԱԺ «Արդարություն», «Հայ Յեղափոխական Դաշնակցություն» և «Արցախի ժողովրդավարական կուսակցություն» խմբակցությունները  պահանջել  են Արցախի նախագահ Ա․ Հարությունյանի հրաժարականը։  Ըստ համատեղ տարածած հայտարարության, խմբակցությունները համոզվել են, որ Արցախի նախագահն առաջնորդվում է ՀՀ հեղինակազրկված իշխանությունների ցանկությունները բավարարելու մտադրությամբ: 

Հիշեցնենք, որ Ա․Հարությունյանը 44 օրյա պատերազմից հետո հայտարարել էր, որ առաջին իսկ ստեղծված հնարավորության դեպքում հրաժարական կտա։

Մայիսի 20-ին Ստեփանակերտում մի խումբ երիտասարդների կողմից կազմակերպվել է բողոքի ակցիա, ընդդեմ ՀՀ վարչապետի կողմից  ստորագրվելիք աղմկահարույց փաստաթղթի։  Ակցիայի մասնակիցները պահանջում էին, որպեսզի նման փաստաթուղթ չստորագրվի, քանի որ այն չի բխում Հայաստանի և Արցախի շահերից։

Կովկասյան ժառանգության դիտորդական խումբը (CHW) ահազանգել  է, որ Շուշիի հյուսիսում գտնվող դարերի պատմություն ունեցող գերեզմանատունը մասնակիորեն ոչնչացվել է:  Քաղաք տանող ճանապարհի արևմտյան կողմի տարածքների մի մասը հարթեցվել է՝ շենքային համալիրի կառուցման նպատակով:

Մայիսի17-ին  ադրբեջանցիները թիրախային կրակ են արձակել Շոշ գյուղի մոտերքում հայկական դիրքերի թիկունքում էքսկվատորով ինժեներական աշխատանքներ իրականացնող Սոս գյուղի բնակչի վրա։ Վնասվել է գյուղի բնակչի տեխնիկան։  Միջադեպի վերաբերյալ արձագանքել է ԱՀ ՄԻՊ-ը։

Իվանյանի համայնքի ղեկավար Բորիս Ղահրամանյանը հայտարարել է , որ «Հայաստան» համահայկական հիմնադրամի ֆինանսավորմամբ՝  Ասկերանի շրջանի Իվանյան համայնքում սկսվել են նոր թաղամասի կառուցման աշխատանքները։Նրա խոսքով՝ կառուցվող 9 բազմաբնակարան շենքերում նախատեսվում է ունենալ 180 բնակարան՝ երկու, երեք և չորս սենյականոց:

ՀՀ-ում Արցախի Հանրապետության կառավարության օպերատիվ շտաբը տեղեկացնում է, որ Արցախի տեղահանված շրջանների բնակչությունն օգտվում է մոտ 20 սոցիալական աջակցության ծրագրերից, որոնց մեծ մասը գտնվում է ավարտման փուլում։ Ծրագրերից օգտվել է արցախցիների շուրջ 97 %֊ը։

ՌԴ խաղաղապահների մասին

ՌԴ ՊՆ-ը հաղորդել է, որ խաղաղապահ զորակազմի զինծառայողներն ապահովել են 80 ուխտավորների խմբի անվտանգ այցելությունը Ամարասի քրիստոնեական վանական համալիր: Վանական համալիր էին եկել Ստեփանակերտ քաղաքից և վանքին հարակից քաղաքներից ու գյուղերից:

Պաշտոնական լրահոս

ԱՀ  նախագահ Արայիկ Հարությունյանը մայիսի 16-ին աշխատանքային այցով մեկնել է Շուշիի շրջանի Եղծահող, Մեծ Շեն, Հին Շեն և Լիսագոր համայնքներ և հանդիպումներ ունեցել բնակիչների հետ։ 

ԱՀ  նախագահը մայիսի 18-ին այցելել է պաշտպանության նախարարություն, որտեղ Պաշտպանության բանակի բարձրագույն հրամկազմի հետ խորհրդակցություն է անցկացրել:
ԱՀ  նախագահ Ա․ Հարությունյանն ընդունել է «Արցախի պահեստազորի սպաների միություն» հասարակական կազմակերպության վարչության անդամներին։ Քննարկվել են զորացրված և պահեստազոր անցած սպաների սոցիալական խնդիրները։

Արցախի ԱԳՆ-ն հայտարարություն է տարածել ԵԽ կողմից մայիսի 20-ին ընդունված բանաձևի վերաբերյալ, որում ԵԽ-ն Ադրբեջանից պահանջել է անհապաղ և առանց նախապայմանների ազատ արձակել 44-օրյա պատերազմում և դրանից հետո գերեվարված բոլոր հայ ռազմագերիներին և քաղաքացիական անձանց՝ ողջունելով ընդունված բանաձևը:

ԱՀ  ՆԳ նախարարության ԱԻ պետծառայությունից հայտնել են, որ վերջին շաբաթվա ընթացքում  վնասազերծվել է 320 պայթուցիչ և 388 թնդանոթի  արկ:

ԼՂ հակամարտության մասին

ՌԴ նախագահի մամուլի քարտուղար Դմիտրի Պեսկովն հայտարարել է, որ ՌԴ-ն մշտական կապի մեջ է Ադրբեջանի և ՀՀ հետ ԼՂ իրավիճակի կարգավորման հարցում։ Նրա խոսքերով՝ Պուտինը համոզված է, որ ԼՂ վերաբերյալ եռակողմ պայմանավորվածությունների իրագործումն այլընտրանք չունի, ու այժմ ջանքեր են գործադրվում՝ լարվածությունը թուլացնելու և սահմանին իրավիճակը շտկելու համար։

ՌԴ ԱԳՆ խոսնակ Մարիա Զախարովան՝ պատասխանելով Շուշիի Ղազանչեցոց եկեղեցու գմբեթի հանման ու ԼՂ-ում մշակութային ժառանգության պահպանման մասին հարցին, ասել է , որ ԼՂ-ում և հարակից շրջաններում պատմամշակութային ժառանգության պահպանման թեման կանոնավոր քննարկվում է ինչպես պաշտոնական Բաքվի, այնպես էլ պաշտոնական Երևանի հետ շփումների ժամանակ։

ԱՄՆ-ի պետքարտուղար Էնթոնի Բլինքենը Ֆրանսիայի արտաքին գործերի նախարար Ժան-Իվ Լը Դրիանը հեռախոսազույց են ունեցել, որի ընթացքում անդրադարձել են նաև ԼՂ հակամարտությանը։
Մայիսի 16-ին ԱԳ նախարարի պաշտոնակատար Արա Այվազյանը հեռախոսազրույց է ունեցել Ֆրանսիայի ԱԳ նախարար Ժան-Իվ Լը Դրիանի հետ,։ Զրուցի ընթացքում անդրադարձ է կատարվել  ԼՂ հակամարտությանը և այս ուղղությամբ կարևորվել  ԵԱՀԿ Մինսկի խմբի համանախագահության ակտիվ դերակատարությունը:

ՀՀ ԱԳՆ խոսնակ Աննա Նաղդալյանը հայտարարել է, որ ՀՀ և Ադրբեջանի Հանրապետության միջև սահմանների սահմանագծման և հետագայում սահմանազատման գործընթացները պետք է մաս կազմեն հակամարտության համապարփակ խաղաղ կարգավորման գործընթացի, որի շրջանակներում առաջնային կերպով պետք է հասցեագրվեն Արցախի Հանրապետության տարածքների դեօկուպացիայի և Արցախի վերջնական իրավական կարգավիճակի որոշման հարցերը՝ ԵԱՀԿ Մինսկի խմբի համանախագահության հովանու ներքո:

Թուրքիայի արտգործնախարար Մևլյութ Չավուշօղլուն հեռախոսազրույց է ունեցել Ադրբեջանի արտգործնախարար Ջեյհուն Բայրամովի հետ: ԱԳ նախարարները կարծիքներ են փոխանակել ԼՂ  վերջին զարգացումների շուրջ:

ԵՄ պաշտոնական կայքից տեղեկանում ենք, որ Հարավային Կովկասում կայունությունն ամրապնդելու և խաղաղություն հաստատելու համար Եվրահանձնաժողովը լրացուցիչ 10 մլն եվրո մարդասիրական օգնություն կհատկացնի` աջակցելու ԼՂ-ում և դրա շուրջ հակամարտության հետևանքով տուժած քաղաքացիներին:

Կանադայի ԱԳ նախարար Մարկ Գարնոն հայտարարել է , որ Կանադայի իշխանությունները 1 միլիոն կանադական դոլար (830 հազար ԱՄՆ դոլար) են հատկացրել Կարմիր խաչի միջազգային կոմիտեին (ԿԽՄԿ) ՝ ԼՂ հակամարտությունից տուժածներին մարդասիրական օգնություն ցուցաբերելու համար»: