Ձեր վստահելի աղբյուրը

«Եթե դու ինքդ ոչինչ չես անում, դու ի՞նչ հարցով ես դիմում ՀԱՊԿ-ին: Վերջը պետությու՞ն ենք, թե՞ ոչ, ի վերջո արժանապատվություն, ինքնասիրություն ունե՞նք, թե՞ ոչ»,- ասուլիսում ասաց «Հայաստան» նախընտրական դաշինքի առաջնորդ, ՀՀ երկրորդ նախագահ Ռոբերտ Քոչարյանը՝ պատասխանելով հարցին, թե արդյո՞ք պետք էր դիմել ՀԱՊԿ-ին, արդյո՞ք իշխանությունը ճիշտ հոդվածով է դիմել:

Շարունակելով իր խոսքը՝ Ռոբերտ Քոչարյանն ասաց. «Եթե դու ինքդ ոչինչ չես ձեռնարկում ու մտածում ես, որ քո տեղը ուրիշը գալու է և այս հարցը լուծի, ուղղակի մենք աբսուրդի ժանրից ենք խոսում»:

Նա համոզմունք հայտնեց, որ ՀԱՊԿ-ի պամության մեջ նման դրսևորումներ չեն եղել.
«Եթե դու ոչինչ չես անում քո հարցերը լուծելու համար, քեզ ոչ մեկը չի օգնելու այդ հարցերի լուծման համար: Ակնհայտ բանաձև է»,- ասաց Ռոբերտ Քոչարյանը:

Նա նշեց, որ իշխանության կողմից որևէ քայլ չի արվել, բացի սեփական ժողովրդին մոլորեցնելու փորձից:

«Իրավաբանը կոնկրետ կասի՝ Հայաստանի տարածքային ամբողջականության խաթարում է և քրեորեն պատժելի արարք է, և այս մեղքը, այս քրեական հոդվածն այս իշխանությունների վրա է: Առաջին հարցը պետք է հետևյալը լինի՝ ի՞նչ եք արել դա թույլ չտալու համար»,- ասաց Ռ.Քոչարյանը:

«Հայաստան» դաշինքի նախընտրական կենտրոնական շտաբի պաշտոնական ներկայացուցիչ, իրավաբան Արամ Վարդևանյանն ասաց, որ Հայաստանի Քրեական օրենսգրքով նախատեսված է  որպես հանցագործություն ՀՀ տարածքային ամբողջականությունը, պետական սահմանները խախտելը, ապա տեղեկացրեց, որ ՀՀ դատախազության կողմից 14 օր առաջ հարուցվել է  քրեական գործ և ոչ մի գործողություն դրա վերաբերյալ չի  ձեռնարկվել: