Ձեր վստահելի աղբյուրը

«Այս իշխանությունը չի կատարել ոչ մի խոստում: Իրականում չկա որևէ կետ, որ կարող է վերցնել և թմբկահարել, որ խոստացել և արել ենք։ Զրոյական արդյունք»,-  Արմավիրի մարզում համախոհների հետ հանդիպմանն ասել է ՀՀ երկրորդ նախագահ, «Հայաստան» նախընտրական դաշինքի ցուցակը գլխավորող Ռոբերտ Քոչարյանը:

Նա նշել է, որ այս իշխանության շրջանակում չկան մարդիկ, որոնք հեղինակություն են վայելում իրենց փողոցում, շենքում, բակում, ուղղակի չկան. «Մարդիկ, որոնք համակերպվել են ուսապարկ լինելու կարգավիճակի հետ, և այդ մարդիկ պետք է համոզեն մեր քաղաքացիներին, որ երկրի ապագան հուսալի ձեռքերում է։ Չեմ կարծում, որ սա որևէ հեռանկար ունի իրենց համար։

Եվ, իհարկե, այս պատերազմի աղետալի հետևանքները։ Այսպես այս պատերազմը չպետք է ավարտվեր։ Սա իմ խորին համոզմունքն է և սրա համար մարդիկ պետք է պատասխանատվություն կրեն»։

Ռոբերտ Քոչարյանը հարցադրում է արել, թե ի՞նչն է դժվարացնում իրենց աշխատանքը:

«Այս մարդիկ սրբություն չունեն, այս մարդիկ ստելու հետ որևէ խնդիր չունեն՝ խղճի, գիտակցության, հայրենասիրության։ Այս մարդիկ համադրելի չեն իշխանական կառույցում որևէ դերակատար լինելու հետ։ Բայց, այնուամենայնիվ, մենք դեռ ունենք մեր ժողովրդի, մեր քույր ու եղբայրների մի զանգված, ես համարում եմ՝ մոլորված զանգված, որը դեռ հավատում է։ Ու ամենադժվար աշխատանքը լինելու է այդ մարդկանց փորձել համոզել, դարձի բերել։ Դժվար է լինելու, քանի որ մարդիկ ժամանակին ոգևորությամբ մասնակցել են 2018 թվականի փոփոխություններին, և այսօր չեն կարողանում, չեն ուզում, դժվարանում են ընդունել, որ այս ամենը բերեց երկրի համար աղետալի հետևանքների։

Մենք պետք է այդ մարդկանց օգնենք ընտրել ճիշտ ճանապարհը։ Իսկ այդ ճանապարհը հայրենասիրությունն է, Հայաստանի Հանրապետությունն է, մեր ժողովուրդն է իր ազգային շահով»,-  ասել է Ռոբերտ Քոչարյանը:

ՀՀ երկրորդ նախագահը դիմելով իր համախոհներին՝ նշել է. «Հիմա այսպիսի խնդիրներ են մեր առջև։ Մեր հույսն այդ աշխատանքներում մենք կապում ենք հենց ձեզ հետ։ Ձեր աչքերի մեջ տեսնում եմ վճռականություն և ամեն ինչ փոխելու տրամադրություն։ Վստահ եղեք, ամեն ինչ լավ է լինելու»: