Ձեր վստահելի աղբյուրը

«Հայաստանում ստեղծված տնտեսական ճգնաժամը անարդյունավետ կառավարման հետևանք է։ Հենց դա է, որ տապալել է մեր տնտեսությունը»,-նման համոզմունք հայտնեց  «Լույս» հիմնադրամի տնտեսական հետազոտությունների ղեկավար Սոնա Ղարիբյանը։

Նա մասնակցում է «Պատիվ ունեմ» նախընտրական դաշինիքի՝ տնտեսական հարցերի վերաբերյալ հրավիրած կլոր սեղան-քննարկմանը։

Տնտեսագետը ցավով  փաստեց, այն կադրերը, որ պետք է լինեին Հայաստանի տնտեսության կողքին, պետական մարմիններում չեն։ Իրավիճակից դուրս գալու որպես առաջին քայլ նա նշում է մոտեցումների փոփոխությունը, պետական ապարատը փորձառու մասնագետներով համալրելը։

«Այս տարվա բյուջեում ընդհանրապես հաշվի առնված չեն անցած տարի գրանցված շոկեր։ Ծախսերը ձևակերպված են առանց այդ խնդիրները հաշվի առնելու։ Այս տարվա առաջին եռամսյակի վերաբերյալ հրապարակված ցուցանիշներն էլ վկայում են, որ այս իշխանությունը շարունակում է իր սխալ քաղաքականությունը, չի ճշգրտում ծախսերը՝ ըստ առաջնահերթությունների»,-նշեց նա։

Քննարկմանը մասնակցող տնտեսագետ Աշոտ Մարկոսյանն էլ հայտարարեց, համաձայն չէ այն տարածված կարծիքի հետ, որ Հայաստանը քիչ ռեսուրսներ ունի։ Հակառակի մասին վկայում է 2020 թ. արտահանման կառուցվածքը, որտեղ արտահանվող արտադրանքի մեծ բաժին՝  30.500 տոկոսը կազմում է հանքահումքային արտադրանքը, ինչը կազմում է 800 մլն դոլար։ Ըստ տնտեսագետի, սա 2.2 անգամ մեծ թիվ է աշխարհում մեկ բնակչի հաշվով միջին ցուցանիշից։

«Մենք չպետք է մոռանանք, որ տնտեսության զարգացման գլխավոր նպատակը սոցիալական խնդիրների լուծումն է։ Սոցիալ-տնտեսական խնդիրները սուր են, սուր էին նաև երեք տարի առաջ, քանի որ այն ինչ տեղի ունեցավ, կապված էր սոցիալական խնդիրների հետ։ Բնականաբանար այստեղից առաջանում է սոցիալական համերաշխության խնդիրը»,-ասաց Մարկոսյանը՝ ընդգծելով, որ այս խնդրին պետք է պատշաճ ուշադրություն դարձվի։

Քննարկման մասնակից, էկոնոմիկայի նախկին նախարար, Նիդերլանդներում  ՀՀ նախկին դեսպան Գարեգին Մեքոնյանը նկատեց՝ ցանկացած թեմայի շուրջ քննարկման, կանխատեսում անելու համար կա մի կարևոր նապայման, դա  երկրի անվտանգությունն է, երկրի կանխատեսելի կայուն կառավարումն ու Հայաստանում այնպիսի միջավայրի ձևավորումը, որտեղ հնարավոր է կիրառել տարբեր ոլորտներում մշակված քաղաքականություն։

«Ես ի նկատի ունեմ հանրային հասարակական համերաշխության որոշակի ընդունելի մակարդակի ձևավորում»,-ասաց նա՝ ավելացնելով, որ որևէ հարցի, ծրագրի քննարկում հնարավոր կլինի միայն այն պարագայում, երբ փոխվի իրավիճակն ու միջավայրը։

Նախկին նախարարի խոսքով, անելիքների մասին խոսելիս ծրագրերը պետք է բաժանել հրատապ-կարճաժամկետի և միջնաժամկետ, կայուն, երկարաբնույթ անելիքներ։

«Առավել հրատապ լուծում է պահանջում պետական կառավարման համակարգի վերականգնումը։ Այսօր Հայաստանի Հանրապետությունում տնտեսության ոլորտում պետական համակարգը որպես այդպիսին գրեթե չի գործում»,-ընդգծեց նա` ավելացնելով, որ 2019-ին գրացված դրական արդյունքները որևէ կապ չունեին այս կառավարության իրականացրած տնտեսական քաղաքականության հետ։

Նախկին պաշտոնյան պնդում է, այսօր Հայաստանում տնտեսական քաղաքականություն չի իրականացվում, չեք գտնի որևէ ոլորտ, որտեղ կա մշակված հայեցակարգ, որևէ բնագավառ, որտեղ իրականացվում է բարեփոխումների ծրագիր։

Քննարկմանը կարող եք հետևել News.am-ի հեռարձակմամբ։