Ձեր վստահելի աղբյուրը

ՀՀ երկրորդ նախագահ, «Հայաստան» նախընտրական դաշինքի ցուցակը գլխավորող Ռոբերտ Քոչարյանի համար անհասկանալի է, թե ինչու է հիմա ՀՀ  քաղաքացիություն ստանալու գործընթացը տևում 1-3 տարի:

«Հայաստանի Հանրապետության առաջին Սահմանադրությունն ուղղակի արգելում էր երկքաղաքացիությունը։ Բավական մեծ ջանքեր գործադրեցինք և առաջին սահմանադրական բարեփոխումների ընթացքում այդ արգելքը հանել ենք, այլ երկրի քաղաքացիները հնարավորություն են ստացել ստանալ Հայաստանի քաղաքացիությունը: Բավականին պարզեցված կարգով էր դա արվում:

Ինձ համար զարմանալի է, որ ասում եք՝ 1-3 տարի է անհրաժեշտ Հայաստանի քաղաքացիություն ձեռք բերելու համար: Այդ հարցը կարելի է շատ հեշտ պարզեցնել»,- Արմավիրի մարզում համախոհների հետ հանդիպմանն ասել է Ռոբերտ Քոչարյանը:

Նա նշել է՝ կարող է միանշանակ խոստանալ, որ քաղաքացիություն ստանալու գործընթացը կարելի է պարզեցնել և սարքել ընդամենը մի քանի ամսվա հարց։

«Եթե այդ մարդը հայ է, ի՞նչ խնդիր ունես: Սա էր դրված մեր սահմանադրական բարեփոխումների հիմքում: Հայ լինելու հանգամանքը բավարար է Հայաստանի քաղաքացիություն ստանալու համար, հիմա երեք տարի ստուգում են՝ հա՞յ ես, թե՞ չէ։ Ինձ համար հասկանալի չէ, թե  ինչու է տևում այդքան երկար»,- ասել է ՀՀ երկրորդ նախագահը։

Ռ. Քոչարյանի խոսքով, երկրի քաղաքացի չլինել և մասնակցել այդ երկրի հանրապետական ընտրություններին, մի փոքր վիճահարույց հարց է, քննարկման հարց է։ Ըստ նրա, տեղական ինքնակառավարման մարմինների, եթե ռեզիդենտ ես, այդտեղ բնակվում ես,  ընտրություններին մասնակցելը խնդիր չէ։

«Հիմա այլ կարգի խնդիր ունենք. Հայաստան Հանրապետության քաղաքացիություն ունեցող մարդը, որ գտնվում է այլ երկրում, չի կարողանում քվեարկի: Եղել է, այսօր չկա: Ինձ համար անհասկանալի է: Նախկինում նման քվեարկություններ կազմակերպվում էին մեր հյուպատոսությունների տարածքում։

Սա, անկասկած, պետք է վերականգնվի»,- ասել է ՀՀ երկրորդ նախագահը: