Ձեր վստահելի աղբյուրը

«Եթե այդքան իրարից տարբեր գաղափարախոսություն ունեցող քաղաքական ուժեր մեկ ցանկով մասնակցեին ընտրության, այդ միավորումն, ակնհայտ է, չէր ստացվելու»,- ասուլիսում ասաց «Հայաստան» դաշինքի մաս կազմող ՀՅԴ ԳՄ ներկայացուցիչ Իշխան Սաղաթելյանը՝ անդրադառնալով այն հարցերին, թե ինչո՞ւ ընդդիմությունը միասնական հանդես չեկավ հունիսի 20-ին կայանալիք ԱԺ արտահերթ ընտրություններում:

Ըստ նրա, այստեղ շատ կարևոր է՝ ընտրություններին մասնակցող քաղաքական ուժերը, ընդդիմադիր դաշտի իրական ուժերը շատ հստակ հայտարարեն, որ որևէ պարագայում գործող իշխանության հետ որևէ ձևաչափով չեն համագործակցելու:

«Մեր դաշինքն այդ առումով հայտարարություն արել է, «Պատիվ ունեմ» դաշինքն արել է, սպասում ենք մյուս ընդդիմադիր քաղաքական ուժերին, որ հենց այս գլխից այդ մասին հայտարարեն, որպեսզի վաղը, մյուս օրը մեր քաղաքացիների համար հնարավոր  համագործակցություններն անակնկալ չլինեն»,- ասաց Ի. Սաղաթելյանը:

Ինչ վերաբերում է ընտրությունները չեղարկելուն, նա նշեց, որ երբ պայքարում էին  փողոցում և ասում էին՝ ստեղծված  իրավիճակից ելքը վարչապետի պաշտոնանկությունն է, շատ քաղաքական ուժեր ասում էին՝ խնդիրը պետք է լուծվի ընտրությունների միջոցով:

«Հիմա եկել,  հասել ենք այստեղ, արդեն ԿԸՀ ենք ներկայացնում ընտրացուցակները, ամբողջ պրոցեսը գնում է  այդ ուղղությամբ, հայտարարում են՝ ընտրությունները ելք չեն: Այդ դեպքում ո՞րն է  ելքը: Թողնենք, որ այս մարդը շարունակի պաշտոնավարե՞լ ու երկիրը վերջնականապես տանի՞ անդունդ, կործանում:

Նրանք, ովքեր ասում են ընտրությունը ելք չէ, պետք է առաջարկեն՝ ո՞րն է ելքը: Եթե ելքը տեսնում են այս իշխանությունը շարունակի պաշտոնավարել, մենք այդ ելքը չենք տեսնում, րոպե առաջ, այս պարագայում ընտրությունների միջոցով, պետք է հեռացնենք այս իշխանություններին»,- ասաց ՀՅԴ ԳՄ ներկայացուցիչը:

Ըստ նրա, ամենակորևորն այն է, որ ընդդիմադիր դաշտն ընտրություններին  մասնակցի «առանց Նիկոլ Հայաստան» կարգախոսով. «Եթե այս իմաստով մեր բոլորի թիրախն ինքն է, գնահատականների հարցում գտնում ենք, որ այս կառավարությունը չարիք է, պետք է հեռանա, թող հայտարարեն, գնանք առաջ ու այս ճանապարհով ազատվենք այս իշխանությունից, երկիրը բերենք բնականոն զարգացման»:

Ասուլիսին ներկա «Հայաստան» նախընտրական դաշինքի առաջնորդ, ՀՀ երկրորդ նախագահ Ռոբերտ Քոչարյանն ասաց, որ մասնակցության ֆորմատը տրամաբանական առումով պետք է աշխատունակ լինի:

«Տեսականորեն պատկերացնենք, որ ամբողջ ընդդիմադիր դաշտը միացել է, ընտրություններին  մասնակցոմ է միասնական ցուցակով: Ձեզ մոտ հարց չէր առաջանա՝ հետո ո՞նց եք աշխատելու, այդ  ֆորմատով ինչպե՞ս եք երկիր կառավարելու: Այդ դեպքում դուք, իրոք, իրավունք կունենայիք ասելու, որ ձեր նպատակն ուղղակի մեկ մարդու հեռացնելն է, ոչ թե երկրի առջև կանգնած խնդիրները լուծելը:

Ֆորմատը տրամաբանական առումով պետք է աշխատունակ լինի: Չեմ պատկերացնում նման կարգի լայն միավորման ֆորմատի արդյունավետությունը հետագայում:

Գնում ենք ընտրությունների կրելու համար և մտածում ենք, թե հետո ինչպես պետք է կատարենք մեր խոստումները, ինչպես պետք է շտկենք իրավիճակը»,- ասաց Ռոբերտ Քոչարյանը: