Ձեր վստահելի աղբյուրը

««Ազատ Հայրենիք» դաշինքը ստեղծվել է 5 կուսակցությունների համատեղ  ջանքերով։ Մեր ցուցակը գլխավորելու է «Պահպանողական կուսակցության» նախագահ Միքայել Հայրապետյանը, նա ԱԺ նախագահի մեր թեկնածուն է»,- հունիսի 20-ին կայանալիք արտահերթ խորհրդարանական ընտրություններին  մասնակցելու համար ԿԸՀ անհրաժեշտ փաստաթղթերը ներկայացնելու ժամանակ լրագրողներին ասաց «Հայ կառուցողական» կուսակցության նախագահ, «Ազատ Հայրենիք» դաշինքի անդամ Անդրեաս Ղուկասյանը:

Դաշինքի մեջ ընդգրկված են՝ Հայ կառուցողական կուսակցություն, Ազգային ինքնորոշում միավորում, Ազգային ժողովրդավարների դաշինք,«Հայաստանի կանաչների կուսակցություն, Հայաստանի պահպանողական կուսակցություն:

Ա. Ղուկասյանը նշեց, որ ցուցակի երկրորդ համարն ինքն է, նաև իրենց դաշինքի վարչապետի թեկնածուն է, երրորդ համարը Ազգային ինքնորոշում միավորումից Աննման Խաչատրյանը:

«Պետք է ասեմ, որ Պարույր Հայրիկյանն չի առաջադրվում, բայց իր կուսակցությունն ակտիվ դերակատարում ունի  այս քաղաքական նախաձեռնության մեջ»,- ասաց Ա. Ղուկասյանը:

Նա հայտնեց, որ իրենց  դաշինքի որոշումն այն է, որ ոչ մի դեպքում կոալիցիա չենք կազմի ոչ «Քաղաքացիական պայմանագրի» հետ, ոչ ՀՀ երկրորդ նախագահ Ռոբերտ Քոչարյանի և նրա համախոհների հետ։

«Մենք գտնում ենք, որ այսօր կա հնարավորություն ունենալ արժանի ընտրություն։ Մեր քաղաքացիների զգալի մասը դեռ կողմնորոշված չէ, մեր նպատակն է մեր քաղաքացիների համար ստեղծել արժանի ընտրություն: Դրան է ուղղված մեր ջանքերը»,- ասաց Անդրեաս Ղուկասյանը:

Նա նշեց, որ իրենք հանդես են գալիս մի ծրագրով, որը, իրենց կարծիքով, ՀՀ առջև ծառացած գլխավոր խնդիրներին՝  անվտանգություն, Արցախի կարգավիճակ, տնտեսության զարգացում, տալիս է արմատական լուծում, որը դեռևս չի եղել:

«Մենք կողմ ենք, որպեսզի Հայաստանը փոխի իր աշխարհաքաղաքական վեկտորը  անվտանգության համակագում, հանդես ենք գալիս Ֆրանսիայի հետ  ռազմաքաղաքական պայմանագիր կնքելու օգտին:

Գտնում ենք, որ Հայաստանը պետք է ճանաչի Արցախի Հանրապետությունը,  ջանքեր գործադրի  որպեսզի Արցախի Հանրապետության միջազգային ճանաչումը ամրագրի հայերի իրավունքն Արցախում:

Մենք համարում ենք, որ Հայաստանի տնտեսությունն այլևս չպետք է կախում ունենա օլիգարխներից, արտասահմանյան ներդրումները պետք է փոխեն իրադրությունը մեր երկրի տնտեսական զարգացման հարցում»,- ասաց Ա. Ղուկասյանը: