Ձեր վստահելի աղբյուրը

«Ազգային-ժողովրդավարական բևեռ» կուսակցության ներկայացուցիչ Վահե Գասպարյանը հունիսի 20-ին կայանալիք արտահերթ խորհրդարանական ընտրություններին  մասնակցելու  համար ԿԸՀ անհրաժեշտ փաստաթղթերը ներկայացնելու ընթացքում լրագրողներին հայտնեց , որ Ժիրայր Սեֆիլյանը ցուցակում չկա։

 «Ժիրայր Սեֆիլյանն այս ցուցակում չկա, քանի որ քաղաքացիության ժամկետը չի ներում՝ ցուցակում ընդգրկվելու համար։ Բայց նա ակտիվ կմասնակցի քարոզարշավին»,- ասաց նա և թվեց ցուցակը գլխավորած անձանց․

«Ցուցակը գլխավորում են Վահե Գասպարյանը, Վարուժան Ավետիսյանը, Կառա Չոբանյանը, Գարեգին Չուքազյանը, Արեգ Կյուրեղյանը և այլք»։

Նրա խոսքով ՝ հայտարարել են  քաղաքական Սարդարապատ, որի իմաստը կայանում է ՝ժողովրդին մոբիլիզացնելու մեջ։

«Երկրում ստեղծվի անցումային կառավարություն, որը պետք  է կատարի անցումային շրջանի տրմաբանությունից  և պահանջներից բխող կետերը»,-ասաց Գասպարյանը և ավելացրեց, որ դրանց թվում են նաև նոր սահմանադրության և նոր օրենքների ընդունումը։

«Ընտրություններին մասնակցելը մեզ համար ոչ թե նպատակ է, այլ միջոց՝ մեր նպատակին հասնելու։ Այն է՝ ստեղծել  ազգային իշխանություն, ինքնիշխան ազգային ժողովրդավար պետություն, որը կհռչակի 1-ին հանրապետության իրավահաջորդությունը և կդիմի պաշտոնապես ԱՄՆ-ին՝ ՆԱՏՕ-ի գլխավոր դաշնակից կարգավիճակ ստանալու համար»,- ասաց կուսակցության ներկայացուցիչը։

Ինչ վերաբերում է այլ կուսակցությունների հետ կոալիցիա կազմելուն, ապա Վահե Գասպարյանը հայտնեց,որ կոալիցիա կկազմեն միայն այն ուժերի հետ , որոնք կիսում են իրենց գաղափարները։

«Որևէ նախկին և ներկա իշխանությունների հետ մեր համագործակցությունը բացառվում է»,- ավելացրեց նա։