Ռուս խաղաղապահները մարդասիրական օգնություն են փոխանցել Արցախի օկուպացված տարածքներից բռնագաղթվածներին

Քաղաքական 09:50 26/05/2021 Արցախ

Ռուս խաղաղապահները մարդասիրական օգնություն են փոխանցել Արցախի օկուպացված տարածքներից բռնագաղթվածներին

Արցախում Ռուսաստանի խաղաղապահ զորախմբի զինծառայողներն ապահովել են Ռուսաստանի հասարակական կազմակերպությունների և բարեգործական հիմնադրամների կողմից տրամադրված մարդասիրական օգնության առաքումը Արցախի Մարտակերտի շրջանի Խնկավան և Չափար հեռավոր բնակավայրեր: Ընդհանուր առմամբ, երկու գյուղերում այժմ ապրում է շուրջ 1000 մարդ: Նրանցից շատերը օգնության կարիք ունեն: Հաղորդում է ՌԴ ՊՆ-ն:

Ռուսաստանի պաշտպանության գերատեսչության տարածած հաղորդագրության մեջ ասվում է, որ մարդասիրական ակցիայի ընթացքում ռուս խաղաղապահները բռնագաղթվածներին և բազմազավակ ընտանիքներին հանձնել են երեխաների համար անհրաժեշտ պարագաներ, կենցաղային իրեր, հագուստ, հիգիենայի միջոցներ, խաղալիքներ և մանկասայլակներ:

«Այսօր ռուս խաղաղապահները օգնություն են ցուցաբերել Արցախի Մարտակերտի շրջանի երկու ամենահեռավոր բնակավայրերի բնակիչներին: Մարդասիրական գործողություններն իրականացվել են հիմնականում բնակիչներին հագուստ, առաջին անհրաժեշտության իրեր և դեղամիջոցներ ապահովելու միջոցով»,- ասել է Իգոր Սիվակովը՝ Ռուսաստանի խաղաղապահ զորախմբի մարդասիրական արձագանքման կենտրոնի ղեկավարը և հավելել. «Բացի բռնագաղթածներից, օգնություն են ստացել նաև բազմազավակ ընտանիքները, որոնք բավականին մեծ թիվ են կազմում երկու բնակավայրերում»:

«Կենցաղային պարագաներից և այլ ապրանքներից բացի, ընտանիքներին տրվել են նաև անհատական բժշկական պարագաներ, որոնք պարունակում են ամենաառաջնային դեղերի և վիրակապերի հավաքածու:

Ընդհանուր առմամբ, ռուս խաղաղապահները Արցախի բնակիչներին են հանձնել շուրջ 155 տոննա հումանիտար օգնություն, որոնք Հայաստան են առաքել ռուսական բարեգործական կազմակերպություններն ու հիմնադրամները»,- ասված է հաղորդագրության մեջ:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: