Ձեր վստահելի աղբյուրը

«Վիճակը կարծես թե անկառավարելի է՝ ունենք զոհ, գերեվարված զինվորներ, նոր տեղեկատվություն տարածվեց, որ կրակոցներ են հնչում Գեղարքունիքի հատվածում»,- ԱԺ-ում լրագրողների հետ ճեպազրույցում ասաց պատգամավոր Նաիրա Զոհրաբյանը:

Նա նշեց, որ արտահերթ նիստ հրավիրելու համար ԱԺ-ում ստորագրահավաք է սկսվել, թեև սպասումներ չունի այդ  նիստից:

«Շատ կուզեմ, որ Փաշինյանը չգա, առաջարկել եմ չհրավիրել, քանի որ նա օգտագործելու է  ցանկացած հարթակ խոսելու ամեն ինչի մասին, բացի բուն խնդրից: Առաջարկել եմ  գան կոնկրետ այս իրավիճակի պատասխանատուները՝ պաշտպանության նախարար, Գլխավոր շտաբի պետ, կորպուսի հրամանատարներ, բայց ոչ Նիկոլ Փաշինյանը»,- ասաց Ն.Զոհրաբյանը:

Հարցին՝ երեկվանից Փաշինյանը մեղադրանքի սլաքներն ուղղում է ՀԱՊԿ-ի ուղղությամբ, դժգոհում են, որ պատշաճ չի արձագանքը, ինչո՞վ եք բացատրում  Փաշինյանի այդ դժգոհությունը, պատգամավորն ասաց. «Նիկոլի ձեռագիրն է՝ բոլորը մեղավոր են, բացի իրենից, 44 օրվա պատերազմի  համար մեղավոր էին բոլորը՝ ծնողները, զինվորները, կամավորները, պայմանագրային ծառայողները, բացի իրենից: Կարծում եմ՝ երկրի ղեկավարը, ով չի կարողանում լուծել իր զինվորի անվտանգության խնդիրը, րոպե առաջ պետք է հեռանա: ՀԱՊԿ-ը, ինչպես տեղեկացանք ՀԱՊԿ հայտարարությունից, իր պայմանագրային պարտականությունները կատարում է: Ես չգիտեմ, թե Փաշինյանն ինչ է ուզում ՀԱՊԿ-ից: Մի բան կարող եմ գնահատել՝ իշխանությունը, որ ի զորու չէ  ապահովել իր երկրի սահմանների անվտանգությունը, դիմում է  բոլորին, կառչում է բոլորից, մեղադրում է  բոլորին, այդ իշխանությունը րոպե առաջ պետք է հեռանա»:

Նաիրա Զոհրաբյանը նաև դիմեց ընդդիմադիր ուժերին՝ ինչու են լռում:

«Ամեն մեկդ, որ զբաղված եք բուկլետ ու պլակատ տպելով, հասկանո՞ւմ եք, որ վաղը կարող է ուշ լինել, ու ձեր քարոզարշավը, բուլկետը որևէ մեկին պետք չլինի: Ընդդիմությունը հիմա պետք է լիներ փողոցում, արտահերթ հավաք հրավիրեր, ժողովրդին ներկայացներ իրավիճակը, պարտադրեին Փաշինյանի հրաժարականը, քանի որ այդ մարդն այլևս  ունակ չէ ադեկվատ բանակցություններ վարել:

Հիմա  անելիքը քաղաքական ուժերինն է, առաջին հերթին ընդդիմությանը, քանի որ Հայաստանում այլևս իշխանություն չկա, Հայաստանում կա մեկ մոլագար պոպուլիստ, որն այսօր Հայաստանի ազգային անվտանգությունը, տարածքային ամբողջականությունը վտանգում է: Ընդդիմության լռությունը, պլատա, բուլետ տպելու փուլն ինձ համար հասկանալի չէ»,- ասաց նա:

Ըստ Ն. Զոհրաբյանի, հիմա  պոպուլիստական հայտարարություններ չի անի, որ եթե Փաշինյանը չլինի, վաղը Շուշին, Հադրութը վերադարձվելու է, սահմանային միջադեպերը դադարելու են. «Բայց գոնե հույս ունեմ, որ կունենանք ադեկվատ  քաղաքական իշխանություն, որը չի դառնա հարևան երկրում զավեշտի առարկա, կկարողանա ադեկվատ, արժանապատաիվ բանակցություններ վարի:

Մեր այսօրվա հիմնական պրոբլեմն այն է, որ Հայաստանը չունի արժանապատիվ բանակցող: Երբ որ կունենա, վստահ եմ, լուծվելու են այդ խնդիրները»:

Նաիրա Զոհրաբյանի խոսքով, եթե Նիկոլ Փաշինյանը վերարտադրվի, ինչին, չնայած, չի հավատում, կնշանակի՝ «մենք ձեզ հետ, ցավոք սրտի, ականտեսը կլինենք Հայաստանի պետականության վերջին էջի շրջմանը»:

«Ամեն ինչ անելու եմ որպես դեռևս պատգամավոր, որպես քաղաքական գործիչ, որպես քաղաքացի, որ Նիկոլն ու նիկոլականությունը հունիս 20-ին Հայաստանում փակեն  իրենց վերջին էջը»,- ասաց Նաիրա Զոհրաբյանը: