Ձեր վստահելի աղբյուրը

Արցախի տարածքում ռազմական գործողությունների ավարտից հետո շփման գծին մոտ են հայտնվել գյուղատնտեսական նշանակության հողերի զգալի տարածքները: Հաշվի առնելով այն փաստը, որ տեղի բնակչությունը վախենում է նման տարածքներում գյուղատնտեսական աշխատանքներ իրականացնել՝ Ռուսաստանի խաղաղապահ զորակազմի մարդասիրական արձագանքման կենտրոնն անվտանգության ապահովման համար նրանցից դիմումներ է ընդունում, որոնք բավարարվում են ըստ առաջնահերթության: Այս մասին ասվում է ՌԴ ՊՆ տարածած հաղորդագրության մեջ:

Ըստ ՌԴ ՊՆ-ի՝ նախօրեին Հումանիտար արձագանքման կենտրոնի զինծառայողներն ապահովել են Նախիջևանիկ և Սարաղբյուր բնակավայրերի մոտակայքում հակահրդեհային գոտու ստեղծման աշխատանքների անվտանգությունը:

«Ռուս խաղաղապահները ապահովում են Արցախի Ասկերանի և Ակնայի շրջանների շփման գծի երկայնքով հակահրդեհային պաշտպանիչ գոտի ստեղծելու աշխատանքների անվտանգությունը»,-ասել է Մարդասիրական արձագանքման կենտրոնի ներկայացուցիչ Դմիտրի Պերեպելկինը և հավելել.  «Տեղի բնակիչների խոսքով՝ այստեղ ամեն տարի խոտածածկի բռնկումներ են տեղի ունենում, և հակահրդեհային գոտու առկայությունը նվազագույնի կհասցնի կրակի անվերահսկելի տարածման ռիսկերը»:

«Մենք դիմեցինք ռուս խաղաղապահներին՝ հակահրդեհային գոտի  բացելու նպատակով անվտանգություն ապահովելու խնդրանքով: Եվ այսօր մենք երախտապարտ ենք ռուս խաղաղապահներին՝ այն տրամադրելու համար »,-ասել է Սարաղբյուրի գյուղապետ Գարիկ Ալեքսանյանը:

«Խաղաղ կյանքը վերականգնելու, այդ թվում `Արցախի շփման գծի մերձակայքում գտնվող գյուղատնտեսական նշանակության հողերում` դաշտերում և տնկարկներում ռուս խաղաղապահները մեծ աշխատանք են իրականացնում ականների վտանգները վերացնելու և տարածքը պայթուցիկ առարկաներից մաքրելու ուղղությամբ:  2020-ի նոյեմբերի 23-ից ի վեր Արցախի մարդասիրական ականազերծման ինժեներական վաշտը չպայթած զինամթերքից մաքրել են 2,121 հա տարածք և ավելի քան 650 կիլոմետր ճանապարհներ, հայտնաբերել և վնասազերծել 25,613 պայթուցիկ առարկա»,-ասվում է հաղորդագրության մեջ: