Ձեր վստահելի աղբյուրը

«Գրանցվել են մի շարք միջադեպեր, երբ թե՛ մեր, թե՛ ադրբեջանցի զինծառայողները ձեռնամարտի են բռնվել, մեջքին առ վիճակում ունենալով հաստիքային զենքերը և նույն իրավիճակը սկսվել է նաև այսօր առավոտյան արձանագրված գործողության ընթացքում»,- հրավիրված մամուլի ասուլիսում հայտնեց ՀՀ ԶՈ ԳՇ պետի տեղակալ Էդվարդ Ասրյանը:

Նման վարքագիծը բարձրաստիճան զինվորականը բացատրեց նրանով, որ 16 օր է, ինչ ՀՀ ռազմաքաղաքական ղեկավարությունը ստեղծված իրավիճակը փորձում է հարթել առանց զենքի ու ուժի կիրառման:

Նրա պատմելով՝ այսօր առավոտյան ադրբեջանցիները մոտեցել են մեր 4 զինծառայողների, որոնք  կատարել են համապատասխան աշխատանքներ, զենքերն ուղղելով նրանց վրա՝ հրամայել են հանձնվել և մյուս երկու հայ զինծառայողները, որոնք գտնվել են որոշակի հեռավորության վրա բանակցային գործընթաց սկսելու նպատակով մոտեցել են հակառակորդին:

«Բայց, փաստորեն, հակառակորդը լինելով նենգ, դավադիր, որդեգրած լինելով իր նենգ քաղաքականությունը, զինաթափել և գերեվարել են մեր 6 զինծառայողներին»,- հայտնեց Ասրյանը:

Նրա խոսքով՝ այս պահին կատարվում են համապատասխան աշխատանքներ, Արցախում տեղակայված ռուսական խաղաղապահ ուժերի շտաբի միջոցով բանակցությունները շարունակվում են, որի շրջանակներում հակառակորդը ներկայացրել է մի շարք պայմաններ, թե հայկական, թե իրենց ուժերի հետքաշման պայմանով:

«Իսկ մենք հայտնել ենք մեր պայմանները, որ մեր առաջ քաշած ստորաբաժանումները, որոնք ժամը 5-ից 10-ը լրիվ ծավալով զբաղեցրել են իրենց դիրքերը, հետ կքաշենք այն պայմաններում, եթե նրանք վերադարձնեն մեր գերեվարված զինծառայողներին, այլ պայման մեր համար ընդունելի չէ»,- հայտնեց ԳՇ պետի տեղակալը:

Էդվարդ Ասրյանը շեշտեց, որ ՀՀ ԶՈւ ստորաբաժանումները նշված ուղղություններում պատրաստ են իրենց առջև դրված խնդիրները կատարելու, բոլոր դեպքերում ռազմական ղեկավարությունը,  բարդ իրավիճակներ չստեղծելու համար, փորձում է բանակցային ճանապարհով լուծել հարցը: