Ձեր վստահելի աղբյուրը

«Հայաստանում անվտանգություն չի լինի, քանի դեռ պետությունը չի վերականգնել արդյունավետ կառավարման իր կարողությունը, իսկ դա նշանակում է  արդյունավետ գործող բանակ, որը նման վտանգների դեպքում ոչ թե զբաղված է ձեռնամարտով, այլ կրակում է»,-լրագրողների հետ հանդիպմանն այսօր հայտարարեց ՀԱԿ փոխնախագահ Լևոն Զուրաբյանը։

Անդրադառնալով հարցին, թե ինչպե՞ս  է կարողացել 90-ականներին Հայաստանը հաղթել, իսկ հիմա պարտվում է՝  բանախոսը նկատեց, հաղթանակի բանալին քաղաքական իրատեսությունն է, հաշվարկված դիվանագիտությունն է, աշխարհքաղաքական իրողությունների հաշվարկն է։

«Առաջին հերթին դա քաղաքական իրատեսությունն է, որը հիմնված է լուրջ արժեհամակարգի վրա, 88-ին մենք գիտեինք, որ հույսը կարելի է դնել միայն սեփական ուժերի վրա, ինչ անում էինք, անում էինք հենց այդ հաշվարկով։ Հասկանում էինք, որ մեր բոլոր գործողությունները պետք է համադրել ուրիշ պետությունների շահերի հետ։ Իսկ ինչի՞ ենք պարտվում, դա էլ շատ պարզ բացատրություն ունի։ 98-ից սկսած մենք մտանք արկածախնդրության, հաշվարկների բացակայության, ոչ ստրատեգիական, առավելապաշտության դաշտ, երբ սկսեցինք աշխարհից պահանջել ավելին, քան աշխարհը պատրաստ էր մեզ տալ»,-ասաց նա։

Զուրաբյանն ընդգծեց, առաջիկա խորհրդարանական արտահերթ ընտրությունները սովորական չեն։

«Հայ ազգային կոնգրեսը դրան մոտենում է որպես պետության վերականգման օպերացիայի։ Սա հատուկ օպերացիա է պետությունը փրկելու ուղղությամբ։ Եվ միայն դա է մեզ պարտադրել մտնելու այս ընտրական գործընթացի մեջ, մենք տեսնում ենք, որ ալտերնատիվը նորանոր դժբախտություններն են, փլուզումներ, ողբերգություններ հայ ժողովրդի համար»,-ասաց Զուրաբյանը, որը ՀԱԿ նախընտրական ցուցակի երկրորդ հորիզոնականում է։

ՀՀ առաջին նախագահ Լևոն Տեր-Պետրոսյանի թիմակիցը հայտարարեց՝ ամեն ինչ անելու են, որ հաղթանակի քաղաքական ռեալիզմը։

«Իսկապես, ժամանակն է սթափվել»,-նշեց նա։

Հիշեցնենք, որ արտահերթ ընտրություններին մասնակցելու համար սահմանված ժամկետում ԿԸՀ անհրաժեշտ փաստաթղթեր են ներկայացրել 23 կուսակցություն և կուսակցությունների 4 դաշինք։

ԱԺ արտահերթ ընտրությունների մասնակից քաղաքական ուժերի ցուցակների գրանցումը ԿԸՀ կողմից պետք է իրականացվի մայիսի 26-31-ը մինչև ժամը 18։00-ն։

Թեկնածուները, կուսակցությունները, կուսակցությունների դաշինքներն ինքնաբացարկ կարող են հայտնել մինչև հունիսի 10-ը ժամը 18։00-ն։

Խորհրդարանական արտահերթ ընտրությունների նախընտրական քարոզարշավը կմեկնարկի հունիսի 7-ին, այն կշարունակվի մինչև հունիսի 18-ը։

Քվեաթերթիկների տպագրումը կմեկնարկի հունիսի 10-ին, կշարունակվի մեկ շաբաթ։

Քվեարկությունը կմեկնարկի հունիսի 20-ին ժամը 8։00-ին։ Ընտրական տեղամասերում քվեարկության արդյունքների վերաբերյալ արձանագրությունը կազմվում է ու հրապարակվում մինչև հունիսի 21-ի ժամը 08։00-ն։