Ձեր վստահելի աղբյուրը

«Այդ հրապարակված փաստաթուղթը, ըստ էության, շրջանցել էր ԱԳՆ-ն, փաստի առաջ էին ԱԳՆ-ում կանգնել: Այդ տեսակետը հիմա դառնում է ակներև»,- ասուլիսում ասաց ռազմական փորձագետ Դավիթ Ջամալյանը՝ խոսելով ՀՀ արտաքին գործերի նախարար Արա Այվազյանի հրաժարականի մասին:

Նա հիշեցրեց, որ օրեր ասաջ ԱԳՆ-ն բավականին հաջողված տեքստ էր հրապարակել, ՀՀ սահմանի դելիմիտացիայի և դեմարկացիայի պրոցեսն ուղղակիորեն պայմանավորել Արցախի տարածքների դեօկուպացիայով: 

«Սա Այվազյանի դիմադրությունն էր, դեմարշն էր, նաև կանխարգելիչ մի բան էր հետագա պրոցեսը կանխելու համար: Բայց քանի որ երկրում կառավարման քաոս է, մարդը գնում է թուրքական ծրագիրն իրականացնելու ճանապարհով, այս ֆոնին, բնականաբար, արտգործնախարարության պատնեշն, ի դեմս այդ հայտարարության, պետք էր շրջանցել»,- ասաց փորձագետը:

Դ. Ջամալյանի խոսքով, ԱԳ նախարարը փաստի առաջ էր կանգնել, համբերության բաժակը լցվել էր,  և այս քայլով նաև ի ցույց  դրվեց այն, որ սեպարատ կապեր գոյություն ունեն, կա ինչ-որ դավադիր մի բան:

«Համամիտ եմ՝  Փաշինյանի հետ մեկ թիմում լինել չէր կարելի ի սկզբանե: Նախարարը չուզեց դավաճանության մեջ մաս ունենար: Հավատում եմ Արամ Գաբրիելյանովի հրապարակմանը, որ ԱԳՆ-ում էլի մարդիկ կան, որ հրաժարական կտան»,- նշեց նա:

Դ. Ջամալյանը նաև ասաց, որ ՀԱՊԿ-ին վարկաբեկելը եղել է այս խառնամբոխն իշխանության բերողների հիմնական նպատակերից մեկը:

Նա նշեց, որ ռուսական օգնություն հիմա էլ ունի Հայաստանը, եթե ռուսական ներկայությունը չլիներ Սյունիքում, թուրքը կագնելու էր Երևան-Գորիս ճանապարհին:

«ՀԱՊԿ-ին դիմում ես, մինչ այդ  խորհրդակացե՞լ ես ՌԴ հետ, չէ՞ որ մինչև դիմելը նաև ինչ-որ ստվերային բանակցություններ պետք է լինեին: Դիմել ես ՀԱՊԿ-ին մի հոդվածով, որն ընդամենը խորհրդակցություններ է ենթադրում: Գիտես, որ դու հակասություն ստեղծել ես ՀԱՊԿ-ի հետ, հիմա էլ  ուզում ես ի ցույց դնել, թե ՀԱՊԿ-ից օգնություն չկար: ՀԱՊԿ-ից պետք է գար նույն ռուսական օգնությունը, այդ ռուսական օգնությունն արդեն իսկ Սյունիքում է: ՀԱՊԿ-ն ու ՌԴ-ն, ըստ էության, նույնն բան է, երբ դիմում ենք ՀԱՊԿ-ին, չենք ակնկալում ղրղզի ներկայությունն այստեղ։

Եթե մենք մեր երկիրը չենք պաշտպանում, դրա ցանկությունը չունենք, որևէ դաշնակից քո փոխարեն քո սահմանը չի պահելու»,- ասաց ռազմական փորձագետը:

Ինչ վերաբերում է հունիսի 20-ին կայանալիք ԱԺ արտահերթ ընտրություններին, Դ. Ջամալյանն ասաց, որ հստակ պետք է հասկանալ՝ կան պետականակենտրոն ուժեր և կա «էրմենիստանի գաղափարն առաջ մղող թրքացածների ամբոխ»:

«Կամ Ռոբերտ Քոչարյանը դառնում է վարչապետ ու պետականակենտրոն ուժերին միավորելով իր շուրջ՝ ստեղծում է լուրջ կադրային բազա ու երկիրը դուրս է բերում ճգնաժամից, կամ սա վերարտադրվում է ու արդեն մարդու ֆանտազիան չի բավարարում ասելու, թե  ինչ կարող է լինել: Փաշինյանը Էրմենիստանի գաղափարի մարմնավորումն է»,- ասաց Դ.Ջամալյանը: