Ձեր վստահելի աղբյուրը

«Լիովին համաձայն եմ, որ ԿԳՄՍ նախարարությունը պետք է բաժանվի: Կրթության ոլորտում լրջագույն խնդիրներ ունենք՝ և՛ բովանդակային առումով, և՛ կառավարման»,- Կոտայքի մարզի քաղաքացիների և «Հայաստան» դաշինքի ակտիվի հետ հանդիպման ժամանակ ասել է ՀՀ երկրորդ նախագահ, «Հայաստան» դաշինքը գլխավորող Ռոբերտ Քոչարյանը:

Նա նշել է, որ կրթությունը ոչ միայն պետք է գիտելիքների ինչ-որ մի ծավալ տա երեխաներին դպրոցում կամ երիտասարդներին բուհերում, այլ պետք է նաև քաղաքացի դաստիարակի. «Երեխան միայն ընտանիքում չի դաստիարակվում, այլ նաև փողոցում: Եթե մենք հիմա հետևողական փորձում ենք հանել կրթությունից ազգայինի բաղադրիչը, հայ լինելու հանգամանքը, ստացվում է, որ մենք քաղաքացի չենք դաստիարակում, այլ ուղղակի գիտելիքների ծավալ ենք տալիս։ Սա խնդիրներից մեկն է»:

Ռ. Քոչարյանի խոսքով, այն, ինչ վերջին տարիներին կատարվեց կրթության հետ, ոչ պակաս աղետ էր։

«Սա հոգեբանական լուրջ ներգործություն էր մեր ազգային ինքնության զգացողության վրա։ Ես երբ նախագահ էի դարձել, ուսուցչի աշխատավարձը մոտ տասնքանի հազար դրամ էր, միանգամից սարքեցինք 78-80 հազար դրամ: Դու չես կարող 5 հազար դրամ տալ ուսուցչին և ակնկալել ինչ-որ բան: Պետությունն ուրիշ ձև չունի գնահատելու, պետության՝ այս կամ այն աշխատանքը գնահատելու ձևն այն աշխատավարձն է, արտոնությունները, որոնք տալիս է»,- նշել է ՀՀ երկրորդ նախագահը:

Ռ. Քոչարյանն ընդգծել է՝ եթե կրթությունը մեզ համար կարևոր է, ուրեմն պետք է այն ըստ արժանվույն գնահատվի. «Մեզնից ոչ մեկը չի կարող կրթությունը շրջանցել: Չես կարող ասել՝ ես կապ չունեմ: Երեխա ունես, թոռ ունես, մեկ է, մտնելու է այդ հաստատությունը և ուղղակի իր վրա ազդեցություն է ունենալու կրթության մակարդակը»:

Ռոբերտ Քոչարյանն ասել է, որ այս ոլորտում լրջագույն բարեփոխումների կարիք կա և անելու են:

«ԿԳՄՍ նախարարությունը պետք է վերանայվի: Ես շշմած էի, երբ մշակույթի նախարարությունն ուղղակի վերացրեցին: Ուրեմն այս մարդկանց համար մշակույթը կարևոր չի: Բացատրություն չունես: Դե հիմա մուղամ լսեք, հիմա սրան են հասցրել»,-ասել է ՀՀ երկրորդ նախագահ, «Հայաստան» դաշինքը գլխավորող Ռոբերտ Քոչարյանը: